پښتون قومي جرګه؛ په خیبر کې د پښتنو د قومي جرګې تازه حال

د عوامي نېشنل ګوند د اطلاعاتو مشره او د دغه ګوند ویانده ثمر هارون بلور وايي، لکه څنګه چې په خیبر کې د پښتنو جرګه جوړه شوه، پښتنو ښځو ته هم باید دا ډول جرګه جوړه شي.

د افغانستان د کورنیو چارو پخوانی وزیر علي احمد جلالي وايي، ځیني هېوادوال د پښتنو د قومي جرګې مثبتو وړاندیزونو ته د تعصب په هېنداره کې ګوري او خپګان پرې ښکاره کوي.

د افغانستان لپاره د امریکا مخکنی ځانګړی استازی زلمی خلیلزاد وايي، سره له دې چې د پاکستان حکومت یې د مخنیوي پوره هڅې وکړې خو د پي ټي ایم په کوربتوب پښتنو په خیبر کې بریالۍ جرګه وکړه.

د پښتون ژغورنې غورځنګ د مرکزي کمېټې او د اطلاعاتو څانګې غړی زکيم خان وزير په خيبر ولسوالۍ کې د پښتنو قومي جرګې پرېکړې مهمي يادي کړې او زياته یې کړه: « د ټولو مشرانو په مشوره او هوکړه ډيرې مهمې پريکړې وشوې، چې انشالله عملي کول به يې هم داسې وي لکه د خيبر جرګه چې ترسره شوه.»

د پښتون ژغورنې غورځنګ د مشرتابه غړي وايي، چې د خیبر ولسونو او کوکي خېل قبیلې د پښتون قومي جرګې ډېره ښه مېلمه پالنه کړې ده.

د خوست پخواني والي حلیم فدایي په خیبر کې د پښتنو جرګه بریالۍ بللې او وایي، چې منظور پښتین باید خپل خوندیتوب او امنیت ته ډېره پاملرنه وکړي.
نوموړي پر خپله اېکسپاڼه لیکلي: «د ستراتیژیکې پالیسۍ پر خلاف سټراټیژکې پرېکړې ستراتیژیکه حوصله غواړې.»

د پښتون قومي جرګې تېره شپه ناوخته د درې ورځنۍ جرګې پرېکړه لیک خپور کړ او په شلو مادو کې یې خپلې غوښتنې د پاکستان حکومت ته وړاندې کړې دي.

دوی ویلي، چې د پښتنو تر منځ ډیورنډ کرښه نه مني.

د افغانستان پخواني ولسمشر حامد کرزي پر اېکس پاڼه لیکلي، چې په خیبر کې د پښتنو قومي جرګې له پرېکړه لیک څخه خپل کلک ملاتړ کوي او په جرګه کې د افغان نجونو د زده‌کړو لپاره غږ پورته کول ستایي.

د پخواني ولسمشر حامد کرزي د دفتر مشر عبدالکریم کریم خُرم وايي، په خیبر کې د پښتنو قومي جرګې په وروستي پرېکړه لیک کې په ټولیز ډول د مظلوم ولس دحق غوښتنه او پر ډیورنډ کرښه د ازاد تگ راتگ غوښتنه د ستایلو وړ ده.

هغه په جرګه کې د نجونو د زده‌کړو غوښتنه د قدر وړ بللې.

پښتونخوا کې عوامي نېشنل ګوند تېره ورځ خیبر کې جرګې ته وویل چې، له افغانستان سره ټولې سوداګریزې لارې دې ژر تر ژره پرانیستل شي او مدیریت د یې پښتونخوا ته وسپارل شي.

د افغانستان د بهرنیو چارو پخواني وزیر محمد حنیف اتر پر اېکس پاڼه لیکلي، چې د پښتنو قومي جرګې ګډونوال د ولس ریښتینې غوښتنې په ډیرې هوښیارۍ او امانتدارۍ سره په لر او بر کې وړاندې کړې.

د طالبانو امربالمعروف وزارت ویاند د خیبر جرګه د «ای اېس ای» پټه اجنډا بللې ده.

د سیف خیبر په نوم دغه طالب چارواکی لومړی کس دی چې د طالبانو له منځه یې پر دغې جرګې داسې تور پورې کړی.

د پاکستان اېکسپریس ټریبیون وايي، خیبر کې د پښتون ژغورنې غورځنګ د درې ورځنۍ جرګې ترسره کېدل باید پر نیک پال ونیول شي.

ورځپاڼه وايي، دا د حکومت او غورځنګ تر منځ د خبرو اترو ښکارندويي کوي او په سیاسي ډګر کې خبرو ته لاره هواروي.

د چمن پرلت د مرکزي کمېټې غړي مولوي محمد یوسف په خیبر کې د پښتنو له جرګې وغوښتل، چې د افغانستان او پاکستان ترمنځ په ټولو لارو دې له پاسپورټ او ویزې پرته تګ راتګ وشي.

د عوامي نېشنل ګوند صوبايي مشر ميا افتخار حسېن په خېبر جرګه کې د دغه ګوند په استازیتوب په خپله وینا کې وويل، چې د پاکستان حکومت باید له دې وروسته خپلې جنګي تګلارې بدلې کړي او د وسله والو ډلو له ملاتړ لاس واخلي.

د پاکستان مشرانو جرګې پخوانی غړی مشتاق احمد خان د پښتنو جرګې ته په وینا کې وویل، چې د «پښتنو په سیمه کې په غره کې ناست ترهګر او په امنیتي پوسته کې ناست پوځي یو ډول دي.»

نوموړی وايي،‌ نور د پښتنو پر خاوره پوځي عملیات نه مني.

د خیبرپښتونخوا سر وزیر علي امين ګنډاپور تېره شپه بیا په خیبر کې د پښتنو قومي جرګې ته ورغلی و او هلته یې د خپلې وینا پر مهال وويل، چې که «پښتانه باید یو پر بل راټول شي او که دوی یو شي هیڅوک پرې ظلم نه شي کولای.»

پښتون قومي جرګې په خپل پرېکړه لیک کې اعلان وکړ، چې د پاکستان پوځ او وسله والې ډلې دې په دوه میاشتو کې د پښتنو له خاورې ووځي.

