د برېټانیا کرېکټ لوبډلې له افغان ښځینه کرېکټ لوبډلې سره ۲۰ زره پونډه مرسته کړې

د سکای سپورټ د راپور له مخې، د برېټانیا د نارینه وو کرېکټ لوبډلې د افغانستان ښځینه کرېکټ لوبډلې د ملاتړ لپاره ۲۰ زره پونډه مرسته کړې ده.

سکای سپورټ د پنج شنبې په ورځ راپور ورکړی، چې د برېټانیا د نارینه وو کرېکټ لوبډلې په جلا وطنۍ کې د افغانستان د ښځینه وو کرېکټ لوبډلې د ملاتړ په موخه ۲۰ زره پونډه مالي مرسته کړې ده.

دغه پیسې د برېټانیا د لوبغاړو د ملګرتیا صندوق له لارې د ماریلبون کرېکت کلب د کډوالو لپاره د نړیوال کرېکت د مرستو صندوق ته ورکړل شوې دي.

د کډوالو لپاره د نړیوال کرېکت د مرستو صندوق د نړۍ په کچه له کډوالو سره د مرستې لپاره جوړ شوی چې موخه یې د یو میلیون پونډو راټولول دي.

د دغه صندوق د مرستو لومړنۍ تمرکز د افغانستان د ښځو کرېکټ لوبډلې لپاره د مرستو راټولول دي.

په افغانستان د طالبانو له واکمنېدو سره د ښځو ورزش باندې بندیز ولګید او ګڼې ښځینه لوبغاړې نورو هېوادونو ته کډوالې شوي.

د اتلانو جام سیالیو پرمهال د برېټانیا پر لوبډله خورا ډیر سیاسي فشارونه وو، چې له افغانستان سره لوبه تحریم کړي، خو د ویلز کرېکټ بورډ دا پرېکړه رد کړه او پر ځای یې د نړیوالې ګډې حللارې لپاره ډیپلوماټیکې هڅې وکړې.

د مسلکي کرکټرانو د ټولنې رییس ډارېل مچل وايي:« کله چې ما د چمپينز ټرافي پر مهال د برېټانیا له لوبډلې سره په پاکستان کې وخت تېر کړ، نو روښانه شوه، چې لوبغاړي د کډوالو د نړیوال کرېکت صندوق ملاتړ کوي. مرستندویه بنسټ باید د دې نوښت لپاره وستایل شي او زه باور لرم چې د لوبغاړو مرسته به د هغو کسانو په ژوند کې بدلون راولي چې د بې ځایه کېدو له امله اغیزمن شوي.»