د افغان کډوالو د اېستلو لړۍ پیل؛ طالبانو د کډوالو د هرکلي لپاره چمتووالی نه دی نیولی

پاکستاني رسنیو خبر ورکړی، چې له پاکستانه د افغان کډوالو د اېستلو لړۍ نن پیلېږي؛ خو له تورخم څخه ځایي سرچینې وایي، چې طالبانو د افغان کډوالو د ستنېدو لپاره تابیاوې نه دي نیولې.

که څه هم په ننګرهار ولایت کې د طالبانو د کډوالو او بېرته راستنېدونکو چارو مشر باز محمد عبدالرحمان ویلي، چې د کډوالو د راتګ لپاره یې په دې برخه کې بشپړ چمتووالی نیولی.
هغه د روژې په ۲۸مه له رسنیو سره په خبرو کې ویلي و، پنډغالي یې جوړ کړي، د مرستندویه موسسو په همکارۍ یې ورته د لومړنیو او خوراکي توکو مرسته، خپلو سیمو ته د کډوالو د لېږدولو په موخه د ترانسپورتي اسانتیاوو، سرپناه او لنډمهاله کاري زمینې برابرې کړې دي.
خو سرچینې وایي، چې اوس‌مهال په تورخم کې د کډوالو لپاره شاوخوا دوه سوه خېمې فعالې دي؛ خو تر دې وړاندې د دغو خېمو شمېر شاوخوا ۸۰۰ ته رسېدو.
دا په داسې حال کې ده، چې د پاکستان حکومت له‌خوا د بې اسناده او اې سي سي کارت لرونکو افغان کډوالو لپاره ورکړل شوې موده دوه ورځې وړاندې پای ته رسېدلې وه؛ خو د اختر رخصتۍ له امله دغه لړۍ ځنډېدلې وه.
خو طالبانو له دغې مودې د دوو ورځو په تېرېدو هم د کډوالو د بېرته ستنېدو لپاره کوم ځانکړی چمتووالی نه دی نیولی.
د جنګ ورځپاڼې د راپور له مخې، په پښتونخوا کې د راجستر شویو افغان کډوالو شمېر ۷۰۹،۲۷۸ دی چې هلته کډوال په ۴۳ پنډغالو کې مېشت دي.

راپور کې راغلي، په دغه پنډغالو کې ۳۴۴،۹۰۸ افغانان ژوند کوي او د هغو افغان کډوالو شمېر چې د اې سي سي کارتونه لري ۳۷۷،۶۴۷ دی.
له پښتنوخوا څخه بیا دغه ۳۷۷۶۴۷ کډوال د تورخم له لارې افغانستان ته ستانه کېږي؛ خو د دغه شمېر لپاره ۲۰۰ خېمې بسنه نه کوي.
له بل پلوه په پاکستان کې د کډوالو ملاتړ ادارې «JAC» ویلي، په ګجرات کې د یو کلي ټول اوسېدونکي اړ شول چې له دغه سیمې ووځي او په زور افغانستان ته ستانه شي.
د دغه بنسټ په وینا، کورنیو ته ان اجازه نه وه ورکړل شوې چې د خپل کور سامان راټول کړي.
دغه بنسټ ادعا کړې، چې په ګجرات کې د پاکستان ناقانونه توقیف ځایونو کې څو افغانې کورنۍ پرته له کومې قانوني قضیې له څه مودې راهیسې ساتل شوې دي.
دغه بنسټ پر اېکس پاڼه کاږلي، چې اساسي قانون په پاکستان کې مېشت هر کس ته د قانوني مشورې او عادلانه محکمې حق ورکوي؛ خو د افغان کډوالو د بندیانولو دغه مرکزونو ته د وکیلانو نه لاسرسي سره پاکستان د خپل اساسي قانون څخه سرغړونه کوي.
دغه بنسټ زیاته کړې ده، د بشري حقونو افغان فعال عزت الله بخشي چې (د مارچ په ۳۱مې نېټې) په اسلام اباد کې نیول شوی و اوس په حاجي کمپ کې په ناقانونه توګه بندي دی.
د دغه بنسټ په وینا، وکیلانو ته اجازه نه ورکول کېږي، چې له ښاغلي بخشي سره اړیکه ونیسي.
دغه بنسټ د شارپ او د ملګرو ملتونو د کډوالۍ عالي کمېشنرۍ غوښتي، چې د دوی وکیلان ښاغلی بخشي مخکې له دې، چې په ​​ناقانونه توګه افغانستان ته واستول شي؛ خوشې کړي.
دغه بنسټ دارنګه ادعا کړې ده، چې په اسلام اباد کې پولیسو د پي او ار کارت لرونکی یو افغان هم نیولی دی.