طالبان: تېرو ۹ مياشتو کې تر ۳۰۰ زرو زيات کډوال د سپین بولدک له لارې هېواد ته ستانه شوي دي
په کندهار ولایت کې د طالبانو د ولایت مقام رسنیز مرکز وایي، چې د دغه ولایت د سپين بولدک له لارې په تېرو نهو مياشتو کې د ۳۰۰ زرو څخه زيات کډوال بېرته خپل هېواد ته راستانه شوي دي.
دغه دفتر پر اېکس پاڼه په دغه ولایت کې د طالبانو د کډوالو چارو د مسوولینو له خولې لیکلي، د تېرو نهو مياشتو په اوږدو کې ۵۸۶۶۳ کورنۍ چې ټولټال ۳۰۹۳۰۱ تنه کېږي د سپين بولدک له لارې خپل هېواد ته راستانه شوي دي.
له پاکستانه د افغان کډوالو د ستنېدو لړۍ د تېرکال په نومبر میاشت کې پیل شوه، چې لاهم دوام لري.
تازه د طالبانو تر واک لاندې باختر اژانس خبر ورکړی، چې تېره ورځ ۸۵ کډوالې کورنۍ د سپین بولدک، تورخم، اسلام کلا او ورېښمو پله له لارې هېواد ته راستنې شوې.
له بل پلوه له تېرو دوو کلونو په پاکستان کې د اسنادو د نه لرلو په تور هم وخت ناوخت افغان کډوال د پاکستاني پولیسو لهخوا نیول کېږي.
ورته مهال په کراچۍ کې د طالبانو قونسلګري بیا وایي، چې د تېرو دوو کلونو په اوږدو کې د دوی د هڅو په پایله کې د ښځو او ماشومانو په ګډون شاوخوا ۴۲۶۸ تنه افغان بندیان د سند له زندانونو خوشې شوي دي.
دغې قونسلګرۍ پر اېکس پاڼه لیکلي، چې دغه بندیان د سند صوبې له بېلابېلو زنذانونو خوشې شوي او په دولتي لګښت بېرته خپل هېواد ته ستانه کړای شوي دي.