د پښتون ژغورنې غورځنګ مشر منظور پښتین د پښتنو په قومي جرګه کې د طالبانو له خوا د افغان نجونو د زده کړو مخنیوي ته په اشارې سره وویل، چې جرګه دې د کابل پر واکمنو غږ وکړي چې نجونې زده کړو ته پرېږدي.

د پښتون ژغورنې غورځنګ مشر منظور پښتین د پښتنو قومي جرګه کې په وینا کې ویلي: «که د عاصم منیر په لاس کې اټوم بم وي او زمونږ وجود پرې ټوټې ټوټې هم کړي مونږ ورته نه ټېټېږو.»
منظور پښتین وایي، چې د پاکستان د پوځ مشر جنرال عاصم منیر که زر ځلې هم یو ځای شي بیا هم د غلامۍ خبرې کوي.

د جرګې په خیمو کې یو بحث دادی چې طالبان دې د پخواني جمهوري دولت له پلویانو سره په لویه جرګه کې را غونډ شي او یو ګډ [افغان شموله]حکومت دې جوړ کړي.

منظور پشتین وايي، چې پښتون قومي جرګه دې له قومونو او سیاسي ګوندونو نه یو جوړ ۲۴۰ زره کسیز ملي لښکر اعلان کړي، چې په خپلو سیمو کې د امنیت چاره پرغاړه واخلي.

د پاکستان د مخکیني موقت حکومت د بلوچستان صوبې د اطلاعاتو پخوانی وزير جان اڅکزی وایي، په زرګونو جرګو نور هم د ازاد پښتونستان یا لوی افغانستان خوب نه شي پوره کېدلی.
نوموي د پښتنو قومي جرګه ناکامه بللې او وایي: « پښتانه هیڅکله هم د کابل یا ډهلي اجنډا نه مني.»

د افغانستان د پخواني جمهوري دولت د چارو ادارې پخوانی رییس فضل محمود فضلي وايي، خیبر د پاکستان د پوځ د ګټو خلاف دی او طالبان مجبوره دي، چې د خیبر جرګې پر وړاندې له پاکستاني پوځ سره یو ګډ دریځ ونیسي.

پښتون قومي جرګه نن یکشنبه ناوخته د قومونو او سیاسي ګوندونو د کمېټو پرېکړه لیک صادروي.

په پښتون قومي جرګه کې د شمالي وزیرستان مشران وايي، ددوی خیمه باید کلکې پرېکړې وکړي، چې څوک د ملامتۍ ګوته ورته ونه نیسي.

د پخواني ولسمشر حامد کرزي د دفتر رییس کریم خُرم د پښتنو په قومي جرګه کې د خلکو په ځانګړې توګه د ښځو پراخ ګډون ته په اشارې سره وایي، چې دا جرګه د محتوا له اړخه ډېره غني ښکاري.
نوموړي پر خپل اېکس لیکلي، چې په دې جرګه کې ډېری خبرې روښانه، دقیقې او منطقي دي.

پښتون سیاستوال او د پاکستان د مشرانو جرګې پخوانی غړی افراسیاب خټک وايي، د پاکستان حکومت د ټولو اصولو په تر پښو لاندې کولو سره په پېښور او خیبر کې انټرنیټ په بشپړ ډول بند کړی، او غواړي په دې سره د جرګې د خبري پوښښ مخه ونیسي.

د پښتونخوا نېشنل عوامي ګوند مشر خوشحال خان کاکړ وايي، خیبر کې د پښتنو قومي جرګه دې په پاکستان کې د افغان کډوالو وروستي دوه کلن وضعیت ته پام وکړي او د پاکستان پر حکومت دې فشار راولي چې د افغان کډوالو له ځورولو لاس واخلي.

د راحلې په نوم یوې وزیرستانۍ زده‌کوونکي د پښتنو قومي جرګې ته د یوه ویډیویي پیغام له لارې ويلي، چې غوښتل یې د زده‌کړو له پای ته رسولو وروسته ډاکتره شي، خو وايي دغه ارمان یې هغه ماین نیمګړی کړ چې د دې دواړه لاسونه یې په مړوندو کې ور خوڅ کړل.

د ملي ډیموکراتیک ګوند مشر او د پاکستان قومي اسمبلۍ پخواني غړي محسن داوړ تېره شپه په خیبر کې قومي جرګې ته د وینا پر مهال وويل چې له: «افغان ولس څخه واک د پاکستان حکومت اخیستی او په اړه یې په دغه هیواد کې پرېکړې کیږي.»

د پښتنو قامي‌ جرګه د پښتون ژغورنې غورځنګ (پي ټي ایم) د معلوماتو له مخې وایي، چې تر دې مهاله شا و خوا ۷۶ زره او ۵۸۴ پښتانه په بمي چاودنو او هدفي وژنو کې وژل شوي، ۵،۷ میلیونه خلک بې کوره شوي او ۶ زره او ۷۰۰ کسان لادرکه دي.

د طالبانو د لومړۍ واکمنۍ پرمهال په پاکستان کې د دغې ډلې پخوانی سفیر ملا عبدالسلام ضعیف وایي: «د خیبر جرګه د ظلم پر وړاندې د مظلومانو د فریاد د هیلو راټوکیدلو نوی پړاو دی.»

د پښتنو قامې جرګې د اعلامیې له مخې، د پښتون ژغورنې غورځنګ د (جګړې او پوځي عملیاتو زیانونو) په نوم یوه هر اړخیزه څېړنه خپره کړي. په وزیرستان کې ۱۷۸ چاودنې ثبت شوي، چې ۸۰۰ کسان یې وژلي او ۲۵۰ ماشومانو خپل د بدن غړي له لاسه ورکړي.

د افغانستان د دفاع وزارت پخوانی سرپرست او د جمهوري غوښتونکو خوځښت د سیاسي چارو مسوول وايي، چې د پاکستان پوځ، یو شمېر افراطي ډلو او پلویانو یې پښتانه او افغانان نړۍ ته افراطیان او ترهګر معرفي کړي و، خو د پښتنو قومي جرګې وښودله چې پښتانه او افغانان افراطیان او ترهګر نه دي.

