د ډاکه کرېکټ غوره ليګ سیالیو پر مهال په بنګله دېشي لوبغاړي تمیم اقبال د زړه حمله راغلې

د ټاک سپورټ رسنۍ د خبر له مخې، د ډاکه کرېکټ غوره لیک سیالیو د لوبې پر مهال د بنګله دیش د ملي لوبډلې پر پخواني کپتان تمیم اقبال د زړه حمله راغلې چې د چورلکې په وسیله روغتون ته لېږدول شوی او اوس روغ دی.

د دغې رسنۍ د معلوماتو له مخې، تمیم اقبال ته پرون هغه مهال د زړه ستونزه ورپېښه شوه چې نوموړی د ډاکه غوره لیګ په سیالیو کې پر فلډینګ بوخت و.

د راپورونو له مخې، تمیم اقبال ته په روغتون کې د انجیوپلاسټي عملیات ترسره شوي، او له دوه ساعتونو بېهوښۍ وروسته یې اوس روغتیا د ډاډ وړ ده.

د یادولو وړ ده، چې تمیم اقبال د بنګله دیش کرېکټ غوره توپ وهونکی ستوری او د ډیرې مودې لپاره د دغه هېواد د ملي ټیم کپتان وو.

۳۶ کلن تمیم اقبال د بنګله دیش لپاره په ۷۰ ټیسټ لوبو، ۲۴۳ بو ورځنیو لوبو او په ۷۸ شل اوریزو نړیوالو لوبو کې برخه اخستې ده.