امریکا ته د تګ په تمه افغانه نجلۍ: هیله لرم، چې د کډوالۍ ځنډول شوی بهیر به بیا پیل شي
ګارډین ورځپاڼې په پاکستان کې له مېشتې یوې ۲۴ کلنې افغانې نجلۍ سره مرکه کړې، چې امریکا ته د تګ په تمه ده . یادې ورځپاڼې ته هغې د خپل راتلونکي په اړه ویلي:« زه هیله لرم، چې د کډوالۍ ځنډول شوی بهیر به بیا پیل شي.»
دغې افغانې کډوالې له ګارډین سره په خبرو کې ویلي، چې هغه غواړي جراحه شي او په امریکا کې د زدهکړو لپاره یې خپل ټول پلانونه جوړ کړي وو.
هغې ګارډین ورځپاڼې سره په مرکه کې ویلي: «زه هیله لرم، چې په راتلونکي کې به ډاکټره شم. زه نه پوهېږم، چې دا به شونې وي کنه؛ خو بیا هم زه ورته هیلهمنه یم.»
هغه وایي، ښځې ځواکمنې دي؛ که وغواړي یو څه وکړي نو هغه یې خامخا کولای شي.
خو دمګړۍ نوموړې د خپلو هیلو پوره کولو څرک نه ویني؛ ځکه چې نوموړې له خپلو دوه خوېندو، یو ورور او مور سره په اسلام اباد کې په وېره کې شپې سبا کوي، چې ګوندې پولیس به یې ونیسي او بېرته به یې د طالبانو تر واکمنۍ لاندې افغانستان ته ولېږدوي.
نه یوازې دا چې د طالبانو لهخوا په افغانستان کې د یوې نجلۍ په توګه د هغې ژوند محدود شوی؛ بلکې د عیسویانو په توګه د هغې ټوله کورنۍ د مرګ له ګواښ سره مخ ده.
د هغې کورنۍ د ملګرو ملتونو د کډوالو ادارې اسناد هم لري، چې دا ثابتوي چې دوی پناه غوښتونکي دي او دوی امریکا ته د تګ په تمه دي.
که څه هم د ټرمپ ادارې پرېکړې د کډوالو پروګرامونه ځنډولي؛ خو په ټکزاس کې یوې رضاکارې ډلې د دوی د هرکلي لپاره له میاشتو راهیسې چمتووالی نیولی دی.
هغه وایي: «د پاکستان پولیسو لپاره زموږ د ملګرو ملتونو اسناد مهم نه دي. پولیس هره ورځ زموږ کور ته راځي. دا زموږ لپاره ډېره ستونزمنه ده.»
هغه وایي: «په وروستیو ورځو کې موږ د وېرې له امله شپې په وېښه سبا کړې دي.»
دغه کورنۍ له تېرو درېیو کلونو راهیسې په پاکستان کې امریکا ته د تګ لپاره په تمه ده.
څو میاشتې وړاندې داسې انګېرل کېدل، چې دغه کورنۍ به ډېر ژر ختیځ ټکزاس ته انتقال شي.
د ټکزاس د رضاکارانو د یوې ډلې غړي جسټین ریس ویلي:« هرڅه ښه روان وو او موږ هم د دغه کورنۍ د هرکلي لپاره بشپړ چمتووالی نیولی و.»
خو یو ناڅاپه د امریکا ولسمشر ډونالډ ټرمپ لهخوا د کډوالۍ اړوند اجرایوي فرمانونه لاسلیک او د کډوالو لپاره د (USRAP) پروګرام تر درېیو میاشتو وځنډېده.
ریس په دې تړاو وویل: «دا په انفرادي ډول د دوی لپاره ډېر زیان رسوونکې پرېکړه ده او دا زما په اند د متحده ایالاتو راتلونکي امنیت ته هم زیان رسوونکې ده.»
په دې لړ کې د امریکا یو فدرال قاضي په لنډمهاله توګه د کډوالو په برخه کې د ټرمپ د بندیز لګولو مخه ونیوله او هغه کسان چې د بیا مېشتېدنې په درشل کې دي، دا د هغوی لپاره یو زرغون څراغ دی؛ خو ښایي دا یوازې د هغو کسانو لپاره وي، چې غوښتنلیکونه یې مخکې تر مخکې منل شوي او کارونو کې یې پرمختګ شوی.
دغه کورنۍ چې د امنیتي لاملونو له امله یې هویت نه دی په ډاګه شوی، له شیعه مذهبي اسلام څخه عیسویت ته تر اوښتو وروسته د خپلو ګاونډیانو لهخوا په نښه شوې، وهل شوې او ډېر ځله کډه کولو ته اړ اېستل شوې وه.
د دغې کورنۍ یوه لور وایي: «موږ ته خپل هېواد ډېر یادېږي. موږ خپلو تېرو وختونو پسې خپه یو؛ خو له بده مرغه موږ بېرته نشو ستنېدای، ځکه چې زه له طالبانو ډېرې بدې خاطرې لرم او دا ما غمجنوي.»
د هغې کورنۍ د ۲۰۲۳ کال په وروستیو کې په اسلام اباد کې د ریس سره په شخصي توګه ولیدل.
له دغې کورنۍ سره تر پېژندلو وروسته نوموړي غوښتل، چې دغه کورنۍ خپلې ټولنې ته راولي.
نوموړې وایي: «دا زما د کورنۍ لپاره یو ښه زېری و. په ټکزاس کې موږ کولای شو خپلو زدهکړو ته دوام ورکړو او موږ کولای شو پرته له کومې اندېښنې خپل ژوند ته دوام ورکړو.»
خو د ټرمپ پرېکړې یو وار بیا د دغې کورنۍ د تګ هڅې په اوبو لاهو کړې دي.
هغه وایي:« زه له غوسې پرته په دې اړه خبرې کول ګران ګڼم؛ ځکه چې زه احساس کوم دغه پرېکړه یوازې غیر ضروري او زیان رسونکی نه؛ بلکې له ستراتیژیک اړخه هم بې ګټې وه.»
هغه چې د ټرمپ پرېکړې اندېښمنه کړې، وایي:« زه هیله لرم، چې دغه بهیر به بیا له سره پیل شي.»