د سلمان خان نوی فلم سکندر له خپرېدو مخکې انلاین لیک شوی
د بالیووډ د نامتو ستوري سلمان خان نوی فلم «سکندر» سینما ته له راتګ دمخه انلاین لیک شوی او د لومړۍ ورځې عاید هم مایوسه کوونکی و.
د سلمان خان مینهوال د اختر په مناسبت د “سکندر” فلم لیدو ته په بېصبرۍ سره انتظار وو، چې بالاخره سینما ته وړاندې شو، خو تر خپرېدو وړاندې فلم له ستر زیان سره مخ شو.
بلخوا، د فلم تحلیلکوونکي او جوړوونکي له تمې برعکس، “سکندر” د خپرېدو په لومړۍ ورځ یوازې ۲۶ کروړه هندي روپۍ عاید وکړ.
باید وویل شي، چې سلمان خان د فلم د ټریلر د معرفي کولو پر مهال ویلي وو، چې که فلم ښه وي یا بد، بیا هم ۲۰۰ کروړه هندي روپۍ عاید کوي.
همدا راز، “سکندر” د فلملیدونکو ډېر خوښ نه کړ، بلکې د نندارچیانو غبرګونونه متفاوت وو او سینمايي متخصصینو دا فلم منځنۍ کچې (ایوریج) فلم بللی دی.
په ورته وخت کې سلمان خان د فلم د شهرت لپاره د جنجال جوړولو ادعاوې رد کړې او خپلو مینهوالو ته یې د اختر مبارکي هم ورکړه.
سلمان خان د “سکندر” فلم لپاره څومره پیسې اخیستي؟
د هندي رسنیو د وروستیو راپورونو له مخې، د فلم د لګښت جزییات افشا شوي دي.
“سکندر” د ساجد ناډیاډوالا د پروډکشن تر چتر لاندې چمتو شوې او د فلم ټوله بودیجه ۴۰۰ کروړه هندي روپۍ ده.
د راپورونو له مخې، سلمان خان د دې فلم لپاره ۱۲۰ کروړه هندي روپۍ اخیستي دي.