حاجي کمپ کې افغان کډوال: پولیس دې یا موږ خوشې کړي او یا دې موږ افغانستان ته ستانه کړي
د پاکستان د راولپنډۍ ښار په حاجي کمپ کې نیول شوي افغان کډوال په دغه کمپ کې له ګڼو ستونزو شکایت لري. دغه کډوال چې له اونیو راهیسې په دغه کمپ کې ساتل کېږي وایي، چې ان په روژه ماتي کې ورته سمه ډوډۍ هم نه رسېږي.
د اکبر په مستعار نوم ۵۰کلن کس چې د اېسيسي کارت لري، دوه اونۍ وړاندې په راولپنډۍ ښار کې د پولیسو لهخوا نیول شوی او تر نیول کېدو وروسته حاجي کمپ ته لېږدول شوی دی.
نوموړی وایي، له تېرو دوو اونیو راهیسې له ناڅرګند برخلیک سره مخ دی:« پولیس مې نه ډیپورټ کوي او نه مې هم خوشې کوي. په حاجي کمپ کې نه یوازې زه؛ بلکې زما سره نیول شوي نور افغانان هم له پراخو ستونزو سره مخ دي.»
هغه وایي، پولیسو په هره خونه کې ۴۵ کسان اچولي؛ خو نه چاته بالښت شته او نه هم یوه کمپله.
هغه زیاتوي:« زه د معدې تکلیف لرم؛ خو دلته په روژه ماتي کې راته یوازې ترخه دال راکوي، چې د خوړلو نه وي.»
د اکبر ترڅنګ په دغه کمپ کې نیول شوي نور افغانان هم له ورته ستونزو سر ټکوي.
د مصطفی په مستعار نوم یو ځوان وایي:« د پاکستان حکومت دې یا په اختر کې موږ افغانستان ته ډیپورټ کړي او یا دې هم موږ خوشې کړي؛ ځکه دغه وضعیت د زغملو نه دی. موږ خو څه جرم نه دی کړی، چې دومره اوږده د بند دوره تېره کړو.»
هغه وایي، په خونه کې د تشناب د ګند له امله ساه اخیستلای نشي.
نوموړی زیاتوي:« دا خو انساني وضعیت نه دی، چې دوی یې له موږ سره کوي. ساه اخیستلای نشو، دغه ککړه او قید هوا زموږ روغتیا ته هم زیان اړوي.»
د هغه په وینا، مبایلونه یې پولیسو اخیستي دي او کورنۍ یې له حاله بې خبره ده.
دغه افغان کډوال شکایت لري، چې د پاکستان حکومت دوی له ټاکلې مودې وړاندې نیولي دي.
مصطفی وایي، حکومت اعلان کړی و چې بې اسناده او د اېسيسي کارت لرونکي افغانان دې (د مارچ تر ۳۱مې) له دغه هېواده ووځي او د جبري اېستلو لړۍ په اپرېل میاشت کې پیلېده؛ خو د پاکستان پولیسو دوی له دغې مودې وړاندې نیولي دي.
خو تر ټولو د حیرانتیا خبره دا ده، چې په دې ډله کې پولیسو د افغانانو ترڅنګ د چهارسدې یو اوسېدونکی هم نیولی او له یوې اونۍ راهیسې په دغه کمپ کې پروت دی.
نوموړی وایي، په بازار کې یې سودا پېرله چې پولیسو ونیوو او حاجي کمپ ته یې ولېږداوه.
د هغه په وینا:« زما شناختي کارت په کور کې پاتې و؛ خو پولیسو زما یوه هم ونه منله. دلته یې راوستم او مبایل یې راڅخه واخیست، کورنۍ مې هم خبره نه ده چې زه دلته یم. پولیسو وکتل، چې زه پښتون یم؛ نو ماته یې ویل ته افغان یې موټر ته خېژه، په زور یې دلته راوستم.»
دغه شکایتونه وروسته له هغه کېږي، چې پاکستاني پولیسو په اسلام اباد او راولپنډۍ کې د افغان کډوالو نیونې او ځورونې ته زور ورکړی.
تر دې وړاندې د پاکستان د کورنیو چارو وزارت په دغه هېواد کې مېشتو بې اسناده او د اېسيسي کارت لرونکو افغانانو ته (د مارچ میاشتې تر ۳۱مې نېټې) وخت ورکړی و، چې په خپله خوښه له دغه هېواده ووځي؛ کنه له جبري اېستنې سره به مخ شي.
که څه هم د پاکستان پولیسو تر دغې مودې وړاندې عملیات پیل کړي و او په بېلابېلو برخو کې یې افغان کډوال نیولي؛ خو اوس دغه نېټه د ختمېدو په درشل کې ده او ویل کېږي چې د دغه هېواد په بېلابېلو برخو کې به د افغانانو پر وړاندې پراخ عملیات پیل شي.