د ملګرو ملتونو چارواکې: د افغان نجونو پر زدهکړو بندیز به د دوی نسلونه اغېزمن کړي
د ملګرو ملتونو د ښځو اجراییه مشره سیما باهوس د افغان نجونو د زدهکړو بندیز د دوام په اړه وایي، چې په افغانستان کې د نجونو د زدهکړو له حقونو د طالبانو سرغړونه به د دوی راتلوونکي نسلونه اغېزمن کړي. طالبانو سږکال هم د نجونو له ګډون پرته تعلیمي کال پیل کړ.
نوموړې له زدهکړو له بې برخو شویو نجونو پرته د نوي ښوونیز کال د پیل په اړه د اندېښنې په څرګندولو سره پر اېکس پاڼه کاږلي: «لکه څنګه چې په افغانستان کې نوی ښوونیز کال پیلېږي؛ خو د درېیم پرله پسې کال لپاره د ښوونځي دروازې د زرګونه نجونو لپاره تړلې پاتې دي.»
اغلې باهوس زیاته کړې، چې نجونې باید بېرته ښوونځيو ته ستنې شي او د دوی بنسټیز حقونه باید پرته له ځنډه بېرته دوی ته ورکړل شي.
د زدهکړو په برخه کې په دې وروستیو کې غبرګونونه یو وار بیا داسې مهال زیات شوي، چې طالبانو تازه یو بل ښوونیز کال له زدهکړو د بې برخو شوو نجونو پرته پیل کړ.
له بل پلوه د ماشومانو لپاره د ملګرو ملتونو نړۍوال صندوق اندېښنه ښودلې، چې په سږني ښوونیز کال کې د طالبانو د بندیزونو له کبله په ټول افغانستان کې شاوخوا ۴۰۰ زره افغان نجونې ښوونځي ته له تګه بې برخې شوې دي.
د دغه بنسټ اجراییه مشرې کاټرین راسل اندېښنه ښودلې، چې د دغو بندیزونو له کبله له زدهکړو د بې برخو شوو نجونو شمېر ۲.۲ مېلیونو ته ورسېد.
هغې خبرداری ورکړی، که دغه بندیز تر ۲۰۳۰ کال پورې دوام وکړي؛ نو څلور مېلیونه نجونې به له ښوونځیو ته له تګ څخه پاتې شي.