د چمن پرلت استازی جرګې ته: پاکستان یوازې موږ نه، بلکې زموږ سوداګري یې هم وژلې ده
د چمن پرلت د مرکزي کمېټې غړي مولوي محمد یوسف په خیبر کې د پښتنو له جرګې وغوښتل، چې د افغانستان او پاکستان ترمنځ په ټولو لارو دې له پاسپورټ او ویزې پرته تګ راتګ وشي.
نوموړی وايي، د ډیورنډ کرښې دواړو غاړو ته پراته پښتانه د چمن او افغانستان ـ پاکستان ترمنځ ټولو لارو باندې د پاسپورټ جبري کېدل نه منو.
نوموړي جرګې ته په خپله وینا کې وویل، چې د پاکستان حکومت له لوري د سپین بولدک ـ چمن پر دروازه د پاسپورټ او ویزې په جبرې کېدو سره هلته د یو میلیون کسانو کاروبار او سوداګري زیانمنه شوې ده.
نوموړي د جرګې ګډونوالو ته وویل، چې له یو کال راهیسې وخت نا وخت یو میلیون کسانو هلته پرلت وهلی او د پاسپورټ جبري کېدو سره هلته په میلیونونو کسان وزګاره شوي دي.
ښاغلی محمد یوسف وايي، د دې جرګې په پرېکړو کې دې د چمن او قبایلي سیمو کې له افغانستان سره نورو لارو ته باید ځانګړې پاملرنه وشي.
مولوي محمد یوسف زیاتوي: «چمن د خلکو پلرنۍ ځمکې د ډیورنډ کرښې دواړو خواوته دي اوس د چمن خلک د سپین بولدک خواته نه شي تلی، هلته یې ځمکې پاتې دي، خپلوۍ او کاروبارونه یې پاتې دي.»
د چمن دغه دیني عالم وايي، د پاکستان حکومت دې د چمن د خلکو پر حقونو سترګې نه پټوي او ډیورنډ کرښه باندې ټولو پرتو قومونو ته باید د هغوی حقونه ورکړل شي.
نوموړي وویل: «موږ پاسپورټ ته د یو سند په توګه درناوی لرو، خو د چمن پر دروازه پاسپورټ نه منو، که موږ دا ومنو، زموږ سوداګري، اړیکي او زموږ خپلوی له منځه ځي.»
مولوي محمد یوسف وايي؛ د پاکستان «ظالم» حکومت تر اوسه پورې زموږ مدني حرکت ته هیڅ غاړه نه ده ایښې، بلکې زموږ کاروبار او سوداګري یې سخته زیانمنه کړې ده.
