منظور پښتین: د نړۍ مسلمان د اختر په تیاریو بوخت و، خو پاکستان د پښتنو په وژلو لګیا و
د پښتون ژغورنې غورځنګ مشر منظور احمد پښتین د خېبر پښتونخوا مردان ولسوالۍ اړوند د کاټلنګ په سیمه کې د پاکستان د پوځ له خوا د شپنو په کورنیو برید ته په غبرګون ویلي، چې د اختر ورځو ته په مردان کې د پښتنو نجونو لاسونه په نکریزو نه، بلکې په وینو سره شوي دي.
د سرچینو د معلوماتو له مخې، پرون شپه د پاکستان د امنیتي ځواکونو په هوايي برید کې د دوو ځايي شپنو کورنۍ په نښه شوې، چې د ښځو او ماشومانو په ګډون پکې ۱۰ کسان وژل شوي دي.
خو د پاکستان د استخباراتو اړوندو ادرسونو لیکلي، چې د ټي ټي پي غړي او مرستندویان یې وژل شوي دي.
منظور پښتین په خپلې فېسبوک پاڼې دغه برید ته په غبرګون کې لیکلي: «نن په ټوله نړۍ کې مسلمانان د اختر په تیاریو بوخت و، خو پاکستان د پښتنو په وژلو بوخت و.»
پښتین وړاندې لیکلي، چې د اختر ورځ ته مردان کې د پښتنو نجونو لاسونه په نکریزو نه، بلکې په وینو سره شوي دي.
نوموړی زیاتوي: «دا لومړۍ پېښه نه ده، بلکې له تېرو شلو کلونو راهیسې د عامو پښتنو د وژلو وروسته د ترهګرو د وژلو ادعاوې کېږي. خو اوس د ټولنیزو رسنیو پر مټ له دې دروغ ادعاوو څخه پرده پورته شوې.»
د پښتون ژغورنې غورځنګ مشر لیکلي: «صوبايي حکومت دعوه کړې وه چې د عملیاتو اجازه به ورنکړي خو په حقیقت کې چې نن څه وشول، عملیات وو. صوبايي حکومت د پوځ پر وړاندې یو موقف اختیار کړی او د خلکو په وړاندې یې بل موقف اختیار کړی، تر څو خلک وغولوي.»
منظور پښتین وړاندې لیکلي: «څو ورځې وړاندې په بنو او وزیرستان کې هم په ورته ډول پښتانه په نښه شول او وروسته پوځ او صوبايي حکومت د شهیدانو کورنیو ته پیسې واستولې چې د دوی چوپتیا لپاره د ننواتې رسم ترسره کړي او دا مسله ختمه کړي.»
پښتین زیاتوي، چې پښتانه باید د شهیدانو کورنیو ته په ځانګړو شویو پیسو خاموش نه شي، بلکې د قاتلینو د سزا لپاره مبارزه وکړي.
منظور د کاټلنګ په پېښې خواشیني ښودلې او ویلي یې دي، چې له اختر وروسته به ددغه ظلم پر وړاندې په قوت ودرېږو.