طالبانو د کابل په ګډون په ۲۰ ولایتونو کې د سیلابونو راوتلو اټکل کړی
د طالبانو د انرژۍ او اوبو وزارت د دوشنبې په ورځ د افغانستان په ۲۰ ولایتونو کې د سېلابونو د راوتلو او د سیندونو د سطحې لوړېدو په اړه خبرداری ورکړی، چې کابل هم پکې شامل دی.
دغه وزارت ویلي چې د روان کال د غويي له۹مې تر ۱۱مې پورې، د اقلیمي بدلونونو او د هیواد د هوا پېژندنې ریاست او نړیوالو اړوندو ادارو د وړاندوینې له مخې د سختو ورښتونو او واورې ورېدو او د هغو په پایله کې د نیزونو راوتلو احتمال دی.
د کابل ترڅنګ په بدخشان، هلمند، تخار، بغلان، سمنګان، بامیان، بلخ، جوزجان، پنجشیر، نورستان، لغمان، لوګر، میدان وردک، پکتیا، خوست، دایکندي، ارزګان، فاریاب او غور ولایتونو کې د بارانونو او د سیندونو د سطحې لوړېدو په اړه خبرداری ورکړل شوی دی.
طالبانو د مختلفو ولایتونو اوسېدونکو ته ویلي چې د طبيعي افتونو د خطرونو او مرګ ژوبلې او مالي زیانونو د مخنیوي لپاره جدي تدابیر ونیسي او له سیندونو سره نږدې ونه اوسیږي
دا غوښتنه په داسې حال کې شوې چې افغانستان، د اقلیمي بدلونونو پر وړاندې د زیانمنو هیوادونو په توګه په تیرو دریو کلونو کې له زلزلو او مرګونو سېلابونو سره مخ شوی. دغو طبيعي پېښو خلکو ته پراخ ځاني او مالي زیانونه اړولي او ناروغۍ ورسره ډېرې شوې دي.
د کډوالو نړیوالې ادارې (IOM) د معلوماتو له مخې، له ۲۰۲۱ څخه تر ۲۰۲۴ پورې په افغانستان کې نږدې درې میلیونه کسان د اقلیمي بدلونونو له امله د خپلو کورونو پریښودلو ته اړ شوي دي.
یوازې په تېره یوه کال کې شاوخوا ۹ میلیونه افغانان مستقیم د اقلیمي بدلونونو له خطرونو سره مخ شوي دي.
