یوې ۶۶ کلنې چینایي مېرمنې چې پر بایسکل ۱۲ هېوادونو ته سفر کړی، غواړي ټولې نړۍ ته سفر وکړي
یوې ۶۶ کلنې مېرمنې چې یوازې په بایسکل یې ۱۲ هېوادونو ته سفر کړی، پرېکړه کړې چې ټولې نړۍ ته سفر وکړي. دغه مېرمن دونګ جو نومېږي او د چین اوسېدونکې ده. نوموړې غواړي، چې د نړۍ درې لویې وچې وګوري.
دونګ جو چې تر اوسه کوم هېوادونه لیدلي، کمبودیا، فرانسه او اسټرالیا هم پکې شامل دي.
نوموړې اوس پرېکړه کړې، چې ۸۸ نورو هېوادونو ته هم سفر وکړي.
د نوموړې په وینا: «سفر د یو اعتیاد په څېر دی، چې یو ځل یې خوند وڅکۍ، نو ځان ترې نه شئ ساتلی.»
د دونګ جو سفر سره له دې چې زړه راښکونکی دی، خو له ډېرو ننګونو سره هم مخامخ دی.
یاده مېرمن یوازې په چینایي خبرې کولی شي او په نورو هېوادونو کې د خبرو اترو لپاره د ژبې ژباړې اپس باندې تکیه کوي.
نوموړې د سفر محدوده بودیجه لري او ډېری وختونه په پارکونو یا هدیرو کې پاتې کېږي یا د اجنبیانو کورونو ته ځي چې دې ته د پاتې کېدو شپه ورکړي.
دونګ جو په ۲۰۱۳ کې چې کله له خپل خاوند نه جدا شوه او په ژور خپګان اخته شوه، د سایکل چلولو سره یې علاقه پیدا کړه.
دغې مېرمنې د بايسکل ځغلونکو يوه ډله وليده او پوه شوه، چې سپرلۍ کولاى شي.
د هغې زوی نوموړې ته یو فولډ بایسکل ډالۍ کړ او تبت ته یې لومړی سفر وکړ.
په هغه وخت کې يې يوازې ۱۷۰ يوان درلودل او د مياشتني تقاعد په توګه يې ۳۰۰۰ يوان ترلاسه کول.
مختلفو هېوادونو ته د سفر لپاره، هغه د یو کال لپاره په یو کور کې د صفاکارې په توګه کار وکړ او د سوېل ختیځ اسیا ته د سفر لپاره یې کافي پیسې خوندي کړې.
هغه له دوو نورو بایسکل ځغلونکو سره ولاړه، خو یوه اونۍ وروسته په ویتنام کې له خپلو ملګرو څخه جلا شوه.
خپلې ډلې نه له جدا کېدو وروسته نوموړې یو سړی وموند، چې په چینایي ژبه خبرې کولی شوای او کور ته په راستنېدو کې یې ورسره مرسته وکړه.
دونګ جو د دې پر ځای چې روحیه له لاسه ورکړي، هغې یو بل سفر پلان کړ او تر دې دمه یې د ویتنام، کمبودیا، ټایلنډ، میانمار، اسټرالیا، نیوزیلنډ او فرانسې په ګډون ۱۲ هېوادونو ته سفرونه کړي دي.
نیوزیلنډ ته د هغې سفر د کوویډ - 19 وبا له امله لنډ شو او هغه اوس د نوي سفر لپاره چمتووالی نیسي.
هغه پلان لري، چې له قزاقستان څخه متحده عربي اماراتو ته ولاړه شي او له هغې وروسته نورو هېوادونو ته هم سفر وکړي.