له پاکستانه د افغان کډوالو د اېستلو دویم پړاو؛ د «اېسيسي» کار لرونکي په وېره کې ژوند کوي
له پاکستانه د افغان کډوالو د اېستلو دویم پړاو پیل ته یوازې ۱۷ ورځې پاتې دي؛ خو تر ډېره په دغه هېواد کې مېشت د «اېسيسي» کارت لرونکي افغانان بیا په وېره کې شپې سبا کوي.
د پاکستان حکومت تر دې وړاندې بې اسناده او د اېسيسي کارت لرونکو افغان کډوالو ته خبرداری ورکړی و، چې د مارچ میاشتې تر وروستۍ نېټې دې په خپله خوښه له دغه هېواده ووځئ؛ کنه د جبري اېستنې سره به مخ شي.
خو په پاکستان کې د اېسيسي کارت لرونکي افغانان وایي، چې د تېرو څه باندو ۴۰کلونو ژوند دوی څنګه په دومره کمه موده کې راټول کړي؟
له تېرو څلوېښتو کلونو راهیسې په پېښور کې مېشت افغان کډوال شاه محمد افغانستان انټرنشنل ته ویلي، چې د څلوېښتو کلونو راهیسې په دغه ښار کې مېشت دی؛ نو اوس څنګه په ناڅاپي توګه د دومره اوږدې مودې ژوند په څو ورځو کې راټول کړي.
نوموړی چې د پېښور په بورډ بازار کې د رختونو کاروبار کوي وایي:« په هېواد کې د شته ناخوالو له امله څلوېښت کاله وړاندې پېښور ته راکډه شو، دلته مو په ډېرو ستونزو ځانته یو ساده ژوند جوړ کړ، واده مې هم دلته کړی او ماشومان مې هم دلته زېږېدلي؛ نو اوس یوناڅاپي د هر څه پرېښودل راته ډېر ستونزمن دي.»
هغه زیاتوي، چې دلته یې ماشومان زدهکړې کوي او افغانستان ته د بېرته ستنېدو په صورت کې به یې د ماشومانو زدهکړې هم ټکنۍ شي.
د شاه محمد زلمی زوی بصیر چې د پېښور په یوه پوهنتون کې د انجینیرۍ پوهنځي زدهکړیال دی وایي، چې په ډېرو خواریو د انجینیرۍ پوهنځي ته بریالی شوی او سږکال یې دویم کال دی؛ خو که بېرته افغانستان ته ستانه کړای شي، نو زدهکړې او خوراۍ به یې په اوبو لاهو شي.
هغه وایي تر ځان هم ډېر د خپلو خوېندو زدهکړو ته اندښمن دی.
هغه وایي:« په خبرونو کې اورو، چې طالبان په افغانستان کې نجونې زدهکړو ته نه پرېږدي؛ خو زه خپله د نجونو د زدهکړو پلوی یم او زما ټولې خویندې اوس په زدهکړو بوختې دي. زه نه غواړم چې زما د خویندو خوارۍ په اوبو لاهو شي.»
د شاه محمد او د هغه د کورنۍ په څېر په پاکستان کې مېشتې په سلګونه زره کورنۍ له دغې ستونزې او وېرې سرټکوي.
د پاکستان دغه پرېکړې په دغه هېواد کې مېشت افغانان هک حیران کړي، چې څه وکړي او چاته شکایت وکړي.
د شاه محمد ګاونډی فرید چې د افغاني ګنډونو کاروبار کوي وایي، چې هیڅ لاره ورته نه ده پاتې؛ چې چېرته لاړ شي او له کومې ادارې مرسته وغواړي.
هغه وایي:« د پاکستان دغه پرېکړې ټول افغانان سربداله کړي او لاره یې ترې ورکه کړې، چې څه وکړي او چاته شکایت وکړي.»
هغه وایي، که په رېښتیا هم د پاکستان حکومت داسې یو اقدام وکړي؛ نو په راروان اختر کې به د ټولو افغانانو خوشحالۍ په خفګان بدلې کړي.
هغه وایي، په پېښور کې یې د ګنډونو ښه کاروبار دی؛ ان له بهرنیو هېوادونو ورته فرمایشونه راځي.
هغه وایي:« دلته مې خپل شخصي کور جوړ کړی او موټر مې هم اخیستی؛ خو د پاکستان د دغې پرېکړې له امله نپوهېږم، چې خپله شتمني څه کړم او څنګه یې افغانستان ته ولېږدوم.»
له بل پلوه په پاکستان کې د ملګرو ملتونو د کډوالو د عالي کمېشنرۍ ویاند قیصر خان افریدي ویلي، چې اوسمهال شاوخوا ۸۰۰ زره کډوال په پاکستان کې د اې سي سي کارتونه لري.
د ښاغلي افریدي په وینا، دا مهال په پاکستان کې شاوخوا ۱.۴ مېلیونه راجستر شوي افغانان هم مېشت دي چې د پي او ار کارتونه لري چې دوی اجازه لري د روان کال د جون تر ۳۰مې نېټې پورې په پاکستان کې پاتې شي.
خو د پاکستان په حکومت کې سرچینې وایي، ښایي د پي او ار کارت لرونکو کډوالو په اړه پرېکړه په درېیم پړاو کې وشي.
