انتونیو ګوترېش: ډېری مسلمانان د جګړو او بېځایه کېدو له امله اختر نه شي لمانځلی
د ملګرو ملتونو سرمنشي انتونیو ګوترېش د کوچني اختر په مناسبت په یوه پیغام کې د نړۍ له مسلمانانو سره د پیوستون په څرګندولو سره د هغو جګړو او شخړو په اړه اندېښنه څرګنده کړې، چې له امله یې د مېلیونونه انسانانو لپاره د دغې ورځې د لمانځلو مخه نیولې ده.
انتونیو ګوترېش (د مارچ په ۲۹مه) پر اېکس پاڼه په خپور کړي ويډیويي پیغام کې ویلي:« زه غواړم، چې د نړۍ ټولو مسلمانانو ته د کوچني اختر په مناسبت خپلې نېکې هیلې وړاندې کړم؛ خو زه دا په خفګان سره وایم، ځکه زه د ډېرو هغو مسلمانانو په اړه فکر کوم چې د جګړې او بې ځایه کېدو له امله دغه اختر له خپلو کورنیو سره نه شي لمانځلی.»
هغه ټینګار وکړ، چې اختر د یووالي او همدردۍ د ودې لپاره یو ښه فرصت دی.
سږنی کوچنی اختر په داسې حال کې لمانځل کېږي، چې په افغانستان، فلسطین او سوډان کې جګړو زرګونه کورنۍ بېځایه کړې او بشري ناورین یې لا پسې سخت کړی دی.
د بشر حقونو بنسټونه په دغو سیمو کې د بېځایه کېدو او ملکي تلفاتو د زیاتېدو پر وړاندې خبرداری ورکړی دی.
په افغانستان کې د طالبانو له راتګ وروسته، ګڼو کورنیو هېواد پرېښود او په جلاوطنۍ کې په یوه ناروښانه حالت کې شپې سبا کوي.
سربېره پر دې پر ښځو او نجونو سختو بندیزونو هم د خلکو ستونزې زیاتې کړې دي.
بل خوا بیا په غزه کې پر فلسطینیانو پرله پسې بریدونو زرګونه کورنۍ بېځایه کړې دي او د ملکي وګړو وضعیت یې کړکېچن کړی دی.
نړۍوالو سازمانونو ویلي دي، چې د دغې سیمې کلابندۍ خوراکي توکو، درملو او لومړنیو خدمتونو ته د خلکو لاسرسی محدود کړی دی.