ایران د ټرمپ ګواښ ته: ایران ته د «بمبارۍ» ګواښ، د نړۍوالې سولې او امنیت اصل ته سپکاوی دی

د ایران د بهرنیو چارو وزارت ویاند اسماعیل بقایي د ډونالډ ټرمپ وروستي ګواښ په ځواب کې ویلي، چې د یوه هېواد د ولسمشر له‌خوا د ایران د «بمبارۍ» ښکاره ګواښ د نړۍوالې سولې او امنیت اصل ته یو حیرانوونکی سپکاوی دی.

د امریکا ولسمشر ډونالډ ټرمپ تر دې وړاندې له اېن بي سي نیوز سره په یوه مرکه کې خبرداری ورکړی و، که ایران د خپل اټومي پروګرام په اړه هوکړه ونه کړي؛ نو بمبار به شي.

د امریکا ولسمشر ویلي و، دغه بمباري به داسې وي چې دوی به تر دې وړاندې هیڅکله نه وي لیدلې.
د دغې مرکې په یوه برخه کې ټرمپ یادونه وکړه، چې هغه له تهران سره د مقابلې لپاره د دویمې تعرفې په انتخاب هم غور کوي.
خو د ایران د بهرنیو چارو وزارت ویاند اسماعیل بقایي ټرمپ د ملګرو ملتونو له منشور څخه په سرغړونې تورن کړی.
هغه پر اېکس پاڼه د ټرمپ د ګواښ په اړه لیکلي:« هغه د ملګرو ملتونو له منشور څخه سرغړونه کوي.»
هغه زیاته کړې:« تاوتریخوالی تاوتریخوالی زېږوي، سوله سوله زېږوي. امریکا کولای شي خپله لاره غوره کړي او د دغه کړنو راتلونکو پایلو ته تسلیم شي.»
ټرمپ تر دې وړاندې د ایران اسلامي حمهوریت ستر مشر خامنه‌یي ته هم یو لیک استولی و.