په متحده ایالاتو کې مېشت هغه افغانان چې د کډوالو د لنډمهالي پروګرام له مخې ځای پر ځای شوي، د ډونالډ ټرمپ د حکومت لهخوا د (ټي پي ایس) پروګرام د لغوه کېدو له امله له بې برخلیکۍ سره مخ شوي دي. همداراز، په ځینو سیمو کې د افغانانو نیول هم پیل شوي دي.
د خېبر پښتونخوا حکومت وايي، چې د افغان کډوالو د جبري بېرته ستنولو دویم پړاو په ترڅ کې یې تر دې دمه له تورخم لارې ۴۲ زره او ۴۸ افغانان جبري افغانستان ته ستانه کړي دي.
د پاکستان کورنيو چارو وزارت سلاکار طلال چودري وايي، دغه هېواد د اپرېل مياشتې له پیلېدو راهیسې له ۸۰ زره ډېر افغانان ایستلي دي.
له پاکستان څخه د افغان کډوالو د جبري ایستلو په روانو پراخو عملیاتو کې داسې کسان هم ایستل کېږي، چې په ټول ژوند یې افغانستان نه دی لیدلی. عرب نیوز له داسې دوو افغان وروڼو سره مرکې کړې، چې په پنجاب کې زیږېدلي او هلته لوی شوي دي.
د عوامي نشنل ګوند مشر ایمل ولي خان د پاکستان لهخوا د افغان کډوالو جبري بېرته ستنولو په اړه د پاکستان په حکومت نیوکې کړي او ویلي یې دي، چې پاکستان دې افغان کډوالو ته د تابعت د ورکولو په موخه پالیسي جوړه کړي او دوی ته دې تابعت ورکړي.
د کډوالو ستونزو ته رسیدو په برخه کې د طالبانو عالي کمیسیون وايي، تېره ورځ له پاکستان او ایران څخه ۵۴۷۱ افغان کډوال راستانه شوي.
د پښتون ژغورنې غورځنګ مشر منظور پښتین له پاکستان څخه د افغان کډوالو د جبري ایستلو په غبرګون کې د پښتونخوا په ګډون په یو شمېر هېوادونو کې د پراخو لاریونونو خبر ورکړی دی.
د پاکستان د جماعت اسلامي ګوند پخوانی مشر سراج الحق وایي، د پاکستان حکومت د ناوړه چلند له امله هغه کډوال چې د پاکستان له خلکو سره دوستانه اړیکې لري؛ هغه به په مخالفت او دښمنۍ واړوي.
په تورخم ښارګوټي کې له پاکستان نه په جبري توګه ستانه شوي افغان کډوال په پاکستان کې له دوی سره له شوي چلنده شکایت لري او وایي، چې طالبان هم ورته په سمه توګه رسېدنه نه کوي. دوی وايي، د پاکستاني پولیسو له بد چلند هاخوا طالبان هم په ښه سترګه نه ورته ګوري.
د طالبانو کډوالو او بېرته راستنېدونکو چارو وزارت د افغانستان لپاره د ناروې د شارژدافیر پير البرټ الساس په حواله خبر ورکړی، چې د ناروې حکومت د نړۍوالو بنسټونو له لارې د افغان کډوالو لاس نیوي ته دوام ورکوي.
د پاکستان حکومت د چهارشنبې په ورځ (د وري ۲۷مه) د تورخم له لارې ۱۲۷۵ افغان کډوال په جبري توګه افغانستان ته استولي دي. راپورونه وايي، چې یاد شمېر کسان د ۲۴۳ کورنیو غړي دي.
په اسلام اباد کې افغان خبريالان وایي، چې فرشته سدید د حاجي کمپ په نوم له میشتغالي څخه له دوو ورځو بند وروسته نن خوشې او خپل استوګنځي ته ستنه شوه. هغه د دوشنبې په ورځ پاکستاني پوليسو په اسلام اباد کې له خپل کوره نيولې او د جبري ستنولو په موخه يې دغه کمپ ته لېږدولې وه.
