د افغان کډوالو اېستل؛ پاکستان کې مېشتې افغان ښځینه فعالانې د جبري اېستنې له ګواښ سره مخ دي
ګارډین ورځپاڼې راپور ورکړی، چې د ښځو د حقونو تر ۵۰ ډېرې افغان ښځینه فعالانې له پاکستانه د اېستلو له ګواښ سره مخ دي. دغه مېرمنې وېره لري، چې د طالبانو د واکمنۍ پرمهال به بندیانې او یا هم ووژل شي.
له هغه وروسته چې د پاکستان او طالبانو ترمنځ اړیکې خړې پړې شوې؛ د پاکستان حکومت اعلان وکړ، چې له دغه هېواده افغان کډوال باسي.
پاکستان د ۲۰۲۳ کال په سپتمبر میاشت کې د افغان کډوالو اېستل پیل کړل.
د بښنې نړۍوال سازمان د وروستي راپور له مخې؛ تر دې دمه لږترلږه ۸۴۴،۴۹۹ افغان کډوال په جبري توګه افغانستان ته ستانه کړای شوي دي، چېرې چې دوی د طالبانو لهخوا د ځورونې له ګواښ سره مخ دي.
د هغو کسانو په منځ کې چې د طالبانو تر واکمنۍ لاندې افغانستان ته د بېرته ستنېدو له ګواښ سره مخ دي؛ ۶۰ تنه ښځینه فعالانې او د بشري حقونو مدافعینې هم پکې شاملې دي، چې د ښځو د حقونو او زدهکړو لپاره د غږ پورته کولو له امله له ګواښ سره مخ شوې دي.
د ګارډین يه راپور کې راغلي، چې ډېری دغه مېرمنې په وروستیو اونیو کې پټېدو ته اړې شوې دي؛ ځکه چې پولیس د اسلام اباد او راولپنډۍ په ښارونو کې کور په کور ګرځي او په خپل سر افغانان نیسي او ترې بډې اخلي.
حمیرا عالم د طالبانو د بیا واکمنېدو دمخه اووه کاله په افغانستان کې د ښځو د حقونو او زدهکړو فعاله وه.
وروسته له هغې چې طالبانو د نجونو او ښځو پر زدهکړو او کار کولو بندیزونه ولګول؛ نوموړې د هغو ښځو په ډله کې وه، چې د طالبانو مخالفت یې وکړ او په سړکونو کې یې د لاریونونو په جوړولو کې مرسته وکړه.
خو نوموړې د سختو ګواښونو له امله اړه شوه، چې د ۲۰۲۲ کال په ډسمبر کې هېواد پرېږدي او پاکستان ته کډه شي.
هغه له هغه وخت راهیسې په اسلام اباد کې د خپلو دوو کوچنیو ماشومانو سره پرته له ویزې ژوند کوي.
هغې خپل وضعیت د «یوه وحشتناک خوب» په توګه بیان کړ.
هغه او ماشومانو یې په دې وروستیو کې د پولیسو له وېرې اړ شول، چې د کور په بام ځانونه پټ کړي.
هغه وایي:« که دوی ما بېرته افغانستان ته واستوي، دا به زما لپاره د مرګ په معنا وي.»
هغې وویل:« طالبان زما او زما د فعالیت په اړه ریکارډونه لري. زما په څېر مېرمنو لپاره په افغانستان کې هیڅ ځای نشته. دوی یوازې موږ نیسي او شکنجه کوي. زه نشم کولی بېرته هلته له خپلو ماشومانو سره لاړه شم.»
د پاکستان حکومت ټولو بې اسناده او د اې سي سي کارت لرونکو افغانانو ته (د مارچ تر ۳۱مې نیټې) وخت ورکړی، چې له دغه هېواده ووځي؛ که نه له جبري ستنېدو سره به مخ شي.
اغلې عالم وویل، چې هغه او نورې ښځینه فعالانې یوازې د دغې مودې د غځولو غوښتنه کوي؛ ترڅو په درېیم هېواد کې پناه واخلي.
د سویلي اسیا لپاره د بښنې نړۍوال سازمان مرستیالې د پاکستان دغه پرېکړه غندلې ده.
هغې وویل:« پاکستاني چارواکي د افغان کډوالو حقونه تر پښو لاندې کوي.»