ملګري ملتونه: د کډوالو د اېستلو پرېکړه په پاکستان کې د مېشتو افغانانو لپاره هېښوونکې وه

په پاکستان کې د ملګرو ملتونو د کډوالو عالي کمېشنرۍ مشرې د اې سي سي کارت لرونکو افغانانو لپاره له دغه هېواده د وتلو مودې ختمېدو په درشل کې د اندېښنې په څرګندولو سره ویلي، چې دغه پرېکړه د افغانانو لپاره هېښوونکې وه.

تر دې وړاندې د پاکستان د کورنیو چارو وزارت (د مارچ ۳۱مه نېټه) د اې سي سي کارت لرونکو لپاره له پاکستانه په خپله خوښه د وتلو وروستۍ نېټه ټاکلې وه.
د دغه وزارت له‌خوا خبرداری ورکړل شوی و، چې له دغې نېټې وروسته به ډله‌ییزه اېستنه پیل شي.
د کوچني اختر په مناسبت په پاکستان کې د ملګرو ملتونو د کډوالو عالي کمېشنرې فیلیپا کینډلر په خپل پیغام کې اندېښنه څرګنده کړې ده.
هغې په خپل پیغام کې ویلي:« په پاکستان کې ۱.۵۲ مېلیونه راجستر شوي افغان کډوال او پناه غوښتونکي مېشت دي. اټکل کېږي، چې ۸۰۰،۰۰۰ د اې سي سي کارت لرونکي افغانان هم په دغه هېواد کې مېشت دي.»
د دغې ادارې استازې وویل، هغې تېره اونۍ د یوې افغان کورنۍ سره ولیدل چې په ۲۰۲۲ کال کې یې له افغانستانه په بېړه تښتېدلو وروسته دلته پناه غوښتې وه.
هغه وایي:« دا زړه ماتوونکې ده، چې دوی له بېرته جبري ستنېدو وېره لرله. د دوی هیلې او خوبونه مړاوي شوي دي.»
کینډلر زیاته کړه، د وخت په تېرېدو سره افغان کډوال د پاکستان د ټولنې په جوړښت کې اوبدل شوي دي.
کینډلر دارنګه وویل، چې وضعیت څو اړخیزه چلند ته اړتیا لري.
هغې لیکلي، جبري ستنېدل د هیچا په ګټه نه دي او هغه کسان چې په ۲۰۲۳کال کې افغانستان ته ستانه کړای شوي وو؛ اوس په پاکستان کې دي.
نوموړې د هغه افغانانو لپاره چې د لوېدیځو هېوادونو ویزو ته په تمه دي؛ له هېوادونو د دوی د چټک لېږد غوښتنه کړې.
کینډلر د افغان کډوالو په وړاندې د پاکستان د اوږدې مودې مېلمه پالنې ستاینه وکړه؛ خو دا یې ومنله چې پاکستان نشي کولای دغه مسوولیت د تل لپاره په غاړه واخلي.
هغې د حل لارې لپاره ویلي:« د دغې ستونزې حل په دې کې دی، چې موږ ټول افغانستان، پاکستان او نړۍواله ټولنه په ګډه کار وکړو؛ ترڅو یوه پراخه تګلاره رامنځته کړو، چې د پاکستان، افغانستان او په خپله د افغانانو سملاسي او اوږدمهاله اړتیاوې پوره کړي.»
له بل پلوه د خیبر ولسوالۍ چارواکي وايي، چې د کډوالو د بېرته ستنېدو لپاره په لنډي کوتل او همدارنګه په پېښور کې لنډمهاله پنډغالي جوړ شوي دي.
په افغانستان کې هم د طالبانو چارواکو په تورخم کې د کډوالو د هرکلي لپاره چمتووالی نیولی دی.