افغان ابدالیان لوبډلې په اماراتو کې د راتلونکو سیالیو لپاره تمرینات پیل کړل

افغان ابدالیان لوبډلې د راتلونکې سیالۍ لپاره د ایرلنډ الف لوبډلې پر وړاندې د څلور ورځینۍ لوبې او درې اړخیزې لوبلړۍ لپاره د چمتووالي په موخه د دوشنبې په ورځ تمرینات پیل کړل.

دغه تمرینات په متحده عربي اماراتو کې پیل شوي، چې نږدې یوه اوونۍ به دوام وکړي.

د افغانستان کرېکټ بورډ په خپلې فېسبوک پاڼې لیکلي، چې د مهالوېش له مخې به افغان لوبډله د راتلونکې دوشنبې په ورځ د ایرلنډ الف لوبډلې پر وړاندې په یوازېنۍ څلور ورځینۍ لوبه کې د سیالۍ ډګر ته ښکته شي.

افغان ابدالیان کرېکټ لوبډله د ایرلنډ او سریلانکا پر وړاندې په درې اړخیزې لوبلړۍ کې د ګډون په موخه تېره شپه متحده عربي امارتو ته رسېدلې او تمرینات کوي.

دا په داسې حال کې ده، چې تېره ورځ د افغانستان د ۱۹ کلنو کرېکټ ملي لوبډله نیپال ته ولاړه، څو د کوربه هېواد د ۱۹ لکنې لوبډلې پروړاندې درې یو ورځینۍ سیالۍ ترسره کړي.