په ننګرهار ولایت کې د جمهوریت د وخت والي ضیاءالحق امرخېل د پښتنو قومي جرګې په اړه وایي: «د خیبر جرګې یوه لویه خوش قسمتي دا ده چې د ګڼو ګوندونو، اقشارو او فکرونو خلک پکې راټول شوي دي.»
نوموړي په خپله اېکس پاڼه کې لیکلي، چې دا جرګه ولسي رنګ لري او خپلې موخې ته به رسېږي.

د جرمني په فرانکفورټ کې د پښتون ژغورنې غورځنګ څانګې د یو شمېر افغانانو په ملتيا په خيبر کې د پښتنو د قامي جرګې په ملاتړ لاريون وکړ او دا يې د ستونزو د حل يوازنۍ لار وبلله.

لاريون والو په سيمه کې پر پښتنو د ظلم، د پاکستان د حکومت څخه د حق اخيستلو او جرګې په ملاتړ شعارونه ورکول.

د پښتون ژغورنې غورځنګ مشر منظور پښتین د پښتنو قامي جرګې ته د وینا پرمهال وویل، چې په تېرو څو کالونو کې ۶ زره او ۷۰۰ پښتانه د پاکستان پوځ له خوا نادرکه شوي دي.

پښتین وايي، چې په غټ سکرین کې د پاکستان پوځ ظلمونه او نادرکه کسانو پیښې مستند شوی دي.

د بښتون قامي عدالت پر اېکس خواله رسنۍ خپور شوي پیغام کې راغلي، چې په خیبر کې د پښتونو د عدالت غوښتنې قومي جرګه پیل شوه.

دوی همدراز لیکلي، چې په جرګه کې لسګونه زره کسان د پښتون ژغورنې غورځنګ د مشر منظور پښتین په مشرۍ سره راټول شوي دي.

د عوامي نشنل ګوند مشر ايمل ولي خان رسنیو ته ويلي، چې د خیبر جرګه د پښتنو د سولې، سرچینو او ستونزو په اړه ده.

نوموړی زياتوي: « ټول بايد ګډه هڅه وکړو، چې د ملت د ستونزو حل پيدا کړو.»

په تېر حکومت کې د افغانستان د پوهنې وزیر فاروق وردګ پښتون ژغورنې غورځنګ ته د خبرداري په ډول ویلي، «دوښمنان مو که د جرګې په مخنیوی کې ناکام شول مګر اوس هم په سنګر کې درته ناست دی، نورې دسیسې او توطیې درته جوړوي.»

د افغانستان په پخوانۍ ولسي جرګه کې د خوست استازي کمال ناصر اوصولي په خپله خواله رنسنۍ اېکس کې د پښتون ژغورنې غورځنګ له خوا د پښتنو قومي جرګې جوړېدو په اړه لیکلي چې د ولي خان او صمد خان کورنۍ دې خپل مسولیت د ولس لپاره ادا کړي او د ولس په لاره دې روانې شي.

جمهوريت کې د افغانستان د ملي امنیت شورا سلاکار رنګین دادفر سپنتا د پښتنو قومي جرګې په اړه ویلي، چې دا لومړۍ جرګه ده چې د واکمنانو په امر نه، بلکې د ښځو او نارینه وو د عدالت غوښتنې پر بنسټ جوړېږي.

د پښتنو په قومي جرګه کې د باجوړ خلکو لپاره په جوړه شوې خېمه کې ديني عالم مولانا خانزېب ویلي، پوښتنه دا ده چې د پاکستان په نورو برخو کې امن، کار او ثبات شته؛ خو په پښتون مېشتو سيمو کې ولې نه امن شته، نه روزګار او نه هم نورې اسانتياوې.

د پاکستان د مشرانو جرګې پخوانی غړی او پښتون سیاست‌وال افراسیاب خټک د پاکستان پر حکومت نیوکه کړې، چې د لارو په بندولو سره یې مېلیونونه خلک اغېزمن کړي دي.

د پښتونخوا لپاره د عوامي نېشنل ګوند صوبایي مشر میا افتخار حسین د پاکستان حکومت ته وایي:« تاسو د پاسپورټونو د بندولو خبره کوئ، که سبا ورځ موږ پرېکړه وکړو چې پاسپورټ او شناختي کارت ته اړتیا نه لرو؛ نو تاسو به څه کوئ؟»

په پاکستان کې د افغانستان پخوانی سفیر نجیب‌الله علي خېل وایي:« ‏د خېبر تاریخي جرګه د الهام څخه ډکه داعیه ده، چې یو وخت په دې سیمه کې د ازادۍ غوښتنې همدا ډول احساس او خوځښت، د افریقا تر وچې د جبر دېوالونه ونړول.»

د جمعیت علمای اسلام ګوند مشر مولانا فضل الرحمن وایي، د پاکستان په قانون کې د سوله‌ییزې جرګې پر وړاندې کوم خنډ نه شته.
هغه وایي، لاهم نه پوهېږي چې دغه حرکت ولې ناقانونه اعلان شوی و.

د پښتنو د عدالت غوښتنې جرګې سمبالوونکي وايي، د جرګې د پیلېدا لپاره ټولې تابیاوې نیول شوې او ښايي په راتلونکو دوو ساعتونو کې دغه جرګه په رسمي بڼه پيل شي.

د وروستي جمهوریت د ولسمشر مرستیال وایي، چې د پښتنو جرګه کې د ښځو شتون د پښتنو په اړه وړاندې شوی روایت بدل کړی دی. هغه وايي: «د طالبانو پروژه له ډېر پخوا څخه افغان ولس او نړۍ ته د پښتنو د یو واقعیت په توګه وړاندې شوې ده. پي ټي اېم دغه غلط تصور ړنګ او له منځه یوړ.»

د افغانستان لپاره د امریکا پخوانی استازی وایي، چې د پاکستان د پوځ مشر جنرال عاصم منیر خپله ستونزه پراخوي. هغه وايي، چې نوموړي د پاکستان تر ټولو مشهور سیاستوال د یو شمیر غلطو تورنو په اساس بندي کړی او اوس یې د بشري حقونو پر مدافع ډلې پي ټي ام بندیز لګولی دی.

د پښتون ژغورنې غورځنګ مشر منظور پښتین د پښتنو د جرګې د نه ترسره کېدو په اړه وویل، چې د دوی د چمتووالي پروړاندې د ای اس ای له خوا ډېر خنډونه جوړ شوي دي.

