کینیا کې یوه نادره پېښه؛ د کینیا حکومت د نایابه مېږیانو د قاچاق مخه نیولې ده
د کینیا د ځنګلي ژویو ادارې (KWS) ویلي، د زرګونو ژوندیو مېږيو د قاچاق په تور یې هغه څلور کسان نیولي چې غوښتل یې نایابه مېږیان له کینیا څخه د بهرنیو نایابه حیواناتو بازارونو ته ولېږدوي.
چارواکو ویلي، چې دغه کسان به د ځنګلي ژویو د غیرقانوني قاچاق په تور محکمې ته وړاندې شي او دا قضیه یوه لویه لاسته راوړنه بلل شوې ده.
دا مېږي په داسې ټیوبونو او سرنجونو کې ځای پر ځای شوي وو، چې امنیتي سکینرونو هم نه شو کولی چې ویې پېژني.
د ځنګلي ژویو ادارې ویلي: "دا ټیوبونه داسې ډیزاین شوي وو چې مېږي تر دوو میاشتو پورې پکې ژوندي پاتې شي، دا ښيي چې دا کار له مخکې څخه په مهارت پلان شوی دی."
سره له دې چې ډېری خلک مېږي یو مزاحم موجود بولي، خو ځینې خلک یې د نندارې او ساتنې لپاره د شفافو ښیښو په بکسونو (Formicarium) کې ساتي، تر څو د دوی ټولنیزې شبکې او کالونۍ له نږدې وویني.
د رویټرز د راپور له مخې، چارواکو شاوخوا ۵۰۰۰ د مېږیو ملکې نیولي، چې د ۲۲۴۴ کانتینرونو په دننه کې ځای پر ځای شوې وې.
د دغو مېږیو ارزښت نږدې یو مېلیون کینیایي شیلینګ (شاوخوا $۷۸۰۰) اټکل شوی.
د راپور د معلوماتو له مخې، دوه بلجیمي وګړي، یو ویتنامي او یو کینیايي د مېږیو د غیرقانوني قاچاق او ملکیت جرمونه منلي او د نایروبي په جومو کینیاټا نړۍوال هوايي ډګر کې محکمې ته حاضر شوي دي.
د مېږیو د سوداګرۍ یوې سرچینې ویلي، دا ډول مېږي چې یوازې په کینیا کې موندل کېږي، تقاضا یې ډېره او د قانوني صادراتو لپاره د ژویو د ساتنې ادارې جواز او روغتیایي سند ته اړتیا لري.
