د منځني ختیځ کړکېچ؛ پر اسراییل د ایران برید

د اسراییل پوځ اعلان کړی، چې په تېرو ۲۴ ساعتونو کې د حزب الله ډلې ۶۰ کسان وژل شوي او د لبنان په سویل کې د یادې ډلې څه باندې ۲۰۰ هدفونه د اسراییلي ځواکونو په هوایي او ځمکني عملیاتو کې په نښه شوي دي.

د قطر امیر شیخ تمیم بن حمد ال ثاني ویلي، هغه څه چې په سیمه کې روان دي "ډله‌ییزه وژنه" ده.
هغه د اسراییل د "معافیت" په اړه خبرداری ورکړی، چې غزه به "په داسې ځای بدله کړي چې اوسېدل به په کې ناشوني" وي.

د لبنان د بهرنیو چارو وزیر څرګنده کړه، چې د حزب الله مشر حسن نصرالله په بیروت کې د اسراییل په برید کې تر وژل کېدو مخکې له لنډمهاله اوربند سره هوکړه کړې وه.

د ایران ولسمشر مسعود پزشکیان ویلي، ایران جګړه او وینه تویېدنه نه غواړي.

هغه دارنګه ویلي، چې په سیمه کې د کړکېچ پراخېدل د امریکا او اروپا په ګټه نه دي.

چین د ملګرو ملتونو له امنیت شورا وغوښتل، چې په منځني ختیځ کې د وضعیت د لا کړکېچن کېدو د مخنیوي لپاره بېړني ګامونه واخلي.

د ملګرو ملتونو سرمنشي انتونیو ګوترېش د ایران له لورې پر اسراییل د توغندیزو بریدونو په غبرګون کې ویلي، چې د ایران له‌خوا د فلسطین د خلکو په ملاتړ دغه ډول بریدونه د فلسطینیانو رنځ نه کموي.

حزب الله ویلي، چې د اسراییل په شمال بیت هیلیل ښار کې یې د دغه هېواد په یوې پوځي چورلکې توغندي وېشي چې له امله یې دغه چورلکه شاتګ ته اړ اېستل شوې ده.

د امریکا ولسمشر جوبایډن پر اسراییل د ایران د توغندیو د بریدونو په ځواب کې د ایران پر اټومي تاسیساتو د اسراییل د بریدونو له ملاتړه ډډه کړې.

رویټرز خبري اژانس د ایراني سرچینو له حوالې ویلي، چې ایت الله خامنه‌یي د اسراییل له بریده څو ورځې وړاندې حسن نصرالله ته د اسراییل پلان په اړه خبرداری ورکړی و او هغه ته یې ویلي و چې له لبنانه ووځي.

د پاکستان د بهرنیو چارو وزارت په منځني ختیځ کې د زیاتېدونکي کړکېچ په اړه ژوره اندېښنه څرګنده کړې ده.

دغه وزارت وایي، چې نړۍواله ټولنه دې په سیمه کې د تاوتریخوالي کمولو لپاره ګړندي ګامونه واخلي.

د حماس د عزالدین قسام پوځي څانګې د سې شنبې په ورځ په تل ابیب کې د ډزو او چاقو برید مسوولیت پر غاړه واخیست، چې په ترڅ کې یې ۷ تنه وژل شوي او ۱۶ نور ټپیان شوي دي.

په برېتانیا کې د سوریې د بشري حقونو د څار ډلې ویلي، چې د چارشنبې په ورځ (د تلې ۱۱مه) د دمشق په لوېدیځ کې د اسراییل په هوايي برید کې لږ تر لږه درې کسان وژل شوي چې دوه یې بهرنیان دي.

د امریکا د بهرنیو چارو وزارت ویاند متیو میلر په ورځني خبري کنفرانس کې ایران ته د ځواب ورکولو لپاره له اسراییل سره د امریکا د احتمالي همکارۍ په اړه وویل، موږ به له اسراییل سره د هغوی د غبرګون په اړه خبرو ته دوام ورکړو.

