د کاناډا لومړی وزیر: د ټرمپ د تعرفو پروړاندې به پرېکنده اقدام وکړو

د کاناډا لومړي وزیر مارک کارني وایي، چې دغه هېواد به د امریکا د ولسمشر ډونالډ ټرمپ د تعرفو پروړاندې پرېکنده اقدام وکړي. نوموړي زیاته کړه، چې کاناډا به د پنجشنبې په ورځ تعرفو ته ځواب ورکړي.

د کاناډا لومړي وزیر په دې اشاره سره چې د ټرمپ تعرفې د دواړو هېوادونو د اړیکو یو شمېر مهم عناصر ساتلي، وویل چې دغه هېواد به د متقابلو اقداماتو له لارې له دې تعرفو سره مقابله وکړي.
د اسټرالیا لومړي وزیر هم وویل، چې د ټرمپ لګول شوې تعرفې دوستانه نه دي، خو ټینګار یې کړی چې هېواد به یې د امریکا پروړاندې متقابلې تعرفې و نه لګوي.
دا په داسې حال کې ده، چې د متحده ایالاتو ولسمشر ډونالډ ټرمپ څو ورځې وړاندې پر واردېدونکو موټرو د ۲۵ سلنه تعرفو اعلان وکړ، چې د اپرېل میاشتې له درېیمې به نافذې شي.
دا پرېکړه د متحده ایالاتو د سوداګرۍ تشې کمولو لپاره وشوه.
د دغو تعرفو مستقیم اغېز به پر میکسیکو، جاپان، سوېلي کوریا، کاناډا او جرمني وي، ځکه دغه هېوادونه امریکا ته د موټرو لوی صادروونکي دي.
کاناډا لا دمخه د متقابلو تعرفو یوه بسته اعلان کړې، چې ټولټال ۱۵۵ مېلیارډ کاناډايي ډالر ارزښت لري او ویلي یې دي، چې دا به په پړاوونو کې پلي کړي او دا دې پورې تړاو لري چې ټرمپ څه کوي.