له سریلانکا او ایرلنډ سره د درې اړخیزې لوبلړۍ لپاره د افغان ابدالیان لوبډلې نوملړ اعلان شو
د افغانستان کرېکټ بورډ د غوراوي کمېټې له ایرلنډ او سریلانکا الف لوبډلو سره د درې اړخیزې لوبلړۍ لپاره د دروېش رسولي په لوبډلمشرۍ د افغان ابدالیان لوبډلې نوملړ اعلان کړ. په دغه لوبلړۍ کې ۷ یو ورځنۍ او دوه څلور ورځنۍ سیالۍ کېږي.
د کرېکټ بورډ د دوشنبې ورځې د اعلامیې له مخې، دغه سیالۍ د راتلونکې اپرېل په ۷مه د افغانستان په کوربتوب د متحده عربي اماراتو په ابوظبۍ کې پیلېږي او د مۍ میاشتې تر دویمې دوام کوي.
دغه لوبلړۍ د افغان ابدالیان او ایرلنډ الف لوبډلو په څلورورځنۍ لوبه پیلېږي د اپرېل له ۷مې تر ۱۰مې دوام کوي.
د دې لوبې پای ته رسېدو پسې د اپرېل په ۱۳مه د یو ورځنیو سیالیو درې اړخیزه لوبلړۍ پیلېږي چې په لومړۍ لوبه کې به یې سریلانکا الف لوبډله د ایرلنډ الف لوبډلې پر وړاندې د سیالۍ ډګر ته ښکته شي.
په دغه درې اړخیزه لوبلړۍ کې به هره لوبډله د بلې پر وړاندې دوه لوبې وکړي او د لومړي پړاو دوه مخکښې لوبډلې به د اپرېل په ۲۵مه پایلوبه کې سره ولوبېږي.
تر درې اړخیزې لوبلړۍ وروسته به افغان لوبډله د اپرېل په ۲۹مه د سریلانکا الف لوبډلې سره خپله دویمه څلور ورځنۍ لوبه پیل کړي چې د مۍ میاشتې تر دویمې نېټې به دوام وکړي.
د دروېش رسولي پهلوبډلمشرۍ څلور ورځنیو سیالیو کې عبدالمالک مرستیال لوبډلمشر، اکرام علي خېل او افسر ځاځی ویکټ ساتونکي، ریاض حسن، عمران میر، بهیر شاه محبوب، اعجاز احمد مهري، شمس الرحمن، عصمت عالم، ضیاءالرحمن اکبر، عرب ګل مومند، ضیاءالرحمن شریفي، ابراهیم عبدالرحیمزی، بشیر احمد او فرید احمد ملک شامل دي.
د درې اړخیزې لوبلړۍ لپاره هم صدیق الله اتل مرستیال لوبډلمشر، اکرام علي خېل او محمد اسحاق ویکټ ساتونکي، عبدالمالک، زبید اکبري، اعجاز احمد مهري، بلال احمد ترین، شرف الدین اشرف، فرمان الله ساپی، قیس احمد، ضیاءالرحمن اکبر، نوید ځدراڼ، خلیل احمد، عبدالرحمن او بلال سمیع غوره شوي دي.
د دې سیالیو لپاره محمد سلیم ساپی، یما عرب، فریدون داودزی او خلیل ګربز د ټولو سیالیو لپاره احتیاطي لوبغاړو کې شامل دي.