یو افغان ته په کاناډا کې د کډوالۍ په چارو کې د ښو خدمتونو له امله مډال ورکړل شو

کاناډا کې د حمید الله وفا په نوم افغان ته د کډوالۍ په چارو کې د ښو خدمتونو او له افغان کډوالو سره په بېلابېلو برخو کې د مرستو د درناروي لپاره د بریتانیا د اوسني باچا دریم چارلز مډال ورکړل شو. کاناډا کې دا مډال هر کال په ټولنیزو فعالیتونو کې ښکېلو کسانو ته ور کول کېږي.

د کاناډا په برېټش کولمبیا ایالت کې د افغان ملي کلتوري ټولنې مشر حمید الله وفا تېره ورځ افغانستان انټرنشنل ته وویل، هغه د کډوالۍ په برخو کې له نويو راغلو افغانانو سره د مېشتېدو په برخو کې هلې ځلې کړې دي.

هغه وویل، چې له همدې امله یې د برېټانیا د اوسني باچا دریم چارلز د تاجپوشۍ لوړ پرستېژ ملي مډال یې ترلاسه کړی دی.

حمیدالله وفا زیاتوي چې دا مډال د کاناډا د فدرالي پارلمان او د لېبرال ګوند مخکښ غړي سوک ډلیوال له خوا ورکړل شو.

په کاناډا کې د افغان ملي کلتوري ټولني مشره حمیدالله وفا ټولنیزو خدمتونو ترڅنګ ميخانيکي او ساختماني برخو کي شرکتونه لري او ډېرو افغانانو ته یې د مسلکي زدکړو ترڅنګ کاري فرصتونه هم برابر کړي دي.

حمیدالله وفا وايي، د کاناډا کوانټلین پولیتخنیک پوهنتون کې استاد هم دی او په دې هڅه کې دی چې افغان محصلینو ته د زدکړو په برخه کې هم زمینه برابره کړي؛ ترڅو افغان ځوانان په مسلکي برخو کې وروزل شي.

دی همدراز زیاتوي چې غواړي په راتلونکې کې د کاناډا په سیاسي بهیر کې هم ځان ورکډ کړي او په سیمه یزه ټاکنو کې برخه واخلي.