محمود خان اچکزی د پاکستان پوځ ته؛ د انګریزانو مزدوران دې موږ ته د ازادۍ مانا نه راښيي
د پښتونخوا ملي عوامي ګوند مشر محمود خان اڅکزي د پاکستان پوځ ته په اشار ویلي چې د انګریزانو له پوځ سره یوځای د افغانستان اشغال کوونکي دې موږ ته د ازادۍ مانا نه راښيي.
نوموړي دا خبرې د پنجشنبې په ورځ په سوېلي پښتونخوا پښين کې کړي.
د سوېلي پښتونخوا په پښین غونډه کې محمود خان اڅکزي د پاکستان پوځ تورن کړ چې ټاکنو کې یې درغلي کړې او په بې شرمۍ یې د خلکو رای غلا کړي.
اڅکزي وویل: «ځینې جنرالان شکایت کوي چې زموږ خبرې سختې دي، ایا کوم جنرال کولای شي چې په قرآن باندې لاس کیږدي او ووایي چې ټاکنو کې درغلي نده شوې؟ پوځ د هر هېواد سترګې دي. موږ لېوني نه يو چې د پوځ پر ضد یوو، خو کله چې تاسو د غله حکومت، قاچاقبرو او ظالمانو ملاتړ کوئ، بايد ووايو مرده باد هر سرتېری مرده باد.»
نوموړي په دغه وینا کې ویلي چې د پاکستان تېرې ټاکنۍ عمران خان ګټلي او د تحریک انصاف ګوند په شاه هېڅ ګوند دومره ستر قومي ملاتړ نلري.
محمود خان شهباز شریف ته وویل: « تاسو ویلي و، چې ترهګري به له منځه وړئ. د فېبرورۍ په اتمه چې تاسو د ۲۵ کروړه خلکو سره دوکه وکړه او رای مو ورته غلات کړې دا د ترهګرۍ ترټولو لوی عمل نه دی؟ تاسو ترهګر یاست. هغه جنرال چې ستا ملاتړ یې وکړ ترهګر دی، هر چا چې په دې غلا کې ستا ملاتړ وکړ هغه ترهګر دی.»
نوموړي په دغه غونډه کې همدا راز د پاکستان پوځ ته په اشارې وویل: «موږ د هېچا سپکاوی نه کوو، خو کله چې موږ د خپل هېواد لپاره د انګریزانو پر وړاندې جنګ کوو، تاسو د دوی مزدوران وئ. هغوی چې د انګرېزانو له پوځ سره یو ځای شول او افغانستان یې اشغال کړ، ایا موږ ته به د ازادۍ معنا روښانه کړي؟»
د پاکستان د قانون ساتنې غورځنګ په نوم د حکومت مخالف شپږو ګوندونو اتحاد او د پښتونخوا ملي عوامي ګوند مشر محمود خان اڅکزي د عمران خان ګوند تحریک انصاف سره نږدې اړیکې لري چې دغې ګوند نوموړی د تېرو ټاکنو وروسته د پاکستان ولسمشرۍ ته هم نوماند کړی وو، نوموړی په دې باور دی چې د پاکستان ټاکنو کې پوځ د شهباز شریف په ګټه درغلي کړې.