طالبانو او پاکستاني پوځیانو پر ډیورنډ کرښه خولې سره خوږې کړې

پاکستاني پوځیانو او د طالبانو پوله ساتو ځواکونو په غلام خان او انګور اډه کې یو بل ته د اختر مبارکي وویله او میټايي یې سره وخوړل. په دې لنډو مراسمو کې د طالبانو کمیسار مولوي بلال ګډون کړی و.

سیمه ییزې سرچینې وايي، چې د پاکستان له خوا په انګور اډه کې محلي مسوول افسر طالبانو ته میټايي ( خواږه) ورکړل او دواړو خواوو د دوه اړخیزو اړیکو د ښه والی هیله وښوده.

دغه راز دداوړو خواوو پوله ساتو په غلام خان ترمینل کې هم میټايي سره تبادله کړي.

د افغانستان او پاکستان ترمنځ په دې وروستیو کې د ډیورنډ کرښې په اوږدو کې د جنګیالیو پر حضور او پوځي پوستې جوړولو شخړې شوې دي، چې دواړو خواوو ته پکې مرګ ژوبله هم اوښتې ده.

پاکستان پر طالبانو تور لګوي، چې د پاکستاني طالبانو د غورځنګ کوربه توب او ملاتړ کوي، خو طالبان دا تورونه ردوي او د پاکستان پوځ دداعش په ملاتړ تورنوي.

دغه خواږه داسې مهال سره وېشل کیږي چې انګور اډه، خرلاچي لارې اکثره وخت د سوداګرۍ پرمخ تړلې وي.