په ملګرو ملتونو کې د اسراییل استازی ډني ډانون د ایران د اسلامي جمهوریت د توغندیز برید په غبرګون کې وویل، د ایران د اقداماتو له امله به له هغو عواقبو سره مخامخ شي چې دوی یې تصور هم نه کوي.

په ملګرو ملتونو کې د امریکا سفیرې لینډا توماس ګرین فیلډ پر اسراییل د ایران توغندیز برید غندلی او ویلي یې دي، پر دغه هېواد نور بندیزونه هم لګېږي.

په ایران کې د فرانسې سفارت له خپلو اتباعو چې په ایران کې اوسیږي او یا هم دغه هېواد ته تللي، غوښتي چې د هوايي حریم له پرانیستلو او نړۍوالو الوتنو له پېلیدو سره دې سم له ایران څخه ووځي.

د لبنان حزب الله وویل، چې د مارون الراس کلي ته څېرمه یې درې اسراییلي ټانکونه په یوه توغندي ویشتي دي.

د ایټالیا د بهرنیو چارو وزیر انتونیو تاجاني دا خبره رد کړه، چې حکومت به یې د ملګرو ملتونو له ماموریت څخه خپل ځواکونه وباسي.

انټونیو ګوترش د چهارشنبې په ورځ د ملګرو ملتونو امنیت شورا ته ویلي، چې په لبنان کې د هر اړخیزې جګړې مخنیوی خورا اړین دی هغه څه چې ژورې او ویجاړونکي پایلې به ولري.

هغه همدا راز ټینګار وکړ، چې د ملګرو ملتونو د ټولو کارکوونکو امنیت او خوندیتوب باید تامین شي.

یمني محصلین او استادان په پلازمینه صنعا کې سړکونو ته راووتل او پر اسراییل د ایران د برید ستاینه یې وکړه او پر غزې او لبنان باندې د اسراییل د پرله پسې بریدونو پر وړاندې یې لاریون وکړ.

د افغانستان د مخکیني ولسمشر لومړی مرستیال وايي، پر اسراییل د ایران توغندويي بریدونه ښيي، چې تهران پر خپل ځان او ملي ځواک باورمن دی.

د اسراییل د بهرنیو چارو وزیر یسراییل کاتز وايي، هېواد یې انتونیو ګوترش د ایران د پرونۍ ورځې توغندويي برید د نه غندلو له امله «نامطلوب شخصیت» په ګوته کړی او پر ورتګ یې بندیز لګولی.

ډنمارکي رسنۍ وايي، دغه دوه چاودنې نن سهار په پلازمېنه کوپنهاګن کې د اسراییل سفارت ته نږدې شوې، خو مرګ ژوبله یې نه ده اړولې.

د ایران د بهرنیو چارو وزیر عباس عراقچي ویلي، تهران پر اسراییل د ایران د توغندیو له بریدونو وروسته امریکا ته خبرداری ورکړی چې له لاس وهنې ډډه وکړي.

په مسکو کې د اسراییل سفارت ویلي، له روسیې سره د اسراییل اړیکي که څه هم د دواړو هېوادونو تر منځ ژور مخالفتونه شته؛ خو دواړو غاړو ته خورا ارزښتناک دي.

د ملګرو ملتونو د ماشومانو د ملاتړ صندوق پر خپلې اېکس پاڼې لیکلي، چې په لبنان کې د وسله‌والې جګړې د پراخېدو له امله شاوخوا یو مېلیون کسان بې‌ځایه شوي دي.

د اسراییل پخواني لومړي وزیر نفتالي بېنېټ د اسراییل له اوسني حکومته د ایران د توغندیزو بریدونو په ځواب کې پر هغه هېواد د برید غوښتنه وکړه.

د تهران، بیروت، بغداد او غزې په لارو کوڅو کې خلکو په واټونو کې پر اسراییل د ایران توغندیز برید ونمانځه.
د تهران په فلسطین څلورلارې کې په زرګونو کسانو د حزب الله، لبنان او ایران بېرغونه هم رپول.

د امریکا ولسمشر جوبایډن ویلي، چې متحده ایالات د ایران د بالیسټیک توغندیو له بریدونو وروسته د اسراییل بشپړ ملاتړی دی او د تهران برید یې "ماتېدونکی او بې اغېزې" وباله.

