د تحریک طالبان پاکستان ډله (ټيټيپي) وایي، د خیبر پښتونخوا د کورمې ولسوالۍ مرګوني پېښه د دغې ډلې او نورو وسلهوالو ډلو کار نه دی؛ بلکې په خبره یې په یاده پېښه کې نېغ په نېغه د پاکستان پوځ ښکېل دی.
ملګري ملتونه وایي، ۲۰۲۴ زېږدېز کال د مرستندویانو لپاره مرګونی ګال و چې په دغه کال کې د نړۍ په بېلابېلو برخو کې ۲۸۱ مرستندویان وژل شوي دي.
د سایټ استخباراتو ډلې د جمعې په ورځ وویل، چې د روسیې د واګنر شخصي پوځي قراردادي کمپنۍ لږترلږه اوه جنګیالي په مرکزي مالي کې په یو برید کې وژل شوي دي. د دغه برید مسوولیت په شمالي افریقا کې د القاعدې سره د یوې تړلې ډلې له خوا پر غاړه اخیستل شوی دی.
د امریکا د دفاع وزارت د یو جګپوړي چارواکي په وینا، په سوریه کې د اسراییل په وروستي هوايي برید کې د حزب الله یو جګپوړی قوماندان علي موسی دقدوق ووژل شو چې د عراق د جګړې پر مهال یې پر امریکايي ځواکونو د یو خورا پیچلي برید په پلانولو کې لاس درلود.
اسراییلي ځواکونو د جمعې په ورځ د لبنان پر سویل او د پلازمینې بیروت په څنډو بریدونه وکړل چې په پایله کې یې لږ تر لږه پنځه ډاکټران ووژل. دلبنان په سویل کې د دغو ځواکونو او د حزب الله د وسله والو ترمنځ د ځمکنۍ نښتې راپور هم ورکړل شوی.
د اروپایي کمیسیون مشره اروسولا وان ډیر لاین وایي، چې په شینګن زون کې د رومانیا او بلغاریا د بشپړ غړیتوب په اړه رسمي پرېکړه به ډېر ژر ترسره شي. وان ډیر لاین وویل، چې دغه دواړه هېوادونه د شینګن زون سره تړاو لري.
د پښتونخوا لکي مروت ولسوالۍ کې سرچینو افغانستان انټرنشنل ته وویل چې نن ماښام د لکي مروت کمبېله سیمه کې د پاکستان پېپلز ګوند ځايي مشر مشال ازاد د دوه تنو ناڅرګندو وسلوالو له لخوا په ډزو ووژل شو. سرچینې زیاتوي مشال ازاد هغه وخت وژل شو، چې له جومات څخه د کور په لور روان و.
د پاکستان د پوځ د عامه اړیکو اداره وايي، په پښتونخوا او بلوچستان کې یې استخباراتي عملیاتو سره اوه وسلوال وژلي دي.
د اسراییل د پوځ ویاند ویلي، چې د غزې په شمال بیت لاحیه ښارګوټي کې یې د حماس پنځه جنګیالي وژلي دي.
په پاکستان کې د پولیو دوه تازه مثبتې پېښې ثبتې شوې، چې له دې سره په روان کال کې په پاکستان کې د پولیو د مثبتو پېښو شمېر ۵۲ ته لوړ شو.
د اسراییل د دفاع پخوانی وزیر یواو ګلانټ وایي، چې د نړۍوالې محکمې د پرېکړې له مخې د اسراییل د لومړي وزیر نیول د «اسراییلي خلکو وژلو ته د مشروعیت ورکولو او پر مېرمنو، ماشومانو او بوډاګانو تېري کوونکو ته د جایزې ورکولو مانا لري.»
د خيبر پښتونخوا په کورمې ولسوالۍ کې امنیتي چارواکو پاکستانۍ رسنۍ خراسان ډایري ته ویلي، چې د مساپرو پر موټرو بريد کې د وژل شویو کسانو شمېر ۴۴ ته لوړ شو او ۱۶ نور ټپیان دي.
له هغې وروسته چې د امریکا لویې څارنوالۍ لپاره نوماند مټ ګېټس له خپلې نوماندۍ تېر شو؛ د امریکا منتخب ولسمشر ډونالد ټرمپ د فلوریډا ایالت لویه څارنواله پاملا بانډي د هغه پر ځای د هغه هېواد د لویې څارنوالې په توګه وټاکله.