په کندهار کې طالبانو د پاسپورټ لپاره انلاین نوم لیکنې بندې کړې

په کندهار کې د طالبانو پاسپورت رياست په عکسخونو او شرکتونو کې د پاسپورټونو لپاره د انلاین نوم لیکنې پروسه بنده کړې او له خلکو یې غوښتې، چې د کاغدي فورمو له لارې نوم لیکنې وکړي.

په کندهار کې د طالبانو پاسپورټ ادارې د کابل د امر خلاف له خلکو غوښتي، چې د پاسپورټ لپاره په لیکلې بڼه د فورمو له لارې نوملیکنې وکړي.

طالبانو سیاحتي شرکتونو او عکسخونو ته خبرداری ورکړی، چې تر ۲۰ کلونو لوړ عمر لرونکو کسانو ته انلاین نوم لیکنې ونه کړي.

په دغه خبردراي کې لیکل شوي: «د کندهار پاسپورټ امریت ټولو عکاسخانو ته خبر ورکوي چې د انلاین فورمې لپاره مراجعین چې عمر يې تر ۲۰ کلونو زیات وي باید فورمې ورته ډکې نه شي ځکه چې اعتبار وړ نه دي.»

په کندهار کې د طالبانو د پاسپورت ادارې مسوولينو د انلاین نوم لیکنې د بنديدو لامل نه دی روښانه کړی.

د کندهار پاسپورټ اداره کې سرچينو افغانستان انټرنشنل ـ پښتو ته وویل، چې دغه اداره غواړي کاغذي فورمې د خپلو خاصو کسانو له لوري تر ټاکلې بيې لوړې پر خلکو وپلوري.

په کندهار کې طالبانو د پاسپورټ لپاره د کاغذي فورمې د ډکولو او عکسونو اخیستلو لپاره خاص ځايونه مشخص کړي، چې د دوی کسان يې په لوړه بيه دغه پروسه مخ ته وړي.

خلک د پاسپورټونو د ترلاسه کولو لپاره د یوې اسانې انلاین پروسې غوښتنه کوي او د طالبانو له دې پرېکړې نا خوښه دي.