د نوموړي په وینا، د پښتنو د وضعیت په اړه به د اکټوبر په ۱۳مه پرېکړه وشي.

د پښتنو قومي جرګه کې ګډون کوونکی پښتون مشر محمد عظم یوسفزی وایي: «که څه هم جرګه د پښتنو حق دی، خو د پاکستان ظالم حکومت یې جرګې ته نه پرېږدي.»
نوموړی وایي، چې له څلوېښتو کلونو راهیسې د پښتنو په سیمو کې جګړې روانې دي او ددې جرګې په ترسره کولو سره پښتانه خپل حق غواړي.

د منظور پښتین په مشرۍ د پښتنو قامي جرګه وایي، چې د ښځو غږ به د ازادۍ او بدلون د لارې مهمه برخه وي.
د دغې جرګې په رسمي اېکس پاڼه کې یوه ویډیو خپره شوي، چې ښيي ډېر شمېر مېرمنو هم په دې غونډه کې ګډون کړی دی.

په خیبرپښتونخوا کې خبریال او د چارو شننونکي د افغانستان انټرنشنل - پښتو په سپړنه خپرونه کې وویل، چې د حکومت له خوا رسنیو ته ویل شوي وو، چې د جرګې خبرونه به نه خپروي.

د مهمندو استازي ساجد خان مهمند د پښتنو عدالت قامي جرګې کې وویل: "که موږ سره راټول نه شو، یو نه شو، زه چې خپل مشر (عمران خان) له زندان څخه نه شم خلاصولی نو تا به له دې حالته څه خلاص کړم."

د عوامي نشنل ګوند مشر ایمل ولي خان د جمعې په ورځ (د اکټوبر ۱۱مه) ولي باغ کې یوې خبرې غونډې ته وویل، چې د شنبې په ورځ (د اکټوبر ۱۲مه) به د پښتنو د عدالت غوښتنې جرګې کې ګډون او د پښتون قوم وکالت وکړي.

په خیبر کې د افغانستان انټرنشنل - پښتو برخې خبریال رفعت الله اورکزی وایي، چې دا جرګه د نیمګړتیاوو له امله ځنډېدلې، خو زرګونه خلک لا هم سیمې ته د ورتلو په حال کې دي.

د خېبر پښتونخوا د سر وزیر د مطبوعاتي دفتر په یوې اعلامیه کې راغلي چې علي امین ګنډاپور د اکټوبر په یوولسمه د پښتنو د عدالت قامي جرګې د امنیتي او نور تدابیرو څخه لیدنه وکړه.

د پاکستان د تحریک انصاف د رهبرۍ شورا غړی اسد قیصر د پښتنو د عدالت غوښتنې قامي جرګې ته وویل: "موږ ټول یو یوو، کوم ظلم چې په دې خاوره کیږي خلاف یې یوو."

د پښتونخوا د خېبر ولسوالۍ لپاره د عوامي نشنل ګوند مشر ملک دریا خان افغانستان انټرنشنل ته وویل، چې پښتانه د اتحاد او ابادی خلک دي او ترهګري یې کله هم نه ده خوښه کړې.

د پښتون ژغورنې غورځنګ مشر منظور پښتین په یو ویډیو پېغام کې وايي، چې د پښتون قومي جرګه ځنډېدلې ده؛ خو چمتوالی په چټکۍ سره روان دی، چې ژر شروع شي.

پښتین وویل، چې پر پښتنو شوو ظلمونو د بربنډولو لپاره د لوي ټلویزیون د راوړلو پر وړاندې ستونزې جوړیږي.

د تېر حکومت د دفاع وزارت سرپرست او د جمهوري غوښتونکو خوځښت د سیاسي چارو مسوول شاه محمود میاخېل وايي، چې د پښتونو د عدال جرګې دایریدل په خپله یوه لویه کامیابي ده.

په پښتونخوا کې د "پښتون ژغورنې غورځنګ" په نوښت د جوړې شوې قومي جرګې په انځورونو کې لیدل کېږي، چې په دې جرګه کې ښځې هم کډون لري.

د دې جرګې له پیلېدو سره سم د جمعې په ورځ د تلې په ۲۰مه په خیبر پښتونخوا کې مخابراتي شبکې بندې شوې.

د پاکستان فدرالي حکومت پر پي ټي اېم د لګېدلو بندیزونو د بېرته لرې کولو پرېکړه کړې ده.

یو شمېر سرچینو د دغه هېواد ډان ورځپاڼې ته ویلي، چې دا هوکړه پرون د خیبر پښتونخوا حکومت په مشرۍ د فدرالي حکومت، صوبايي چارواکو او سیاسي ګوندونوپه ناسته کې شوې ده.

د جمهوریت د وخت د سولې مرکچي پلاوي مشر معصوم ستانکزی په خیبر کې پښتون قامي عدالت ته په اشاره وایي،« د پښتنو د دې ملي او تاریخي جرګې ګډونوالو ته د کامیابۍ دعا کوو، چې خپلو موخو ته په تدبیر ورسیږی.»

د عوامي نېشنل ګوند مشر اېمل ولي خان وایي:« زه باوري یم، چې د پښتنو ستونزې ډېرې دي؛ خو موږ به یې په سوله‌ییزه توګه غوڅې کړو.»

د مالیې پخواني وزیر عمر زاخېلوال هیله مندي ښودلې، چې د پښتنو جرګه به د لرو پښتنو مشرانو او ځوانانو په یووالي او همغږۍ په خپلو سپېڅلو موخو کې بریالۍ او پرېکړې به یې د پښتنو د اوږدې مودې کړاونه پای ته ورسوي.

د افغانستان د بهرنیو چارو پخواني وزیر محمد حنیف اتمر پر اېکس پاڼه لیکلي:« موږ د پښتنو ملي او تاریخي جرګې ته د زړه له تله ښه راغلاست وایو او د سوله غوښتونکو او عدالت غوښتونکو پر وړاندې د وحشیانه تاوتریخوالي غندنه کوو.»

د مشرانو جرګې پخوانی مشر فضل هادي مسلمیار وایي، پښتانه جرګه کوي او غواړي چې د خپل راتلونکي لپاره یوه داسې تګلاره جوړه کړي چې له هر ډول جبر زور او زیاتي څخه په امان کې وي او سرومال یې خوندي شي.

