ډونالډ ټرمپ: که د ایران اسلامي جمهوریت موافقه ونه کړي، نو بمبار به شي
د امریکا ولسمشر ډونالډ ټرمپ له این بي سي نیوز شبکې سره په یوه مرکه کې خبرداری ورکړی چې که ایران د خپل اټومي پروګرام په اړه موافقه ونه کړي نو بمبار به شي. د امریکا ولسمشر وویل، دا بمباري به داسې وي چې دوی به مخکې هیڅکله نه وي لیدلې.
د دې مرکې په یوه برخه کې، ټرمپ یادونه وکړه، چې هغه له تهران سره د مقابلې لپاره د دوهمې تعرفې په انتخاب هم غور کوي.
ټرمپ مخکې د ایران اسلامي جمهوریت رهبر ته یو لیک لیکلی و.
تهران وايي چې د عمان له لارې یې د ټرمپ لیک ته ځواب ورکړی دی.
د اکسیوس خبري سایټ د یوه امریکایي چارواکي او دوو باخبره سرچینو په حواله لیکلي چې خامنه ای ته د ټرمپ لیک سخت و او د نوي اټومي تړون لپاره یې دوه میاشتې ضرب الاجل هم شامل و.
دا لیک په دې وروستیو کې د متحده عربي اماراتو د سفیر له لارې په تهران کې د ایران اسلامي جمهوریت د بهرنیو چارو وزیر ته وسپارل شو.
د ټرمپ لیک ته د تهران د ځواب بشپړ متن د ایران اسلامي جمهوریت چارواکو لخوا نه دی خپور شوی.
خو د ایران ولسمشر مسعود بزشکیان وویل چې علي خامنه يي د ډونالډ ټرمپ د لیک په ځواب کې ویلي چې له متحده ایالاتو سره د "غیر مستقیم" خبرو اترو لاره خلاصه ده.
د چارواکو په وینا، دا خبرې اترې به یوازې د اټومي پروګرام په اړه وي.
د یکشنبې په ورځ، د د وري په ۱۰مه، پزشکیان وویل چې د ټرمپ لیک ته د خامنه ای ځواب د عمان له لارې د امریکا ارتباطي پلاوي ته رسیدلی دی.
د ایران ولسمشر زیاته کړه: "په دې ځواب کې، که څه هم د دواړو خواوو ترمنځ د مستقیمو خبرو اترو موضوع رد شوې ده، خو ویل شوي چې د غیر مستقیمو خبرو اترو لاره خلاصه ده."