پر اسراییل د ایران د ۲۰۰ توغندیو له وېشتلو وروسته د ایران د پوځ لوی درستیز محمد باقري د چهارشنبې په ورځ وویل، د برید په صورت کې به په اسراییل کې د دغه هېواد ټولې زېربناوې په نښه کړي.

د اسراییل پوځ ویلي، چې د حزب الله یو قوماندان محمد جعفر قصیر چې له ایرانه لبنان ته یې د پیسو او وسلو د لېږدولو چارې په غاړه وې، د سې شنبې په ورځ یې په لبنان کې وژلی دی.

د امریکا د دفاع وزیر لویډ استین وایي، چې د اسراییل له دفاع وزیر سره یې د ایران له‌خوا د «ظالمانه تېري» په اړه خبرې کړې.

د اردن د حکومت یوه ویاند محمد مومني ویلي، چې د دغې پېښې په پایله کې درې تنه ټپیان شوي دي.

رویټرز خبري اژانس راپور ورکړی، د فلای دوبۍ شرکت په یوه بیان کې ویلي چې دوی د چهارشنبې او پنجشنبې په ورځو اردن، عراق، ایران او اسراییل ته الوتنې لغوه کړې.

د اسټرالیا لومړي وزیر انتوني البانیز پر اسراییل د ایران برید "خطرناک زیاتوالی" بللی دی.
هغه پر اېکس پاڼه کاږلي، اسټرالیا پر اسراییل د ایران د توغندیو برید غندي.

یوې عراقي ډلې ویلي، که امریکا پرېکړه وکړي، چې پر ایران د اسراییل برید کې د دغه هېواد ملاتړ وکړي، په عراق کې به د امریکا اډې په نښه کړي.

د حوثي وسله والې ډلې ویاند محمد عبدالسلام د ایران د پوځي عملیاتو هرکلی کړی، هغه ویلي دا د فلسطین ملاتړ څرګندوي او په سیمه کې د اسراییل تسلط ننګوي.

د امریکا د ولسمشرۍ نوماند ډونالډ ټرمپ په خپله ټولنیزه شبکه کې لیکلي: "دا جګړه په بشپړه توګه د مخنیوي وړ وه."

نوموړي پر اسراییل د ایران برید ته اشاره کړې ده.

د ایران سپاه پاسداران یوه بیانیه خپره کړې او اعلان یې وکړ، چې که اسراییل د دوی د بالستیک توغندیو برید ته غبرګون وښيي، دا هېواد به بیا په نښه شي.

افغانستان انټرنشنل ته رسېدلې ویډیوګانې ښيي، چې ایران پر اسراییل د بالستیک توغندیو برید کړی او توغندي تر اسراییل رسېدلي دي.

پر اسراییل د ایران توغندیز بریدونه څو شېبې وړاندې پیل شوي او د اسراییلي پوځ د اعلان له مخې؛ په ټول هېواد کې د خطر زنګونه وغږېدل.

یوې لویدیځې سرچینې اکسیوس ته ویلي، چې ښايي ایران پر اسراییل باندې د چټک بالستیک توغندیو سره برید وکړي، نه د ډرون یا کروز توغندیو سره چې د دفاع چمتو کولو او مداخلې لپاره د اوږد وخت ته اړتیا لري.

دا توغندي کولای شي په ۱۲ دقیقو کې اسراییل ته ورسېږي.

په نږدې ختیځ کې د فلسطیني کډولو لپاره د ملګرو ملتونو د مرستې او کار اداره وایي، د راپورونو له مخې په لبنان کې د ۲۰۲۳ کال له اکتوبر راهیسې ۱۶۴۰ کسان وژل شوي، چې یوازې د ۲۰۲۴ کال په سپټمبر کې ۱۰۳۰ کسان وژل شوي دي.

په اسراییل کې د امریکا سفارت خپلو کارکوونکو ته د لوړې کچې خبرداری ورکړی او ورته یې امر کړی، چې پناه ځایونو ته د تګ لپاره چمتووالی ونیسي.

