ایراني رسنۍ: د سمنان په مهديشهر کې ۴۵۰ افغان کډوال نیول شوي دي

د ایران مهر خبري اژانس د مهديشهر ولسوالۍ د پولیسو قوماندان مهدي شهاب الدین په حواله راپور ورکړی، چې د سمنان په مهديشهر کې ۴۵۰ تنه افغان کډوال نیول شوي. هغه د سې شنبې په ماښام له خبریالانو سره په خبرو کې ویلي، چې د بې اسناده بهرنیانو پر وړاندې عملیات لاهم روان دي.

د هغه په وینا، د دغو عملیاتو موخه د امنیت ټینګښت او د ټولنیز زیان کمول دي.
ښاغلي شهاب الدین زیاته کړې، چې د دغو عملیاتو په لړ کې ۴۵۰ افغان کډوال نیول شوي او تر نیول کېدو وروسته د کډوالو پنډغالو ته استول شوي دي.
د مهديشهر د پولیسو قوماندان په ټینګار سره ویلي، چې له سمنانه به ټول بې اسناده کډوال په زور وباسي.
هغه وړاندې ویلي، چې د بې اسناده افغان کډوالو نیول یې د کاري اجنډا برخه ده.
تر دې وړاندې د ايران د بهرنيو چارو وزير له طالبانو سره د يوې ګډې طرحې د جوړولو خبر ورکړی و، چې د افغان کډوالو پر ستنولو متمرکزه ده.
عباس عراقچي ویلي و، د دغې طرحې له مخې به د افغان کډوالو د بېرته ستنېدو بهير په تدريجي توګه ترسره شي.
هغه زیاته کړې وه، چې له طالبانو سره یې په لیدنو کې د بې اسناده افغان کډوالو د وتلو پر اړتيا مفصل بحث کړی او دواړو خواوو ټينګار کړی چې ايران ته په ناقانونه توګه تللي افغان کډوال به بېرته خپل هېواد ته ستانه شي.