رویټرز خبري اژانس وايي چې امریکا په افغانستان کې تر زلزلې یوه اوونۍ وروسته هم له زلزلهځپلو سره مرسته نهده کړې. د واشنګټن دغه دریځ د ملګرو ملتونو استازي او ځيني پخواني امریکايي چارواکي هم حیران کړي، ځکه دغه هېواد به پخوا په بحراني حالت کې تر هر چا مخکې و.
نږدې یوه اوونۍ مخکې د افغانستان په ختیځ ولایتونو کې زلزلې تر ۲۲۰۰ ډېر خلک مړه او لسګونه زره نور يې بېکوره کړل، خو د امريکا حکومت تر اوسه هم له زلزله ځپلو سره مرسته نهده کړې.
دوو پخوانیو لوړ پوړو امریکايي چارواکو رسنیو ته ویلي دا روښانه نهده چې امریکا په راتلونکې کې له زلزلهځپلو سره د مرستو نیت لري او که نه.
د امريکا د بهرنيو چارو وزارت د دوشنبې په ورځ د يوه پيغام له لارې په افغانستان کې د زلزلې له امله خواشيني څرګنده او یوازې یې په همدې یوه پيغام بسنه وکړه.
د امریکا یوه پخواني چارواکي رسنیو ته د نوم نه ښودلو په شرط وویل: «د امریکا دولت د دغسې لوی ناروین په اړه معمولا په ۲۴ ساعتونو کې د مرستو اعلان کوي.»
کله چې د افغانستان د زلزلې په اړه د امریکا د بهرنیو چارو له وزیر څخه پوښتنه وشوه، چې ایا تاسې به افغانستان ته بېړنۍ مرستې واستوئ، هغه یې په ځواب کې وویل: «موږ دا مهال د اعلان لپاره څه نه لرو.»
د ملګرو ملتونو د مرستو مشر ټام فلېچر د یوې اعلامیې له لارې وويل: «د ټرمپ ادارې تر اوسه د نړۍوالې ژغورنې کمېټې (IRC) هغه غوښتنې ته ځواب نه دی ويلی چې تر لومړۍ زلزلې وروسته دې د امريکا په مالي ملاتړ د ۱۰۵ مېلیونو ډالرو په ارزښت طبي توکي افغانستان ته واستوي.»
هغې زياته کړه: «دا توکي په ګودامونو کې بند پاتې دي. زماپه وروستیو کلونو کې نه یادېږې چې امریکا دې په يوه داسې بحراني حالت کې هېڅ غبرګون نه وي ښودلی.»
د افغانستان لپاره د ملګرو ملتونو پراختيايي پروګرام استازي سټيفن روډريګز د جمعې په ورځ خبريالانو ته وويل: «موږ لیدلي چې په افغانستان کې د زلزلې له امله د انساني تلفاتو تر څنګ، د ژوند زیربناوي هم ویجاړې شوي دي.»
هغه زياته کړه چې که څه هم د برېتانيا، سوېلي کوريا، اسټراليا، هند، پاکستان، ايران، ترکيې او نورو هېوادونو مرستې رارسېدلي، خو نورو مرستو ته هم اړتیا ده.
دا په داسې حال کې ده چې امریکا همدا نن (شنبه) د پاکستان له سېلابځپلو سره خپله مرسته د دغه هېواد پوځ ته وسپارله.