دا د روان کال د اپریل په پای کې پر اسراییل د اسلامي جمهوریت له هوايي برید وروسته لومړی دا ډول حکم دی چې کیږي.

د اسراییل او لبنان تر منځ د کړکېچ په زیاتېدو سره ترکیې، بلجیم او بلغاریا له خپلو وګړو غوښتي چې له لبنان څخه ووځي.

د ایران پخواني ولسمشر محمود احمدي نژاد د ایران پر استخباراتي ادارو د اسراییل موساد د پراخ نفوذ خبر ورکړ.

د ترکیې بهرنیو چارو وزارت نن یوه بیانیه کې پر لبنان د اسراییل ځمکنی برید بې قانونه او نیواکګر ګام وباله.

د ناټو نوي سرمنشي مارک روټه نن د دې تړون د سرمنشي په توګه کار پیل کړ. نوموړي خپله پېژندغونډه کې ووېل، چې د لبنان پرمختیاوې له نږدې څاري.

د اسټرالیا لومړي وزیر په سیډني او ملبورن کې د یکشنبې په ورځ د لاریونوالو له خوا د حزب الله د بیرغ د پورته کولو په غبرګون نن د رادیکالي ایدیولوژۍ په اړه خبرداری ورکړ او د اندېښنې په څرګندولو سره یې په دې هېواد کې پر ټولنیز انسجام ټینګار وکړ.

بلومبرګ د یوې باخبرې سرچینې په حواله لیکلي، چې په سوریه او عراق کې د ایران ملیشې به د حزب الله د منابعو د انتقال لپاره په اصلي کانال بدل شي.
دغې سرچینې زیاته کړې، چې ایران به هڅه وکړي څو خپل زرګونه ځواکونه د لبنان او سوریې سیمه ییزو پولو ته ولېږدوي.

د ایران د بهرنیو چارو وزارت ویاند ناصر کنعاني د دوشنبې په ورځ د اسراییل د پوځ له خوا د حزب الله د مشر حسن نصرالله او د ایران د سپاه پاسدارانو د یوه قومندان عباس نیلفروشان وژل کېدو ته په اشارې وویل، چې دغه هېواد به د اسراییل جنایتونه به بې ځوابه پرېنږدي.

د لبنان د حزب الله ډلې مرستیال له اسراییل سره د مبارزې د دوام ژمنه وکړه او زیاته یې کړه، چې دغه ډله د حسن نصرالله په ګډون د خپلو لوړپوړو قومندانانو له وژنې وروسته د یوې اوږدمهاله جګړې لپاره چمتو ده.

د اروپايي ټولنې د بهرنۍ پالیسي مشر، جوزپ بوریل به د دوشنبې په ورځ د اروپايي ټولنې د بهرنیو چارو له وزیرانو سره نا رسمي ځانګړې غونډه وکړي چې په لبنان کې د تاو تریخوالي د زیاتوالي په اړه د غبرګون په اړه بحث وکړي.

حماس ویلي، چې په لبنان کې د دغې ډلې مشر فتح شریف ابوالامین د دغه هیواد په سوېل کې د اسراییل په یوه هوايي برید کې وژل شوی.

دغې ډلې زیاته کړې، چې په دغه برید کې د شریف ابوالامین د کورنۍ ځینې غړي هم وژل شوي دي.

اسراییلي رسنیو ويلي، د حزب‌الله د اجرایوي شورا مشر هاشم صفي الدین تر حسن نصرالله هم خطرناک قوماندان دی.

دغه خبرې وروسته له هغه کیږي، چې الحدث رسنۍ ویلي و، چې هغه د حسن نصرالله ځای ناستی ټاکل شوی.

په لبنان کې د اسراییل په بریدونو کې د یوې اونۍ په ترڅ کې د حزب‌الله اوه جګپوړي قوماندانان او سیاسي چارواکي وژل شوي دي.

د لبنان حزب‌الله د یوه بیان په خپرولو سره د حسن نصرالله د ځای ناستي د ټاکل کېدو خبر ته غبرګون وښود او ویې ویل چې د ځای ناستي د اعلانولو لپاره باید یوازې د دغې ډلې رسمي خبرپاڼه خپره شي.