د افغانستان د پخواني جمهوري دولت د چارو ادارې پخوانی مشر فضل محمود فضلي وايي، د پښتون قامي جرګه د جګړو، وینو بهېدو او د پردیو سازشونو د پای ته رسولو لپاره ښه فرصت دی.

په خیبر پښتونخوا کې ګڼو کسانو افغانستان انټرنشنل پښتو ته ویلي، چې په خیبر ولسوالۍ کې د پښتنو د عدالت غوښتنې جرګې له امله د څو ورځو راهیسې ټولې مخابراتي شبکې بندې او انټرنېټ هم له کاره لوېدلی دی.

د پښتون ژغورنې غورځنګ مشر منظور پښتین وایي، د پښتنو د عدالت جرګې د رابللو موخه دا ده چې نور پر دغې خاورې د وینو تویېدلو بهیر ودرول شي.

د خیبرپښتونخوا صوبايي وزیر پښتون یار خان وایي، د خېبر ولسوالۍ د پښتنو عدالتي جرګه د يو فرد نه؛ بلکې د ټولو پښتنو ګډه جرګه ده.

د پاکستان نوموتی مفتي منیر شاکر وايي، چې د پښتنو د عدالت غوښتنې جرګه د پښتون قوم د خیر، ښېګڼې لپاره جوړیږي او په دې کې د هیڅ قوم او هیڅ ټبر د شر لپاره پرېکړه نه کېږي.

د جماعت اسلامي ګوند مخکښ غړي او پخواني سناتور مشتاق احمد غوښتنه کړې، چې د هغو افسرانو خلاف دې د ترهګرۍ مقدمې درج کړل شي چې په پښتنو ځوانانو يې ډزې کړې دي.

د پښتون ژغورنې غورځنګ مشر منظور پښتین تېره شپه ناوخته د پښتونخوا له مشر وزیر علي امین ګنډا پور سره په یوه شریک خبري کنفرانس کې وویل، چې له قاتلینو سره به پښتنو د هر وژل شوي کس حساب کوي.

د خیبر پښتونخوا مشر وزیر علي امین ګنډا پور وايي، چې د پښتنو د قومي جرګې پر غړو شوی برید د غندنې وړ دی او یاده جرګه به په ارامۍ سره ترسره شي.

پر خواله رسنیو د خپرو شوو انځورونو له مخې، د اسلام اباد په قایداعظم پوهنتون کې د پنجابي محصلینو شورا پر پښتنو محصلیونو بریدونه کړي او یو شمیر کسان یې ټپیان کړي دي.

د افغانستان د پخواني جمهوري دولت د کورنیو چارو وروستی وزیر عبدالستار میرزکوال وايي، چې په پښتونخوا کې د پښتون ژغورنې غورځنګ او نورو مترقي بنسټونو پر وړاندې "تاوتریخوالی او ظلم" تاریخي ریښه لري.

د پښتون ژغورنې غورځنګ مشر منظور پښتین د پښتون قومي جرګې په میدان کې د خپلو څلورو وژل شویو پلویانو د جنازې په مراسمو کې په غیر مستقیم ډول د پاکستان پوځ او امنیتي ادارو ته په اشارې سره وویل: «د اختر د پسه په څېر چاړه په اوبو کې ویني».

د پښتون ژغورنې غورځنګ مخکښ غړی سید عالم مسید د پښتنو قومي جرګې جوړېدو ته د پاکستان د فډرالي حکومت له خوا له اجازه ورکولو وروسته وویل: «ریاست پښتون قومې عدالت ته په اجازه ورکولو اړ شو.»
نوموړي پر فېسبوک لیکلي، چې د پښتنو یووالی د دوښمن د ماتې په مانا دی.

د پاکستان د پارلمان پخوانی غړی محسن داوړ وايي، چې د پښتنو د قومي جرګې د جوړېدو په اړه د دوی غوښتنې منل شوي او د پاکستان ایالتي او فډرالي حکومت به دوی ته د جرګې د جوړېدو اجازه ورکړي.

له طالبانو سره د پخواني افغان حکومت د مرکچي پلاوي غړي نادر نادري په پښتونخوا کې د پښتنو جوړېدونکې قومي جرګې ته په اشارې وایي: «مدني مبارزه او له ظلم او استبداد د خلاصون لپاره هڅې په هر ځای کې د ستایلو دي.»

د پاکستان حکومت د جنوبي وزیرستان د دریو خبریالانو نومونه د ترهګرو په نوملړ کې شامل کړي دي.

د خیبر پښتونخوا سر وزیر علي امین ګنډاپور دغه څرګندونې هغې غونډې ته کړې، چې نن د پاکستان د کورنیو چارو وزیر محسن نقوي، د سیاسي ګوندونو مشرانو او استازو د خیبر پښتونخوا د صوبایي اسمبلۍ او د پارلمان استازو په کې برخه لرله.

د پاکستان په چارو کې د افغانستان د پخواني جمهوري دولت ځانګړي استازي عمر داوودزي د پښتون ژغورنې غورځنګ مشر ته په خطاب کې وویل: «د حق غوښتنې په لاره روان یې، د خدای مرحمت او د ټول افغان ولس ملاتړ درسره دی.»

د پښتونخوا ملتپال سیاستوال او د پاکستان د مشرانو جرګې پخوانی غړی افراسیاب خټک په خیبر کې د پښتون قومي جرګې پر غړو برید د پاکستاني چارواکو تېروتنه او یو پارونکی عمل بولي.
هغه وايي، له واکمنانو د هوښیارۍ تمه بیځایه کار دی.

د خیبر قومي جرګې مشران وايي، چې د خیبرپښتونخوا او وزیرستان زرګونه کسان د تړلو لارو له امله په غرونو کې پلي را روان دي.
دوی وايي، پاکستاني ځواکونو پرې لارې تړلې خو دوی جرګې ته له نورو لارو ځان رسوي.

د پښتون ژغورنې غورځنګ د مشرتابه غړي وايي، تر دې دمه زرګونه کسان خیبر کې د جرګې میدان ته رسیدلي او نور یې پر لارو دي.
دوی دا هم وايي، چې د تېرې ورځې د وژل شویو کسانو د جنازې مراسم به نن له ماسپښین وروسته د جرګې په میدان کیږي.

