د افغان کډوالو د ستنېدو مودې له پای ته رسېدو سره د کډوالو د ستنېدو بهیر له ځنډ سره مخ شوی
پاکستاني رسنیو راپور ورکړی، چې د افغان کډوالو د ستنېدو مودې له پای ته رسېدو وروسته د کډوالو د ستنېدو بهیر له ځنډ سره مخ شوی، ځکه په لنډي کوتل کې د افغان کډوالو د ستنېدو لپاره په کمپ کې کار روان دی.
همدا راز د اختر په درېیو ورځو کې یوازې ۱۰۵ کسان چې پنځه کورنۍ جوړوي، بېرته هېواد ته ستانه شوي دي.
سربېره پر دې، د باب دوستي له لارې هم د افغان اتباعو د ستنېدو چمتووالی روان دی او په باب دوستي کمپ کې به د نادرا له خوا د افغان کډوالوبایومټریک ترسره شي.
تازه، په کراچۍ کې د طالبانو کونسل سید عبدالجبار تخاري د سند ایالت د پولیسو له مشر سره په اختريزه ليدنه کې له پاکستانه د افغان کډوالو د اېستلو او ځورولو په اړه خبرې کړې دي.
د طالبانو کونسل غوښتنه کړې، چې د بې اسنادو کډوالو د اېستلو په پلمه دې نور افغان کډوال نه ځوروي.
په کراچۍ کې د طالبانو کونسلګرۍ نن چهار شنبه پر خپلې اېکس پاڼې لیکلي، چې په دغه ښار کې د طالبانو کونسل عبدالجبار تخاري د سند د پولیسو له مشر غلام نبي میمن سره اختريزه ليدنه کړې.
د اعلامیې د معلوماتو له مخې، د طالبانو کونسل عبدالجبار تخاري په دې ليدنه کې په دغه هېواد کې د افغان کډوالو ستونزې او اندېښنې شریکې کړې.
د طالبانو په اعلاميه کې راغلي: «هغه مسله چې افغانان یې اندېښمن کړي دي له هېواد څخه د بې اسنادو کډوالو د اېستلو په پلمه دې هغه افغانان چې د اوسېدو قانوني اسناد لري د پولیسو له خوا نه ځورول کېږي.»
په پاکستان کې له تېرو څو میاشتو راهیسې افغانان د پولیسو تر څار او تعقیب لاندې دي.
د اسلام اباد او راولپنډۍ پولیس کور په کور د افغانانو لټه کوي او تر اوسه زرګونه هغه افغانان نیول شوي، چې قانوني اسناد یې نه لرل.