د سعودي عربستان د بهرنیو چارو وزارت په یوه بیان کې ویلي چې په لبنان کې بدلونونه له «جدي اندیښنو» سره څاري.

دغه وزارت زیاته کړه چې ریاض د لبنان د واکمنۍ او ځمکنۍ بشپړتیا د ساتلو غوښتونکی دی.

د لبنان د پارلمان غړي او پخواني لومړي وزیر فواد سنیورا د لبنان د حکومت پر پرېکړو باندې د حزب الله واک ته په اشارې سره وویل چې دا نور امکان نه لري.

هغه زیاته کړه چې د لبنان حکومت باید د غزې له شخړې څخه د لبنان د جلا کولو واضح دریځ غوره کړي.

د امریکا ولسمشر جو بایډن ټینګار کړی، چې په منځني ختیځ کې باید د بشپړې جګړې مخه ونیول شي.

بایډن زیاته کړه، چې دی به د اسراییل له صدراعظم بنیامین نتنیاهو سره د منځني ختیځ د پرمختګونو په اړه خبرې وکړي؛ خو دقیقه نېټه یې نه ده یاده کړې.

العربیه خبري شبکې د یوې معتبرې سرچینې له قوله راپور ورکړی، چې د لبنان د حزب الله ډلې د مشر حسن نصرالله د جنازې مراسم د دوشنبې په ورځ (د تلې ۹مه) کېږي.
د اسراییل پوځ د شنبې په ورځ اعلان وکړ، چې د جمعې په ورځ یې د یوه هوایي برید په پایله کې د حزب مشر او یو شمېر نور غړي وژلي دي.

د خوړو نړۍوال سازمان د لبنان له یو میلیون زیانمنو کسانو سره د بېړنیو مرستو د عملیاتو د پیل خبر ورکړ.
دغه سازمان اوسمهال پر هغو بې ځایه شویو د خوړو بستې وېشي، چې په پنډغالي کې دي.

د امريکا د دفاع وزير لويډ اسټن اعلان وکړ، چې د امريکا نور پوځي ځواکونه يې د ځاى پر ځاى کولو لپاره په لوړه کچه چمتو کړي دي.

د سپینې ماڼۍ د ملي امنیت شورا ویاند جان کربي هم ویلي، چې متحده ایالات د حزب الله د رهبرۍ د تشې د ډکولو لپاره کوم ګامونه پورته کوي، څارنه کوي.

د برېتانیا د بهرنیو چارو وزارت په بېروت کې د حزب الله د مشر په ګډون د یادې ډلې پر غړو د اسراییل له برید وروسته له خپلو اتباعو وغوښتل، چې ژر تر ژره له لبنان څخه ووځي.
برېتانیا او یو شمېر نورو هېوادونو تر دې وړاندې هم له خپلو وګړو غوښتي وو، چې له لبنان څخه ووځي.

د خیبر پښتونخوا په پاړه چنار کې ځینو اوسېدونکو د اسراییل له خوا د حزب الله د مشر حسن نصرالله وژنه بزدلانه اقدام او د مسلمانانو لپاره لویه ضایعه وبلله.
د سیمې قومي مشرانو د پاړه چنار پرېس کلپ مخې ته د لاریون پرمهال د اسراییل له تولیداتو سره بایکاټ هم اعلان کړ.

د اسراییل پوځ د یکشنبې په ورځ اعلان وکړ چې د لبنان د حزب الله د مرکزي شورا مرستیال نبیل قاووق د شنبې په ورځ په یوه هوایي برید کې وژل شوی دی.

حزب الله تر اوسه د دې خبر په اړه تبصره نه ده کړې او دا هم نه ده څرګنده چې برید چیرته شوی دی.

د کاناډا د بهرنیو چارو وزارت د اسراییل او حزب الله تر منځ نښتو اندېښنه څرګنده کړه او وویل، چې دغه هېواد د لبنان ملکي کسانو ته د مرستې په موخه ۷،۴ ملیون ډالره ځانګړې کوي.
د کاناډا د بهرنیو چارو وزارت دغه راز د لبنان او اسراییل تر منځ پوله کې د ۲۱ ورځيني اوربند غوښتنه وکړه.