پيښور کې د عوامي نېشنل ګوند د پښتونخوا د مشر ميا افتخار حسين په مشرۍ یو پلاوی د خیبر جرګې د تېرې ورځې د ټپيانو پوښتنې ته ورغلی او هغوی ته یې ډاډ ورکړی.
هغه پر ولسي خلکو د پاکستان حکومت برید غندلی دی.

د پاکستان کورنیو چارو وزیر اسلام اباد کې یوې خبري غوڼدې ته ويلي، د جرګې په کولو هيڅ اعتراض نه شته، خو وايي د زرګونو کسانو راټولېدل جرګه نه، بلکې د یوه موازي حکومت اعلانول دي.
هغه ویلي، چې د پي ټي ایم د ملاتړو شناختي کارډ او پاسپورټونه به بند کړي.

‏د پاکستان جمعیت علمای اسلام ګوند مشر مولانا فضل الرحمان د پښتنو کېدونکي جرګې پر ګډونوالو په خیبر او واڼه کې د پاکستاني ځواکونو بریدونه غندلي دي.
هغه ویلي، د پاکستان حکومت په دغه کار سره حالات لا ترینګلي کوي.

تېره ورځ په خیبر کې د کېدونکې جرګې پر خیمه د پاکستاني امنیتي ځواکونو په برید کې درې تنه وژل شوي او د ۱۵ شاوخوا ټپیان شوي، چې د هغوی له ډلې یو تن تېره شپه د ژورو ټپونو له امله ساه ورکړه او په دې سره د وژل شویو شمېر څلورو تنو ته لوړ شو.

د پښتون ژغورنې غورځنګ مشر منظور پښتین په خیبر ولسوالۍ کې د پښتون قومي جرګې پر تنظیم کوونکو له برید وروسته په خپل ویډیويي پیغام کې وویل، چې د جرګې له جوړولو نه پرشا کیږي.

د پاکستان د بشري حقونو کمېسیون د پښتون ژغورنې غورځنګ پر غړو او جرګې له بریدونو سره مخالفت ښودلی.

د افغانستان د پخواني ولسمشر لور هیله نجیب د پښتون ژغورنې غورځنګ پر وړاندې د پاکستان د امنیتي ځواکونو او د حکومت پر اقداماتو د نړۍوالو رسنیو چوپتیا تر پوښتنې لاندې راوستې ده.

د پښتونخوا ملي عوامي ګوند مرکزي مشر ایمل ولي خان د پښتون ژغورنې غورځنګ پر غړو د پاکستان د امنیتي ځواکونو برید په غبرګون کې ویلي، چې پښتانه ګواښناک غبرګون ته اړ اېستل کیږي.

د جمهوري غوښتونکو خوځښت د پښتون قومي جرګې پر تنظیم کوونکو د پاکستاني ځواکونو د برید په غبرګون کې وايي، چې حکومتونه په زور د ولس غږ نه شي غلی کولی.

د کوهاټ اوسېدونکو افغانستان انټرنشنل ـ پښتو ته ويلي، چې نن ماسپښین پاکستاني ځواکونو د کوهاټ تونل د ترافيکو پر مخ بند کړی او چا ته د تګ راتګ اجازه نه ورکوي.

بل لوري بیا د پښتون ژغورنې غورځنګ غړي وایي، چې پاکستاني حکومت دا کار د قومي جرګې د مخنيوي لپاره کړی.

د قومي وطن ګوند مشر افتاب احمدخان شېرپاو د پښتون قومي جرګې د راغونډېدو په سیمه کې د پښتون ژغورنې غورځنګ پر غړو برید غندلی.
په دغه برید کې درې تنه وژل شوي او له لسو ډېر نور ټپیان دي.
شېرپاو پر خپل ایکس لیکلي، چې دده ګوند له دې وړاندې هم پر پښتون ژغورنې غورځنګ د بندیزونو مخالفت کړی.

د افغانستان د پخواني جمهوري دولت د چارو ادارې پخوانی مشر فضل محمود فضلي وايي، د پښتون ژغورنې ملاتړ ځکه کوي، چې ټوپکسالارۍ او مذهبي افراطيانو پر وړاندې مبارزه کوي.

نوموړي ويلي: «مترقي غورځنګونه د افغان وطن د عزت، ازادۍ او ثبات لپاره په مېړانه ولاړ دي.»

د پښتون ژغورنې غورځنګ مشر منظور پښتین د پښتون قومي جر ګې پر غړو د پاکستاني ځواکونو د برید غبرګون کې ویلي چې امنیتي ځواکونو پر خلکو مستقیمې ډزې کړې دي.

د پښتونخوا ملتپال سیاستوال او د پاکستان د مشرانو جرګې پخواني غړي افراسیاب خټک په خیبر ولسوالۍ کې د پښتون قومي جرګې پر غړو برید غندلی او وايي، له بریدګرو سره باید محاسبه وشي.
خټک وايي، د سوله خوښو فعالانو پر وړاندې د زور کارول یو پاروونکی عمل دی.

د پاکستان امنیتي ځواکونه په خیبر ولسوالۍ کې د پښتون قامي جرګې پر ځای له یوه مرګوني برید وروسته ظاهرا شاته شوي او د جرګې غړي او د سیمې خلک د جرګې په خیمه کې راغونډ شوي.

خیبر ولسوالۍ کې د پښتون قومي جرګې پر غړو د پاکستان امنیتي ځواکونو په ډزو کې د جرګې درې تنه وژل شوي او ۱۵ نور ټپیان شوي.

افغانستان انټرنشنل ته رسېدلې ویډیو کې هم د درې کسانو مړي لیدل کېږي.

ځايي سرچینو افغانستان انټرنشنل پښتو ته ویلي، چې له شمالي او سوېلي وزیرستانه جرګې ته پر را روانو کاروانونو په بریدونو کې یو کس وژل شوی او نږدې شل تنه ټپیان شوي.
سیمه کې خبریالان وايي، چې پاکستاني امنیتي عسکر پر خلکو مخامخ ډزې کوي.

په کراچۍ کې د متحده قومي غورځنګ (ایم کیو ایم) مشر الطاف حسین د پاکستان پر حکومت غږ کړی چې پر پښتون ژغورنې غورځنګ لګول شوی بندیز دې ژر تر ژره بېرته واخلي.
هغه ویلي، که حکومت دغه بندیز لرې نه کړي، د هر څه پېښېدو مسوول به دوی وي.

