یو شمېر افغانان د امریکا د هغو متحدینو په اړه اندېښمن دي چې د سفر بندیز له ګواښ سره مخ دي

د امریکا د اوهایو ایالت په سمیټ کاونټي کې شاوخوا ۶۰۰ افغان کډوال چې د جمهوریت تر پرځېدو وروسته امریکا ته تللي دي؛ د هغو افغان متحدینو په اړه اندېښمن دي، چې د سفر بندیز له ګواښ سره مخ دي.

د دغې ټولنې یوه غړې لیدا احمدي ده؛ نوموړې د هغو افغانانو د قربانۍ شاهده ده، چې د متحده ایالاتو سره یې کار کړی او له هغو ګواښونو باخبره ده کومو سره چې افغان متحدین اوس مخ دي.
اغلې احمدي په کابل کې د متحده ایالاتو په سفارت کې د ژباړونکې په توګه کار کاوه او د طالبانو له واکمنۍ سره سمه له افغانستان څخه ووتله.
نوموړې چې اوس په اکرون کې د اسیایي خدمتونو د ټولنیزې پاملرنې د دوو ژبو مشري کوي، «Ideastream Public Media» سره په مرکه کې وایي: « د طالبانو له بیا واکمنېدو سره ما فکر کاوه، چې زما ژوند نور پای ته ورسېد.»
د اټکل له مخې، لسګونه زره نور افغان ژباړونکي، سرتېري، وکیلان او قاضیان چې له متحده سره یې کار کړی په افغانستان کې پاتې دي.
هغې وویل: «دغه افغان متحدین له طالبانو څخه د ځان ژغورلو او ساتنې لپاره باید مبارزه وکړي، ځکه چې د طالبانو لپاره د امریکایانو سره همکاري کول یو جرم دی چې د مرګ سزا لري.»
اغلې احمدي وایي، تصور وکړئ چې اوس‌مهال دوی له کومو ستونزو سره مخ دي. دوی به تر څو ورځو د ژوندي پاتې کېدو لپاره ځانونه پټ ساتي او دوی به تر څو ورځو پرته له خوړو او اوبو ژوندي پاتې شي.
اغلې احمدي د اندېښنې په څرګندولو سره ویلي، د سفر بندیز به افغان کډوال امریکا ته له راتګه منع کړي.
د «No one left behind» ډلې اجرایوي مشر اندریو سلیوان وایي: «موږ خپل متحدین داسې نهیلي کړي، چې زما په اند د منلو وړ نه دي. موږ باید له هغو کسانو سره پر خپلې ژمنې عمل وکړو، چې زموږ د سرتېرو او ډیپلوماتانو سره یې د ۲۰ کلونو لپاره خدمت کړی دی.»
تر دې وړاندې ټرمپ (د جنوري په ۲۰مه) د خپلې دندې په لومړۍ ورځ د کډوالۍ پروګرامونو د ځنډولو اجرایوي فرمانونه لاسلیک کړل.
خو لیدا احمدي وایي، افغان متحدینو سره ژمنه شوې وه او اوس دوی د خیانت احساس کوي.
هغه وایي: «زه ډېره نهیلې شوې یم، لکه څنګه چې موږ سره ژمنه شوې وه موږ ته ویل شوي وو، چې تاسو زموږ لپاره ژباړه کوئ، موږ به تاسو دلته په خوندي ډول راوړو. تاسو به دلته ښه ژوند ولرئ؛ خو اوس هغه ژمنه څه شوه؟»
له بل پلوه د اوهایو استازی جک ډینیلز چې د سمیټ کاونټي استازیتوب کوي؛ د افغان کډوالو د راتګ د ځنډ په اړه خبرداری ورکړی دی.
هغه وویل: «کله چې نوې اداره راشي؛ نو د پروګرام بندول د دوی په قضیه کې یوه کوچنۍ تېروتنه ده.»
خو نوموړي ټینګار وکړ، چې دغه کډوال باید امریکا ته راوړل شي.
هغه وایي:« دا هغه خلک دي، چې موږ ورته اړتیا لرو او زموږ له هېواد سره یې ښه همکاري کړې ده.»