د G1 سیالیو اتل فرزاد منصوري د نړۍ د غوره لوبغاړو په نوملړ کې ۷م مقام خپل کړ
د تکواندو لوبې افغان لوبغاړي فرزاد منصوري پرون په انګلستان کې د G1 او نړۍوالو سیالو په منفي ۸۰ وزن لوبو کې د پرله پسې څلورو بریاوو په ترلاسه کولو سره د دغو سیالیو اتل شو او ورسره د غوره تکواندوکارانو په نړۍوال نوملړ کې یې ۷م مقام ترلاسه کړ.
منصوري خپله لومړۍ سیالي له جاپاني سیال څخه وګټله او په دویمه او درېیمه سیالۍ کې د خپلو بریتانوي سیالانو سره مخ شو او د دوی په ماتولو سره یې وروستي پړاو ته لار وموندله.
د تکواندو د لوبې دغه افغان لوبغاړي وکولای شو، چې په وروستي پړاو کې هم د پورتوریکو تکواندو غړي ته ماتې ورکوي او د سرو زرو مډال ګټونکی شي.
فرزاد له دې مډال سره د نړۍ په کچه په خپلو ټولو امتیازونو کې ۱۰ امتیازه زیات کړل او د نړۍ ۷غوره تکواندو لوبغاړو ته ورسېد.
که منصوري وکولای شي په راتلونکو سیالیو کې د سرو زرو، سپینو زرو او برونزو له مډالونو څخه یو هم وګټي؛ په ځانګړې توګه د سرو زرو مډال، نو هغه به د نړۍ د تکواندو لوبغاړو په پنځو غوره کټګوریو کې راشي.
د G1 سیالۍ سږ کال د انګلستان په مانچسټر ښار کې ترسره شوې چې د اروپا، اسیا، امریکا او افریقا ۵۸۵ ورزشکارانو پکې ګډون کړی و.