پخوانی پاکستانی سناتور: طالبان نه مسلمانان او نه هم وروڼه دي
د پاکستان پخوانی سناتور او د لومړي وزیر سلاکار مصطفی نواز کهوکهر وايي: «طالبان نه مسلمانان او نه هم وروڼه دي.» نوموړي د نجونو زدهکړو او د ښځو پر وړاندې د طالبانو اقداماتو ته په اشارې ټینګار کړی، دغې ډلې د «اسلام څېره بدنامه» کړې ده.
نوموړي پخواني سناتور د طالبانو په تړاو د ځینو پاکستاني چارواکو پر څرګندونو هم نیوکه کړې او وايي: «زما په اند، دوی نه وروڼه دي او نه مسلمانان. دوی د اسلام داسې څېره ښيي چې ان نجونو ته د زدهکړې اجازه نه ورکوي؛ په همدې اساس دوی د دې لایق نه دي چې ځان اسلامي وګڼي.»
هغه همداراز، د طالبانو او پاکستاني پلاوي ترمنځ د جون میاشتې مذاکراتو په اړه زیاته کړې :«که دا ومنو چې تاسو [طالبان] کولای شئ زموږ هر څومره خلک ووژنئ، ستاسې لاسونه د بېګناه خلکو پر وینو سره وي او بیا هم تمه لرئ چې موږ له تاسې سره د مذاکراتو مېز ته کېنو، دا ډول مذاکرات نهشي بریالي کېدای.»
دا څرګندونې داسې مهال کېږي، چې تېره میاشت کابل ته د افغانستان لپاره د پاکستان ځانګړي استازي محمدصادق له سفر وروسته دواړو لورو د افغانستان په خاوره کې د ټيټيپي د پټنځایونو د شتوالي او همداراز ټرانزیټ او اقتصادي موضوعاتو په هکله د مذاکراتو د بیاپېلېدو هڅې پیل کړې دي.
د یادونې ده، چې په پاکستان کې د وسلهوالو وروستیو بریدونو زیاتوالي، په ځانګړې توګه بلوچستان ایالات کې پر جعفر اېکسپرېس اورګاډي د وروستي برید له امله د طالبانو د پاکستان اړیکې تر بل هر وخت ډېرې پيکه شوې دي.