د مزارشریف د وزلوبې سیالیو پایلوبه له نیمهپایلوبې پرته ترسره کېږي
د مزارشریف د وزلوبې سیالیو په درېیم پړاو کې له ګډوډۍ او اخ او ډب وروسته د افغانستان د وزلوبې فډراسیون ویلي، چې د طالب چارواکو په امر او د روژې میاشتې په رارسېدو سره د مزارشریف د وزلوبې سیالۍ به سبا له نیمه پایلوبې پرته د وروستۍ لوبې او درجه بندۍ له مخې پایلوبه ترسره شي.
ټاکل شوې، چې د دې سیالیو وروستۍ لوبه د یکشنبې په ورځ (د کب ۵مه) ترسره شي.
د وزلوبې سیالیو فډراسیون زیاته کړې، چې د روژې مبارکه میاشت په رانږدې کېدو ده او د دغې لوبې لیدونکي له لرې پرتو ولایتونو څخه مزار شریف ته راغلي دي.
د طالب چارواکو د لارښوونې پر بنسټ، د دغه فډراسیون د ټیم له چارواکو سره په همغږۍ او د نمرو له جدول سره سم د وروستۍ سیالي درجهبندي په لاندې ډول ده:
بغلان - سمنګان (د درجهبندۍ لوبه)
یما پټرول – بدخشان (پایلوبه)
د وزلوبې فډراسیون د تېرې ورځې اعلان له مخې، نن باید درې لوبې ترسره شوې وای، خو د دې سیالیو پرمهال لوبغاړو له یو بل سره فزیکي شخړې وکړې او له امله یې یو لړ ستونزې رامنځته شوې دي.
د وزلوبې فډراسیون د تخار او بلخ د ځوانانو ټیمونو ترمنځ او همداراز د یما پټرول او سمنګان ټیمونو ترمنځ د لوبې پایلې اعلان کړې؛ خو د فاریاب او درهصوف لوبډلو ترمنځ د لوبې په تړاو یې هېڅ خه نه دي ویلي.
