نیوزیلنډ د پنځوس اوره لوبلړۍ لومړۍ لوبه کې پاکستان ته د ۷۳ منډو په توپیر ماتې ورکړه
کوربه نیوزیلنډ د دریو یو ورځنیو سیالیو په لومړۍ لوبه کې پاکستان ته د ۷۳ منډو په توپیر ماتې ورکړه. نیوزیلنډ له دې وړاندې د شل اوره سیالو لړۍ هم ۳ پر ۱ له پاکستان ګټلې وه.
د نیوزیلنډ په مکلېن پارک لوبغالې کې نن د لوبې پچه د پاکستان لوبډلې وګټله او د توپ اچونې پرېکړه یې وکړه.
د نیوزیلند لوبډلې د پوره پنځوس اورونو په لوبلو سره د ۹ ویکټو په زیان ۳۴۴ منډې جوړې او پاکستان ته ۳۴۵ منډو هدف ورکړ.
د نیوزیلنډ په ګټه په توپ وهنه کې مارک چپمن ۱۳۲، داریل میچل ۷۶ او محمد عباس ۵۲ منډې جوړې کړې.
د پاکستان په ګټه په توپ اچونه کې عرفان خان نیازي ۳، حارث روف او اکیف جاوید ۲ـ۲ ویکیټې واخیستې.
د لوبې په دوهمه پاڼۍ کې د پاکستان ټوله لوبډله د لوبې په ۴۴،۱ اورونو کې د ۲۷۱ منډو له جوړیدو وروسته وسوځیده او لوبه یې وبایلله.
په توپ وهنه کې د پاکستان په ګټه بابر اعظم ۷۸، سلمان علي اغا ۵۵ او عثمان خان ۳۹ منډو سره تر نورو ډيرې منډې جوړې کړي.
په توپ اچونه کې د نیوزیلنډ په ګټه نتان سمېت ۴، جیکوب دافي ۲ او ویل اوروک ۱ ویکېټه واخیستل.
د نیوزیلنډ او پاکستان ترمنځ د یو ورځنیو لوبلړۍ دوهمه لوبه د چهار شنبې په ورځ کیږي.