د کډوالۍ نړۍوال سازمان وایي، چې د ۲۰۲۳ کال له سپتمبر راهیسې افغانستان ته تر یو میلیون ډېر کډوال له ایران او پاکستان څخه ستانه شوي دي. د پاکستان حکومت د ۲۰۲۳کال په اکټوبر میاشت کې ویلي و، چې پلان لري په درېیو پړاوونو کې افغانان له دغه هېواده وباسي.
د طالبانو د کور او ښار جوړولو وزیر شېخ حمدالله نعماني د کډوالو لپاره د ښارګوټو جوړولو عملیاتي چارو کمېټې مسوولینو سره په کتنه کې وویل، چې په جبري توګه راستنېدونکو کډوالو ته دې ژر تر ژره د دایمي استوګنې زمینه برابره شي.
د پاکستان حکومت د رسمي شمېرو له مخې، دغه هېواد د سېشنبې په ورځ د تورخم له لارې ۱۴۱۱ افغان کډوال افغانستان ته په جبري ډول لېږلي دي. راپورونه وايي، چې یاد کسان د ۲۵۲ کورنیو غړي وو.
د کډوالو نړېوال سازمان وايي، چې ایران او پاکستان په تېرو ۲۲ میاشتو کې دوه میلیونه او ۴۳ زره هغه افغان کډوال له خپلو هېوادونو ایستلي، چې د اوسېدو اسناد يې نه درلودل. سازمان زياتوي، چې دغو هېوادونو ۵۴ سلنه کډوال په جبري توګه شړلي دي.
د طالبانو د کډوالو او بېرته راستنېدونکو چارو وزارت ویلي، چې د پاکستان له بېلابېلو زندانونو ۳۰۰ افغان کډوال خوشې شوي او بېرته افغانستان ته ستانه شوي دي. له دې سره په تېرو اوو ورځو کې د پاکستان له زندانونو د خوشې شویو افغانانو شمېر تر ۸۰۰ هم واوښت.
د ملګرو ملتونو د وګړو صندوق وایي، چې د روان کال د اپرېل له پیل راهیسې له پاکستان څخه د افغان کډوالو د جبري ستنېدنې د دویم پړاو پرمهال ۱۷ مېرمنو په صفري نقطو کې په خوندي ډول ماشومان زېږولي دي.
د پاکستان حکومت د رسمي شمېرو له مخې، یوازې د تېرې دوشنبې په ورځ (د وري میاشتې ۲۵مه) د تورخم له لارې د پاکستان حکومت ۳۲۴۲ افغان کډوال په جبري توګه افغانستان ته ستانه کړي دي.
د ډان ورځپاڼې د راپور له مخې، په پاکستان کې د مېشتو افغان کډوالو د ټولنې مشر محمد تادین خان تره کي د دغه هېواد په فدرالي حکومت غږ کړی، چې په جبري توګه د افغان کډوالو ایستل د ستونزو حللاره نه ده، حکومت دې د متقابل تفاهم او خبرو له لارې ستونزې حل کړي.
د سره صلیب نړۍوالې کمېټې ویلي، د افغان کډوالو جبري بېرته ستنول به په افغانستان کې بشري ناورین رامنځته کړي. دغې کمېټې زیاته کړې، د سرې میاشتې نړۍوالې ټولنې سره په شریکه غواړي چې د افغاني سرې میاشتې ټولنې سره مرسته وکړي، څو د ۵۰ زره افغان کډوالو اوږد مهاله اړتیاوي پوره کړي.
ایران هغو افغانانو ته د اېستلو ګواښ کړی، چې د جمهوریت له سقوط وروسته دې هېواد ته کډوال شوي دي. ایراني چارواکو افغان کډوالو ته خبرداری ورکړی، چې تر پنځلسو ورځو دا هېواد پرېږدي او افغانستان ته ستانه شي.