نیویارک ټایمز راپور ورکړی چې د حسن نصرالله له مړینې وروسته د ایران سملاسي لومړیتوب د حزب الله له بیا جوړېدو سره مرسته کول دي

فرانسوي ورځپاڼې لوپاریزین د لبنان د یوې امنیتي سرچینې له قوله ویلي چې د جمعې په ماسپښین د اسراییل حکومت ته د یوه ایراني نفوذي له لوري د بیروت په څنډو کې د لبنان د حزب الله د مشر حسن نصرالله د راتګ خبر ورکړل شو.

د روسیې د بهرنیو چارو وزیر نیویارک کې په یوه خبري غونډه کې د لبنان د حزب الله پر مشر حسن نصرالله د اسراییل برید یوه «سیاسي وژنه» وبلله.

سرګي لاوروف په تهران کې د اسماعیل هنیه وژنې ته په اشارې سره وویل: «سیاسي وژنې تقریبا یو معمول ګرځیدلی دی.»

د لبنان روغتیا وزارت د حزب الله د مشر له وژل کېدو یوه ورځ وروسته وویل چې د شنبې په ورځ د (تلې اوومه) د اسراییل په بریدونو کې لږ تر لږه ۳۳ کسان وژل شوي او ۱۹۵ نور ټپیان شوي.

په ملګرو ملتونو کې د ایران سفیر د امنیت شورا او د ملګرو ملتونو سرمنشي ته یو لیک استولی او له امنیت شورا یې غوښتي چې د اسراییل کړنې په کلکه وغندي.

هغه د ملګرو ملتونو له امنیت شورا وغوښتل چې پر لبنان د اسراییل د بریدونو د څېړلو لپاره بیړنۍ غونډه وکړي.

د سوېلي افریقا د بهرنیو چارو وزارت په یوه بیان کې ویلي چې په لبنان کې د «اسراییل د بې توپیره چاودنو» له امله د ټپیانو کچه د ژورې اندېښنې وړ ده او نړۍواله ټولنه یې سخته غندنه کوي.

سي این این د لوړ پوړو امریکایي چارواکو له قوله ویلي، چې د اسراییل ځمکني ځواکونه ښايي په محدود ډول لبنان ته ننوځي.

د اسراییل د پوځ ویاند پیټر لرنر مخکې ویلي وو چې دوی د ځمکني برید احتمال ته چمتووالی نیسي، خو دغه کار تر یوې ارزونې وروسته ښايي وکړي.

فرانسې پر لبنان د اسراییل د هوایي بریدونو د ژر تر ژره بندېدو غوښتنه وکړه.
فرانسې همداراز وویل، چې په لبنان کې د اسراییل له ځمکنیو عملیاتو سره مخالف دي.

د اسراییل پوځ ویلي، چې د ایران اسلامي جمهوریت پر وړاندې د ټولو احتمالي سناریوګانو لپاره چمتو دي.
د العربیه د راپور له مخې، د اسراییل پوځ د یمن د حوثي اورپکو ګواښونو ته په اشارې سره ویلي: «د حوثیانو وار به هم راورسېږي.»

د افغانستان لپاره د امریکا پخوانی استازی زلمی خلیلزاد وايي، لبنان باید له وخته ګټه پورته کړي او خپل هېواد بیرته په خپل واک کې ونیسي.

خلیلزاد د شنبې په ورځ پر اېکس خواله رسنۍ لیکلي، په منځني ختیځ کې اوسنی وضعیت د لبنان لپاره یو لوی احتمالي فرصت دی.

د امریکا د ولسمشر مرستیالې کامالا هرېس د یوې بیانیې په خپرولو سره حسن نصرالله ترهګر وباله او زیاته یې کړه: «د هغه لاسونه د امریکایانو په وینو لړلي وو.»

د ایران د اسلامي جمهوریت مشر علي خامنه يي د حزب الله ډلې د مشر د وژل کېدو له امله په ایران کې ۵ ورځینی عمومي ماتم اعلان کړ.
خامنه یي حسن نصرالله په اسلامي نړۍ کې با عظمته شخصیت وباله او ویې ویل: «د حسن نصرالله لاره به دوام ولري.»