د خیبر په جمرود سیمه کې د اپریدیو ټبر مشر ملک نصیر اپریدي په جمرود کې د پښتنو قومي جرګې په میدان کې پولیسو ته یو ساعت وخت ورکړی چې دغه سیمه پریږدي او که داسې ونه کړي نو د هر څه پېښېدو مسوول به دوی وي.

د پښتون ژغورنې غورځنګ غړي وايي، پاکستاني پولیسو له سوېلې وزیرستانه د خلکو د هغه کاروان مخه نیولې چې په خیبر کې د کېدونکي جرګې لپاره پر لاره وو.
ویل کیږي، پاکستاني پولیسو دغه کاروان په واڼه کې درولی او د تګ اجازه نه ورکوي.

د پاکستاني رسینو د راپورونو له مخې چې د پاکستان حکومت خیبرپښتونخوا کې د پښتون ژغورنې غورځنګ ۵۲ غړي د بندیزونو نوملړ ته ور زیات کړي دي.
ويل کیږي، په دغه نوملړ کې شته کسان به د ترهګرۍ ضد ادارې تر څار لاندې وي.

په خواله رسنیو کې پښتنو فعالانو پر ټولو پښتنو غږ کړی چې په ایکس، فیسبوک او انسټګرام کې دې له دغه هشټګ «#په_خیبر_ننګ_وکړئ» سره خپل غږ پورته کړي.
دوی له ټولو فعالانو غوښتي چې د پښتنو قومي جرګې ملاتړ وکړي او د دفاع لپاره یې غږ پورته کړي.

د پښتون ژغورنې غورځنګ مشر وايي، پاکستاني عسکرو خیبر کې د جرګې خیمه نړولې او هغه ځای یې تر خپلې ولکې لاندې راوستی.
منظور پښتین وايي، «خو موږ سپینه خبره ورته کوو چې پښتانه به جرګه هرو مرو کوي.»

ځايي سرچینې وايي، د شپې په وروستیو کې د پښتنو قومي جرګې پر خیمې د پاکستاني ځواکونو تر برید وروسته د سیمې په جوماتونو کې له خلکو غوښتل شوي چې د جرګې د ملاتړ لپاره په ډله ییز ډول راووځي.

د پښتون ژغورنې غورځنګ مشر منظور پښتین په خپله اېکس پاڼه لیکلي، چې پاکستاني ځواکونو د پښتنو قامي جرګې پر میدان پراخ برید کړی، اوښلن ګاز یې شیندلی او ورسره یې ټلیفوني شبکې هم بندې کړې دي.

هغه ویلي، چې جرګه به په هر صورت کوي.

د پښتون ژغورنې غورځنګ مشر منظور پښتین وایي، په خیبر ولسوالۍ کې پاکستاني ځواکونه نن شپه د پښتون قومي جرګې د راټولېدو پرځای د برید تیاری نیسي.

د پښتون ژغورنې غورځنګ مشر منظور پښتین د پاکستان ددفاع او اطلاعاتو وزیرانو تورونو ته په ځواب کې وویل، چې پر دوی یو لګول شوی تور هم نه دی ثابت شوی.

د افغانستان د بهرنیو چارو پخوانی وزیر حنیف اتمر وايي، په پاکستان کې پر پښتون ژغورنې غورځنګ بندیزونه د دغه دولت د ظلم او ځواب نه ویلو ښکارندويي کوي.

د خیبر پښتونخوا صوبې د خیبر ولسوالۍ مرستیال کمېشنر د یوه مکتوب له لارې په دې ولسوالۍ کې تر یوې میاشتې پورې پر غونډو بندیز ولګاوه.

د بښنې نړيوال سازمان د سويلي اسيا لپاره د سيمه ييزې ادارې مرستيال له پاکستاني چارواکو غوښتي، چې له پښتون ژغورنې غورځنګ سملاسي بنديزونه لرې کړي.

د پښتونخوا لپاره د عوامي نېشنل ګوند مشر پر پښتون ژغورنې غورځنګ د پاکستان د حکومت بندیز د جمهوري اصولو خلاف بولي.

د پښتونخوا ملي عوامي ګوند مشر محمود خان اڅکزی وایي، پر پښتون ژغورنې غورځنګ بندیز د قانون خلاف دی.

اڅکزي پر خپل اېکس لیکلي چې "د قانون او اصولو له مخې هرڅوک د سیاسي ګوند، تنظیم ،غونډې، وینا او لیک ازادي لري، له همدې امله پر پښتون ژغورنې غورځنګ بندیز غیر قانوني دی".

د افغان ځوانانو یوه سیاسي او فکري بهیر چې د «اکثریت» په نوم په یوه ټولګه کې راټول دي وايي، دوی د پښتنو له قومي ي جرګې ملاتړ کوي او په دې برخه کې ورسره هر ډول مرستې او همکارۍ ته چمتو دي.
دغه بهیر په ایکس پاڼه د پښتنو له قومجرګې ملاتړ اعلان کړی.

پښتون ملت‌پال سیاستوال او د پاکستان د مشرانو جرګې پخوانی غړی افراسیاب خټک وايي، د پښتنو قومي جرګه د هغو بې غږه خلکو غږ پورته کوي چې تر اوسه پورې «یوازې پرې ظلم شوی او چا یې غږ نه دی اوریدلی.»

د عوامي ملي ګوند مرکزي مشر ایمل ولي خان وایي، پر پښتون ژغورنې غورځنګ بندیز د ستونزې حل نه دی، بلکې مسله لا پېچلې کوي.

نوموړی وايي، چې ګوند به یې په جرګه کې ګډون کوي.

د پښتنون ژغورنې غورځنګ د مرکزي کمېټې غړی عبدالصمد خان افغانستان انټرنشنل - پښتو ته ویلي، چې ۳۰ زره کسانو ته یې د دعوت کارتونه ورکړي دي.

نوموړی وايي، چې ښايي شمېر له دې هم زیات شي.

د پښتون ژغورنې غورځنګ د مرکزي شورا غړی عبدالصمد خان وايي، چې د پاکستان پولیسو پرې درې ځله برید کړی، د دوی خېمې یې سوځولي او یو شمېر وسایل یې له ځانه سره وړې دي. نوموړي افغانستان انټرنشنل - پښتو ته زیاته کړه، چې دوی به په ټاکلې نېټه د پښتنو قومي جرګه وکړي، چې له دېرشو زرو څخه زیات ګډونوال به ولري.

