یونېسف: له دوو اونیو راهیسې پر غزې د اسراییل په بریدونو کې ۳۲۲ ماشومان وژل شوي
د ماشومانو لپاره د ملګرو ملتونو نړۍوال صندوق وايي، چې د اسراییل لهخوا د غزې په تړانګه کې له دوو اونیو راهیسې په ترسره شویو بریدونو کې لږ تر لږه ۳۲۲ ماشومان وژل شوي. یونېسف وایي، په ورته وخت کې لږ تر لږه ۶۰۹ نور ماشومان ټپیان شوي هم دي.
د یونېسف اجرایوي رییس کاترین رسل وایي: «په غزه کې اوربند د ماشومانو لپاره د ژوند یوه سخته اړتیا او د بیا رغونې لپاره هیله برابر کړه؛ خو ماشومان یو وار بیا د وژونکي تاوتریخوالي او محرومیت سره مخ شوي دي.»
اسراییل (د مارچ په ۱۸مه) د غزې په تړانګه خپل نوي عملیات پیل کړل او حماس یې د اوربند د غځولو او په غزه کې د ۵۹ یرغمل شویو کسانو د خوشې کولو لپاره د امریکا د نوي وړاندیز د ردولو په تور تورن کړ.
خو حماس هم په خپل وار سره اسراییل د اوربند په سرغړونه تورن کړی.
یونیسف وایي، په غزه کې «بې رحمانه بمبارۍ» یو وار بیا پیل شوې چې (د مارچ تر ۳۱مې) پورې په لسو ورځو کې هره ورځ ۱۰۰ ماشومان وژل شوي او یا هم معیوب شوي دي.
د راپورونو له مخې، ډېری وژل شوي ماشومان د بې ځایه شويو کسانو له ډلې وو، چې په لنډمهاله خېمو یا کنډوالو کې یې پناه اخیستې وه.
دا هغه شمېرې دي، چې اسراییل یې په دوامداره توګه ردوي؛ خو دغه شمېرې د ملګرو ملتونو او نورو نړۍوالو ادارو لهخوا معتبره ګڼل کېږي.
د اسراییل دفاعي ځواکونو بيبيسي ته ویلي، چې دوی «د عملیاتو پرمهال د ملکي زیان کموالي ته ژمن دي.»
د جګړې له پیل راهیسې یونېسف ویلي، چې د راپورونو له مخې ۱۵۰۰۰ ماشومان وژل شوي، له ۳۴۰۰۰ څخه ډېر ټپیان شوي او نږدې یو مېلیون ماشومان بې ځایه شوي دي.