د اسراییلو پوځ ویلي، چې د حزب الله یو جګپوړی استخباراتي قوماندان حسن خلیل یاسین د بیروت په څنډو کې د نن ورځې په برید کې وژل شوی دی.

د اسراییل پوځ ویلي، چې له یو کس پرته د حزب الله ډلې ټول لوړپوړي قوماندانان وژل شوي دي.
د اسراییل د پوځ په وینا، یوازې د حزب الله د بدر د څانګې قوماندان ابو علي رضا لا هم ژوندی دی.

رویټرز خبري اژانس د عیني شاهدانو په حواله ویلي، چې د اسراییل په مرکز کې د یوې چاودنې غږ اورېدل شوی دی.

د ترکیې ولسمشر رجب طیب اردوغان د شنبې په ورځ پر لبنان باندې د اسراییلو وروستي بریدونه وغندل.

هغه وویل، چې د لبنان د خلکو او حکومت ترڅنګ ولاړ دی او د دغو بریدونو له قربانیانو سره خپله خواخوږي څرګندوي.

د لبنان د حزب الله د مشر حسن نصرالله له وژل کېدو وروسته د سوریې او عراق حکومتونو درې ورځنی ماتم اعلان کړی دی.

د ایران د هوايي چلند د ادارې ویاند حسام قربان علي بیروت ته د ایران د هوايي شرکت د الوتنو د ځنډولو اعلان وکړ.

قربان علي د شنبې په ورځ وویل: «د لبنان د بیروت د رفیق حریري هوايي ډګر ته د ایران د هوايي شرکت ټولې الوتنې تر دويمې خبرتیا پورې لغوه شوې دي.»

د ایران د کلتور او اسلامي ارشاد وزارت د موسیقۍ ادارې اعلان وکړ، چې د لبنان د حزب الله د عمومي منشي حسن نصرالله د مړینې له امله به په ایران کې د موسیقۍ ټول پروګرامونه تر دويمې خبرتیا پورې وځنډول شي.

د ایران ولسمشر مسعود پزشکيان د اسنادو له وړاندي کولو پرته ادعا کړې، چې امریکا د لبنان د حزب الله د مشر حسن نصرالله د وژلو امر کړی دی.

د اسراييلو د دفاع وزير يوف ګالانت وويل، د حزب الله مشر نصرالله يو ګواښ و.

د لبنان حزب الله ډله وايي، د دوی مشر حسن نصرالله وژل شوی دی.

تر دې مخکې د اسراییل پوځ وویل، چې حسن نصرالله یې پرون د لبنان د پلازمېنې بېروت په څنډه کې وژلی دی.

د اسراييل پوځ د شنبې په ورځ ويلي، چې د حزب الله مشر سید حسن نصرالله یې د بيروت په جنوبي څنډه کې، د دې ډلې پر مرکزي دفتر په يوه هوایي بريد کې وژلی دی.

د لبنان روغتیا وزارت وايي، په یوه اونۍ کې د اسراییل برید کې د ماشومانو او ښځو په ګډون ۷۲۰ کسان وژل شوي او له دوو زرو ډېر ټپي شوي دي.

د ایران د حکومت مذهبي مشر علي خامنه يي، د لبنان د وروستیو پېښو په تړاو پیغام خپور کړ، خو په دې پیغام کې د حزب الله د مشر حسن نصرالله مرګ یا ژوند ته اشاره نه ده شوې.

رویټرز خبري اژانس وايي، د ایران د حکومت مذهبي مشر علي خامنه يي سختو امنیتي تدبیرونو کې امن ځای ته لېږدول شوی دی.

دا اژانس وايي، د ایران حکومت د حسن نصرالله له وژل کېدو وروسته د راتلونکي ګام لپاره له خپلو نیابتي ډلو سره په تماس کې دی.

د اسراییل پوځ وایي، چې د جمعې په ورځ یې په بیروت کې د حزب الله مشر حسن نصرالله په یوه برید کې وژلی دی.