د‌ پاکستان پوځ د بلوچستان په کلات ولسوالۍ کې د شپږو وسله‌والو له وژل کېدو خبر ورکړی دی

د پاکستان پوځ د رسنیو دفتر په یوې خبرپانه کې ویلي، د بلوچستان ایالت په کلات ولسوالۍ کې یې شپږ تنه وسله‌وال په ځانګړو عملیاتو کې وژلي دي. پوځ زیاته کړې، چې د ترهګرو پر ضد یې یاد عملیات د استخباراتي معلوماتو پر بنسټ ترسره کړي دي.

په خبرپانه کې راغلي، چې پاکستاني پوځیان د دغو عملیاتو پر مهال د وسله‌والو له مقاومت سره مخ شول؛ خو تر څه ځنډ وروسته یې له پښو وغورځول.

د پوځ په وینا، دغه شپږ تنه وژل شوي وسله‌وال د قانون پلي کوونکو ادارو او د ملکي وګړو پر ضد په ځینو ترهګریزو بریدونو کې ښکېل وو.

همدا راز ویل شوي، چې د وسله‌والو ډلو د ځپلو لپاره به پوځ خپلو عملیاتو ته دوام ورکړي.

که څه هم د پاکستان پوځ په خبرپاڼه کې د وژل شویو وسله‌والو د هویت او د ډلې په اړه څه نه دي ویلي؛ خو په بلوچستان کې د بلوڅ بېلتون پالو وسله‌واله ډله خورا فعاله ده.

بلوڅ ازادي غوښتونکو د روانې میاشتې په ترڅ کې د پاکستاني پوځیانو پر کتارونو درانه وسله‌وال بریدونه کړي دي.

روانه میاشت د دغه وسله‌والې ډلې له لوري پاکستاني پوځیانو ته خونړۍ هغه بلل کېږي، چې د جعفر اېکسپرېس په څېر ډله‌ییز برید هم پکې شامل و.

بلوڅ بېلتون پالو ادعا کړې وه، چې د یاد برید پر مهال یې د پاکستان د امنیتي ادارو ۳۰۰برمته کړي کارکوونکي او سرتېري وژلي دي؛ خو د پاکستان پوځ دغه ادعا نه ده منلې او د برید پر مهال یې د لسګونه بلوڅ بېلتون پاله وسله‌والو د وژل کېدو ادعا کړې وه.

پاکستان د یاد برید پر مهال ټلېفوني اړیکې څارلي او ادعا یې کړې، چې وسله‌وال په افغانستان کې له خپلو مشرانو سره په اړیکه کې وو.

له دې ور هاخوا په خېبر پښتونخوا کې بیا پاکستاني طالبانو تر بل هره وخته خپل فعالیتونه پراخ او چټک کړ‌ي دي.

په یاد ایالت کې هره ورځ د پاکستاني پوځیانو او «ټي‌ټي‌پي» ترمنځ د نښتو خبرونه لاس په لاس کېږي.

پاکستان ادعا لري، چې په دې وروستیو کې په بې سارې توګه زیاتې شوې ترهګرۍ تر شا د افغان خاورې د کارېدو ثبوتونه لري او د طالبانو تر سیورې لاندې د دوی ضد وسله‌والو ته امن پناه ځایونه برابر شوي دي.

بل خوا طالبانو په وار، وار د‌ پاکستان هغه څرګندونې رد کړې دي، چې ګنې افغان خاوره د دوی پر ضد کارول کېږي.

طالبانو د پاکستان امنیتي ادارې په امنیتي برخه کې ناکامه بللې دي او پرې یې غږ کړی، چې د دوی د تورنولو پر ځای دې خپلو ناکامیو ته پام وکړي.