د خوړو نړۍوال پروګرام: تېرکال مو په افغانستان کې تر ۹ میلیونو زیاتو کسانو سره مرسته کړې ده

د ملګرو ملتونو د خوړو نړۍوال پروګرام وایي، چې تېر کال یې په افغانستان کې له ۹ میلیونو څخه له زیاتو کسانو سره د ژوند ژغورونکې مرستې کړې دي. خو روان کال د بودجې د کمښت له امله ښایي د بشري مرستو ډېر پروګرامونه په ټپه ودرېږي.

د ملګرو ملتونو د خوړو نړېوال پروګرام تر دې وړاندې هم خبرداری ورکړی و، که بېړنۍ مرستې ورسره ونه شي؛ نو د یمن، افغانستان او سوریې په ګډون به د ماشومانو د خوارځواکۍ د مخنیوي پروګرامونه په راتلونکو میاشتو کې په ټپه ودرېږي.
افغانستان یو له هغه هېوادونو دي، چې د بې وزلۍ او بد اقتصادي وضعیت له امله په کې ګڼ ماشومان د خوارځواکۍ له ګواښ سره مخ دي.
د خوړو نړۍوال پروګرام مشرې هم ویلي و، چې د نړۍوالو مرستو کمېدو او د امریکا د بهرنیو مرستو د بندېدو له امله دغه اداره یوازې نیمایي اړو افغانانو ته مرسته رسولای شي.
سیاو وي لي رویټرز ته ویلي و، چې ډېری خلک یوازې په «ډوډۍ او چای» ژوند کوي.
له بل پلوه په افغانستان کې د دغه سازمان یو چارواکي حسیب الله الکوزي ویلي، چې تېرکال یې په افغانستان کې له ۱۰۰ زرو ډېرو اړمنو کسانو سره د معلوماتو شریکولو په برخه کې مرسته کړې ده.
د خوړو نړۍوال سازمان پر اېکس پاڼه د نوموړي یو ویډیویي پیغام خپور کړی، چې په کې یې ویلي دي چې تېرکال یې له ۱۰۰زرو د ډېرو کسانو پوښتنو ته رسېدنه کړې ده.