د استخباراتو د محرمیت پالیسۍ طرزالعمل؛ طالبانو د خپلو استخباراتو کارکوونکو ته قیودات ټاکلي

افغانستان انټرنشنل د طالبانو د استخباراتو لوی ریاست «په استخباراتو کې د محرمیت ساتنې د پالیسي طرزالعمل» کاپي ترلاسه کړې ده. په دغه طرزالعمل کې، چې د طالبانو د استخباراتو لوی رییس دفتر له خوا تایید شوی، د کارکوونکو د محرم ساتلو لارښوونې شوې دي.

د دغه طرزالعمل په درېیم فصل «د بشري پیاوړتیا په برخه کې محرمیت» تر عنوان لاندې په لومړۍ ماده کې لیکل شوي، چې د استخباراتو ریاست کې د منسوبینو جذبولو پروسه باید روښانه او اصولي وي.

په دویمه ماده کې راغلي، چې د استخباراتو منسوبین نشي کولی چې د دښمن تر نفوذ لاندې سیمو او یا له هېواده بهر کې د اوسېدلو ځایونه ولري.

په دې ماده کې زیاته شوې، چې بهر له هېواده یا د دښمن تر نفوذ لاندې سیمو کې د استخباراتو د کارکوونکو اوسیدل «موقت یا دایمي ډول» د استخباراتي اصولو خلاف ګڼل کېږي، خو فوق العاده حالات له دې امر څخه مستثنی دي.

د طرزالعمل په پنځمه ماده کې، چې دوه کاله وړاندې لیکل شوی، راغلي، چې د استخباراتو کارکوونکي نشي کولای چې د خپلو ستونزو د حل، پست د تعیین، بست لوړولو او تقدیر په موخه د طالبانو د رهبرۍ غړو او هغو مخورو ته مراجعه وکړي چې له طالبانو سره ښې اړیکې لري.

په شپږمه ماده کې د هغو منسوبینو له جذبولو د بشپړې ډډې کولو سپارښتنه شوې، چې اصلي خپلوان یې په دښمن هېوادونو کې ژوند کوي.

د طالبانو د استخباراتو ترلاسه شوي طرزالعمل کې پنځم فصل «په اوپراتیفي برخه کې محرمیت» تر عنوان لاندې دی او وايي، چې د استخباراتو کارکوونکي له خپلو منابعو سره هلته لیدلای شي چې د ریاست او اړوندې ادارې په تفاهم په ګوته شوی وي.

ددغه فصل په درېیمه ماده کې لیکل شوي، چې د استخباراتو منسوبین نشي کولای چې له بهرنیو ډېپلوماټانو سره غیر رسمي اړیکې ټینګي کړي.

په څلورمه ماده کې د استخباراتو د هغو کارکوونکو پر پرلپسې او نامحسوسې څارنې ټینګار شوی، چې اشد محرم او استخباراتي معلوماتو ته لاسرسی لري.

په شپږمه ماده کې لیکل شوي چې استخباراتي کارکوونکي دې ځانونو ته مستعار نومونه وټاکي او بهر ته لېږونکو سندونو کې مستعار نومونه ولیکل شي.

د همدې فصل په یوه ماده کې لیکل شوي چې د استخباراتو کاروونکي مستعار نومونه یاد کړي.

په اتمه ماده کې راغلي، چې د استخباراتو اوپراتیفي کارکوونکو ته د دندې د اجرا کولو په وخت کې غیر حقیقي کارتونه جوړ شي څو د دندې د اجرا کولو په وخت کې اوپراتیفي پوښښ ولري.

ددغه طرزالعمل په یوه بله برخه کې د «رسنیز محرمیت» تر عنوان لاندې لیکل شوي چې له رسنیو سره اړیکې یوازې د رواني عملیاتو ریاست له خوا نیول کېږي او د دوی له خوا د استخباراتو ریاست لاسته راوړنو په اړه معلومات شریکېږي.

په طرزالعمل کې ویل شوي چې له رسنیو سره یوازې د استخباراتو رییس او مرستیالان یې د خبرو کولو جازه لري خو استخباراتي مسایل او چارې به محرم ساتي او ورڅخه افشا نشي.

ددغه طرزالعمل په شپږم فصل کې «د تکنالوري ریاست په برخه کې محرمیت» تر عنوان لاندې په لومړۍ ماده کې ویل شوي چې د معلوماتي تکنالوژۍ د پروګرامونو د پلیتابه په برخه کې مسلکي او تحصیل لرونکي کسان باید وګومارل شي.

د طرزالعمل په یوه بله برخه کې راغلي چې د استخباراتو په روغتون کې یوازې د استخباراتو منسوبین او د هغوي اصلي کورنۍ «ښځه، اولادونه او والدین» معاینه او تداوي کېږي او د امنیتي ملحوظاتو له امله د طالبانو د مشرانو کورنۍ هم تداوي کېږي.

د طرزالعمل په وروستیو برخو کې راغلي، چې استخباراتي کارکوونکي نشی کولی چې له اجازې پرته بهرنیو سفارتونو ته مراجعه وکړي.

د طالبانو د اسخباراتو اړوند په دغه طرزالعمل کې غوښتنه شوې، چې په شخصي او محفلي بحثونو کې د شفري کودونو، اوپراتیفي لاسته راوړونو، استخباراتي کړنو په اړه معلومات افشا نه کړي.

دا طرزالعمل د طالبانو د استخباراتو د پلان او پالیسۍ ادارې رییس مولوي نورالحق جریر، د هغه مرستیال مولوي عبدالصمد ترتیب کړی.

په شپاړسمه ماده کې لیکل شوي، چې د استخباراتو ټول منسوبان د طرزالعمل په تطبیق مکلف دي.

د طرزالعمل په اړه د طالبانو د استخباراتو یو بل مکتوب هم افغانستان انټرنشنل ترلاسه کړی دی، چې پکې ویل شوي دا طرزالعمل د استخباراتو د عمومي رییس عبدالحق وثیق له لوري منظور شوی او د اجرااتو لپاره یې د استخباراتو ۰۶۰ ریاست ته لېږلی دی.

دا مکتوب د طالبانو د استخباراتو د دفتر رییس مولوي عبدالله غزنوي له خوا لېږل شوی دی.