طالبانو په کابل کې د نشه يي توکو د پلور او لېږد په تړاو ۲۹ تنه نیولي
د طالبانو کورنیو چارو وزارت ویلي، چې د کابل په بېلابیلو سېمو کې يې ۲۹ کسان د نشه یي توکو د پلور، کارولو او لېږد په تړاو نيولي. دغه وزات په يوه خبرپاڼه کې زياتوي، چې له نیول شويو کسانو سره یې دوه زره ۵۷۱ کیلو ګرامه چرس، یو کیلو تاریاک او ۱۵۶۸ د نشه يي توکو ګولۍ نيولي دي.
د طالبانو کورنیو چارو وزارت د نشه يي توکو پر وړاندي د مبارزې معینیت د پنجشنبې په ورځ په یوه خبرپاڼه کې زياتوي، چې دغه ۲۹ کسان یې د کابل په بیلابیلو سیمو کې د عملیاتو پر مهال نیولي دي.
د دوی د معلوماتو له مخي، نیول شوي کسان به تر پوښتنو وروسته اړوندو ادارو ته وسپارل شي.
که څه هم د طالبانو مشر د یوه فرمان له مخې د نشه یي توکو پر کر، تولید او خرڅلاو بندیزونه لګولي، خو ویل کیږي د طالبانو یو شمېر سیمه ییز قوماندانان د نشه يي توکو پر قاچاق بوخت دي.