مارکو روبیو: واشنګټن لا هم ناټو ته ژمن دی

د امریکا د بهرنیو چارو وزیر مارکو روبیو وايي چې واشنګټن لا هم ناټو ته ژمن دی، خو تمه لري چې د دغه سازمان غړي هېوادونه خپلې پوځي بودیجې ته ډېرې پیسې ځانګړې کړي او متحده‌ایالات به دوی ته لا ډېر فرصت ورکړي.

نوموړي د پنجشنبې په ورځ (د اپرېل ۳مه) زیاته کړې چې د ناټو غړي هېوادونه باید د ټاکل شوې دوه سلنې پر ځای د خپلو ناخالصو داخلي تولیداتو پنځه سلنه د پوځي بودیجې لپاره ولګوي.

نوموړي په بروکسل کې د اروپايي هېوادونو د بهرنیو چارو له وزیرانو سره د لیدنې ترڅنګ خبریالانو ته زیاته کړې: «امریکا په ناټو حضور لري. متحده‌ایالات د تل په څېر په ناټو کې فعال دی.»

روبيو د اروپا په تړاو د متحده‌ایالاتو ولسمشر ډونالډ ټرمپ د سیاست په تړاو زیاته کړې: «هغه د ناټو مخالف نه دی. ښاغلی ټرمپ د داسې ناټو مخالف دی چې غړي یې د دغه تړون په چوکاټ کې له دوی څخه د تمې وړ مکلفیتونو د پوره‌کېدو لپاره لازم ظرفیت نه‌لري.»

د امریکا ولسمشر تر دې وړاندې ویلي، دغه هېواد حاضر نه دی چې د ناټو په چوکاټ کې د مالي او پوځي مکلفیتونو اضافه بار پر خپلو اوږو واخلي او د دغه اېتلاف غړي باید د خپلو ناخالصو داخلي تولیداتو ۵ سلنه د دفاعي چارو لپاره ولګوي.

واشنګټن نوي دولت همداراز په روښانه ډول اروپایي هېوادونو ته ویلي چې نور نه‌شي کولای د اروپا امنیت خپل اصلي لومړیتوب وګڼي او دې څرګندونې په اروپایي پلازمېنو کې داسې برداشت رامنځته کړی چې دوی باید له امریکا څخه جلا د ګواښونو پر وړاندې د خپلې دفاع په اړه غور وکړي.