د افغانستان د پخواني جمهوري دولت د چارو ادارې پخوانی مشر فضل محمود فضلي وايي، چې یو شمېر پښتانه د پښتنو له قومي جرګې یو لړ غیر واقعي او له مبالغې ډک توقعات لري، چې باید مدیریت شي.

د پښتون ژغورنې غورځنګ مشر منظور پښتین پر خپلې اېکس پاڼې د پاکستان حکومت ته په اشارې ویلي: " د جبر، زنداني کولو، لوټ او مار شوق مو پوره کړئ؛ خو پښتانه نور ستاسو ظالمانه پالیسي نه مني".

د پښتون ژغورنې غورځنګ له خوا د خیبرپښتونخوا په خیبر کې د پښتنو قومي جرګې تیاري روانه ده. تېره ورځ پاکستان د دغه غورځنګ پر فعالیتونو بندیز ولګاوه او ویې ویل، چې د پښتون ژغورنې غورځنګ فعالیت د پاکستان سولې او امنیت ته ګواښ دی.

د افغانستان انټرنشنل - پښتو خبریال رفعت الله اورکزی سیمې ته تللی او له هغه ځایه د جرګې په تړاو معلومات وړاندې کوي.

د پاکستان طالبانو تحریک د اکتوبر ۱۱ مې پښتون قامي جرګې ته ددرناوي په خاطر د اکتوبر له نهمې څخه تر ۱۳ مې نېټې اوربند اعلان کړی.

په اعلاميه کې په پښتنو سيمو کې د پاکستان حکومت او پوځ له لوري سختو ظلمونو ته اشاره شوې او د هغو حرکتونو ملاتړ شوی، چې د حقونو غوښتنه کوي.

د پښتون ژغورنې غورځنګ غړی زکیم خان وزیر پر پي ټي اېم د پاکستان حکومت د بندیزونو غبرګون کې وایي، چې د سوله یيزې مبارزې مخنيوی ترهګري ده.
نوموړی وایي، "زموږ حوصلې ورځ تربلې لا لوړيږي، موږ که په هر نوم بدنام هم شو بيا به هم د خپل ولس لپاره په جار د حق ناره کوو".

د کاناډا په ټورنټو کې د پښتون ژغورنې غورځنګ غړو او یو شمېر افغان فعالانو د اکټوبر ۱۱مې پښتنو قومي عدالت جرګې په ملاتړ او د پاکستان له خوا پر دغه غورځنګ د بنديزونو پر وړاندې لاريون وکړ.

د پښتون ژغورنې غورځنګ د مشرتابه غړي حنیف پښتین ويلي چې د شمالي وﺯيرستان د ټولو ټبرونو قومي لښکر د اتمانزیو جرګې تر چتر لاندې په ۱۱م اکټوبر د پښتنو قومي عدالت جرګه کې د ګډون اعلان کړی.

پښتون سياستوال او د خیبر پښتونخوا سناتور مشتاق احمد خان په ټولو پښتنو او په ځانګړي ډول پر اپريديو غږ کړی چې د پښتنو قامي عدالت جرګه کې د منظور پښتين ملاتړ ته راشي.

هغه وايي، پښتانه چې یو ځل هوډ وکړي بیا له خپل هوډه نه په شا کیږي.

پښتون ملت‌پال سیاستوال او د پاکستان د مشرانو جرګې پخوانی غړی افراسیاب خټک د پاکستان د حکومت له خوا پر پښتون ژغورنې غورځنګ د بندیزونو په غبرګون ویلي، چې پر یاد غورځنګ د بندیزونو لګول د ستم لاندې خلکو پر وړاندې یو استعماري ګام دی.

د پښتون ژغورنې غورځنګ د رهبرۍ شورا غړي عبدالصمد خان تېره شپه ناوخته په خیبر کې د جرګې ګډونوالو ته په وینا کې ویلي، چې دوی به په هر حال د پښتنو قومي جرګه کوي.

د پېښور پوهنتون د ژورنالېزم پوهنځي مشر سید افغان اشرف وايي، چې په پښتونخوا کې پر پښتنو سختې ورځې تېرې شوې دي او د پښتنو په قامي جرګه به د پښتنو پر ستونزو او مشکلاتو بحث کیږي.

افغانستان انټرنشنل - پښتو د پښتنو د قومي جرګې احوال او پر پښتون ژغورنې غورځنګ د لګېدلو بندیزونو په تړاو غبرګونونه او راپورونه شېبه په شېبه خپروي. د افغانستان انټرنشنل - پښتو لایف بلاګ وڅارئ.

د افغانستان انټرنشنل - پښتو ځانګړی اېکس سپیس چې د پښتنو د قومي جرګې او پر وړاندې یې د روان کړکېچ په تړاو پکې بحث کیږي جریان لري.

د افغانستان د جمهوري غوښتونکو خوځښت په يوې اعلاميه کې د اکټوبر قومي جرګې د جوړېدو ملاتړ وکړ او پر ملت يې غږ کړی، چې «په دې حساسو شېبو د ملي يوالي په مټ د پښتون ژغورنې غورځنګ ترڅنګ ودرېږي.»

د طالبانو د بهرنيو چارو وزارت ویاند په پاکستان کې د حکومت او سیاسي مخالفينو د پلويانو ترمنځ پر ترینګلتياو اندېښنه ښودلې او ويلي يې دي: «د ولس د مشروع غوښتنو پر وړاندې تر ټولو ښه لار مذاکره او تفاهم دی.»

د افغانستان د ملي امنیت پخواني مشر رحمت الله نبیل د پاکستان د حکومت له خوا د منع شويو سازمانونو په نوملړ کې د پښتون ژرغورنې غورځنګ د شاملېدو په غبرګون ویلي، چې په پاکستان کې وروستي بدلونونه د ژورو او پېچلو بدلونونو نښه ده.

د پاکستان د حکومت له خوا د منع شويو سازمانونو په نوملړ کې د پښتون ژرغورنې غورځنګ شاملېدل له پراخو غبرګونونو سره مخ شوی دی.