محمد نبي: خپلو فزیکي وړتیا ته په کتو به له یو ورځنیو سیالیو تقاعد واخلم
افغان لوبغاړي محمد نبي د کرېکټ له نړۍوالې شورا سره په تازه مرکه کې ویلي دي، چې د اتلانو جام (چمپینز ټرافي) سیالیو وروسته ممکن یو ورځينۍ سیالۍ ونلر ي او یا ښایي کمې یو ورځينۍ نړۍوالې سیالۍ تر سره کړي.
نوموړي ویلي، چې خپلې فزیکي وړتیا ته په کتو به پرېکړه وکړي چې له یو ورځینۍ سیالیو تقاعد واخلي او که نه.
محمد نبي اوس پلان نه لري، چې ژر تر ژره استعفا وکړي او لېواله دی چې د ملي لوبډلې لپاره لوبو ته دوام ورکړي.
نبي ټینګار وکړ: "زه اوس هم د راتلونکي په اړه فکر کوم. ښايي دا زما وروستۍ یو ورځینۍ لوبې نه وي، زه به شاید لږې یو ورځینۍ لوبې وکړم او ځوانانو ته به د تجربې د ترلاسه کولو چانس ورکړم."
د هغه په خبره :"ما د لوړ پوړو لوبغاړو سره خبرې کړې دي او د لوړې کچې لوبو کې، شاید یا شاید نه، موږ به وګورو. دا به زما په فټنس پورې اړه ولري."
نبي د افغانستان د کرېکټ نړۍوالې شورا (ای سي سي) ۲۰۲۵ اتلانو جام (چمپینز ټرافي) کې د خپلې لوبډلې مهم غړی دی.
نبي وویل: «د چمپینز ټرافي لپاره چمتووالی ښه دی، ما په ابوظبي کې له ملي لوبډلې سره درې تمرینونه وکړل چې ښه حالت کې یم.
نوموړي زیاته کړه "په فاینل کې له سخت دریځ څخه د بنګله دېش تجارتي سیالیو اتلولي ګټل ماته ډېر باور راکړ. په ټول ټورنمنټ کې موږ واقعا ښه لوبه وکړه او زما فعالیتونه هم ښه و، توپ وهنه او توپ اچونه هم ما په څلورو یا پنځو لوبو کې د دندې په پای ته رسولو کې مرسته وکړه. "
په داسې حال کې چې نبي ډېره تجربه لري، د چمپینز ټرافي لپاره د افغانستان لاین اپ هم په نويو لوبغاړو سمبال دی.
د دوی له جملې څخه نبي له ۲۰ کلن ورو توپ اچوونکي ننګیال خروټي څخه هم قوي ملاتړ وکړ.
نبي وویل " هغه یو ځوان دی، چې په تېرو دوو کلونو کې خورا ښه کار کوي. هغه یو ښه ورو توپ اچونکی دی، خو یو ښه ډګر ساتونکی هم دی. هغه په شارجه کې د سویلي افریقا او ایرلینډ خلاف خورا ښه توپ اچونه وکړه. هیله ده چې هغه په چمپینز ټرافي کې نورې ویکټې هم ترلاسه کړي، دا به د ټیم لپاره ښه وي."
محمد نبي د افغانستان د لوبدلې تر ټولو تجربه لرونکی لوبغاړی دی چې مخکې یې هم ویلي وو، ښایي د اتلانو جام له سیالیو وروسته له یو ورځنیو لوبو څخه تقاعد واخلي.
په ۲۰۰۹ کال کې ۲۴ کلن محمد نبي د افغانستان لپاره په لومړي ځل یو ورځنیو سیالیو کې برخه درلوده.
اوس، په ۴۰ کلنۍ کې تجربه لرونکی ال راونډر دی، چې د خپلې لوبډلې په لومړي اتلانو جام (چمپینز ټرافي) سیالیو کې د خپل هېواد استازیتوب وکړي.
