ملا کبیر: افغان کډوالو ته وخت ورکړئ چې په خپله خوښه هېواد ته را ستانه شي
د طالبانو د کډوالو او بېرته راستنېدونکو چارو وزیر مولوي کبیر په اختریزه وینا کې وویل هېوادونه دې افغان کډوالو ته وخت ورکړي، چې په خپله خوښه هېواد ته را ستانه شي. هغه غوښتنه وکړه، چې ځینې هېوادونه دې د کډوالو د اېستلو په برخه کې له زغم او صبر کار واخلي.
د طالبانو د کډوالو او بېرته راستنېدونکو چارو وزیر ملا کبیر نن یکشنبې د کوچني اختر تر لمانځه وروسته په اختریزه وینا کې د یو شمېر بهرنیو ډېپلوماټانو په حضور کې له هغو هېوادونو مننه وکړه، چې د افغان کډوالو کوربهتوب یې کړی دی.
مولوي کبیر په خپله وینا کې وویل:«هغه هېوادونه چې افغان کډوال پکې مېشت دي ورته وخت ورکړي څو په دواطلب ډول خپل هېواد ته را وګرځي.»
د طالبانو د کډوالو چارو وزیر په داسې حال کې دا څرګندونې کوي، چې پاکستان او ایران د افغان کډوالو شړلو ته زور ورکړی دی او د ورځې سلکونه افغانان له دغو هېوادونو اېستل کېږي.
د پاکستان د کورنیو چارو وزیر محسن نقوي د وري په ۶مه اعلان وکړ، چې د افغان تابعیت لرونکو د بېرته ستنېدو لپاره ټول چمتووالی بشپړ شوی دی. هغه وویل چې د کډوالو د جبري ستنېدو د بهیر په اړه کور په کور معلوماتو ورکړ شوي دي.
ددغه هېواد د کورنیو چارو وزارت د جمعې په ورځ، د وري په اتمه، یوه غونډه جوړه کړه چې موخه یې "د کډوالو د بیرته ستنېدو لپاره د هڅو پرمختګ او د یوې شفافې پروسې د یقیني کولو لپاره د حکومت د ستراتیژۍ ارزونه ده."
محسن نقوي په دې کتنه کې د افغان کډوالو د جبري ستنېدو په برخه کې د ترسره شویو اقداماتو ارزونه وکړه او ویې ویل چې دغه بهیر به د فدرالي او دولتي ادارو په پوره همکارۍ سره عملي شي.
پاکستان حکومت پرېکړه کړې، چې د اپرېل میاشتې له پیل د افغانانو د اېستلو پروسه پیل کړي او په لنډي کوټل کې یو کېمپ هم جوړ کړی دی.
پاکستاني چارواکو ویلي چې افغان کډوال به په دغه کېمپ کې ساتل کېږي او بیا به افغانستان ته استول کېږي.
په دغه کېمپ کې د لومړنیو ضرورتونو لپاره چمتوالی نیول شوی او خېمې پکې درولي دي او د پاکستاني چارواکو پر وینا چې په یو وخت کې ۱۵۰۰ کډوالو د اوسېدو ظرفیت لري.