په اسلام اباد کې د طالبانو سفارت: پاکستان نږدې راتلونکي کې ټول افغانان له خپلې خاورې باسي

په اسلام اباد کې د طالبانو سفارت وايي، د پاکستان حکومت دوی ته له اطلاع پرته له پلازمېنې او راولپنډۍ نه د افغانانو د اېستلو پرېکړه کړې ده او په نږدې راتلونکي کې غواړي چې ټول افغان کډوال وباسي. یاد سفارت وايي، چې دا د پاکستان د حکومت رسمي پرېکړه ده.

یاد سفارت د چارشنبې په ورځ وویل، چې د افغانانو د نیولو دغې پروسې په تړاو، چې «په نا اعلان شوي ډول پیل شوې، په اسلام اباد کې د طالبانو سفارت ته کومه رسمي مکتوبي اطلاع نه ده ورکړل شوې».

سفارت وايي، چې په دې اړه یې د پاکستان له اړوندو ادارو او چارواکو سره ګڼې غونډې کړې دي چې که دا «انفرادي عمل وي مخه یې ونیول شي او که پالیسي وي باید عامه او ټولو ته ورسول شي».

د طالبانو سفارت وايي، د پاکستان د بهرنیو چارو وزارت چارواکو منلې ده، چې له اسلام اباد او راولپنډۍ او په نږدې راتلونکي کې له ټول پاکستان څخه د ټولو افغان کډوالو د ایستلو پلان قطعي او حتمي دی.

سفارت زیاتوي، « دا د پاکستان د حکومت رسمي فیصله ده چې له دې وروسته به په اسلام اباد او پنډۍ کې یوازې هغه افغانان کولای شي و اوسي، څوک چې قانوني ویزه ولري. پاکستاني چارواکو وویل چې حکومت یې پریکړه کړې چې د ACC او PoR لرونکي کډوالو په ګډون، ټول افغان مهاجرین سمدلاسه له اسلام اباد او پنډۍ څخه وباسي او په نږدې راتلونکي کې به له ټول پاکستان څخه اخراج شي».

په اسلام اباد کې د طالبانو سفارت وايي، چې دوی له پاکستاني چارواکو او نړیوالو سازمانونو سره په ناستو کې په دومره لنډ وخت کې د ټولو افغان کډوالو اخراج او په دې هکله د پاکستان د یوې اړخیزې پریکړې په اړه خپله جدي اندېښنه څرګنده کړې ده.

سفارت وايي، چې دوی یاده موضوع له کابل سره شریکه کړې ده.

پاکستان په اسلام اباد او راولپنډۍ کې د افغان کډوالو د اېستلو لړۍ پیل کړې او له تېرو څو میاشتو راهیسې یې په دغو دوو ښارونو کې پر استوګنو افغانانو کړۍ را تنګه کړې ده.