سعودي د اسراییل بریدونه غندلي او اسراییل یې د سوریې د ثبات په کمزوري کولو تورن کړی
سعودي عربستان د پنجشنبې په ورځ په سوریه کې د اسراییل بریدونه وغندل او اسراییل یې د سوریې په بې ثابته کولو تورن کړ.
د سعودي عربستان د بهرنیو چارو وزارت په یوه بیان کې ویلي دي: «د سعودي عربستان د بهرنیو چارو وزارت د اسراییل هغه بریدونه چې په سوریه کې یې پنځه بېلابېلې سیمې په نښه کړې او په ترڅ کې یې لسګونه ملکي او نظامي کسان وژل شوي دي، په سختو ټکو غندي. د سعودي عربستان سلطنت یو ځل بیا د اسراییلي نیواکګرو چارواکو هغه هڅې په کلکه ردوي چې د نړۍوالو قوانینو څخه د سرغړونې له لارې د سوریې او سیمې امنیت او ثبات له ګواښ سره مخ کوي.»
په اعلامیه کې له نړۍوالې ټولنې هم غوښتل شوي چې په سوریه او سیمه کې د اسراییل د روانو سرغړونو پر وړاندې ودرېږي.
د سوریې لپاره د ملګرو ملتونو ځانګړي استازي هم د پنجشنبې په ورځ په دغه هېواد کې د اسراییل پراخ بریدونه وغندل او خبرداری یې ورکړ، چې دوی په یوه حساس وخت کې سوریه بې ثباته کوي.
ګیر پیډرسن په یوه بیان کې وویل: "په سوریه کې د اسراییل له خوا تکراري او ګړندی نظامي زیاتوالی او هوایي بریدونه چې د راپور له مخې د ملکي تلفاتو لامل شوي په کلکه غندي."
نوموړی زیاتوي: "دا ډول کړنې د خپل ځان او سیمې سره په سوله کې د یوې نوې سوریې د جوړولو هڅې زیانمنوي او سوریه په حساس وخت کې بې ثباته کوي."
دا څرګندونې وروسته له هغې وشوې چې سوریې د پنجشنبې په ورځ اسراییل په دې تورن کړ، چې د بې ثباتۍ لپاره د وژونکي کمپاین پېل کولو وروسته د هوايي ډګر په ګډون پر پوځي اهدافو د بریدونو څپې او ځمکني برید ۱۳ کسان ووژل.
اسراییل ویلي، چې د سوریې په جنوب کې یې د عملیاتو پر مهال د وسله والو ډزو ته ځواب ورکړی او د سوریې ولسمشر احمد الشرع ته یې خبرداری ورکړی چې که امنیت یې له ګواښ سره مخ شي له سختو پایلو سره به مخ شي.