افغانستان له زیمبابوې دویمه ټېسټ لوبه د ۷۲ منډو په توپیر وګټله
د افغانستان کرېکټ ملي لوبډلې خپله دویمه ټېسټ لوبه د ۷۲ منډو په توپیر له زیمبابوې لوبډلې وګټله. دغه لوبه نن د پنځمې ورځې لپاره د کابل په وخت ۱۲:۳۰ بجې د زیمبابوې په کوربهتوب په کوین سپورټ کلب لوبغالي کې پیل شوې وه.
د دغې بریا سره افغانستان په ټېسټ لوبو کې ټولې څلور بریاوې لري.
افغان لوبډلې زېمبابوې ته د ۲۷۸ منډو هدف ورکړی و؛ خو زېمبابوې لوبډله ونه توانېده، چې دغه هدف پوره کړي او ټول لوبغاړي یې په ۲۰۵ منډو وسوځېدل.
په افغان لوبډله کې په توپ اچوونکو کې راشدخان ښه لوبه ترسره کړه، چې ټولټال اووه وېکټې یې ترلاسه کړې او په توپ وهنه کې بیا رحمت شاه ۱۳۹ او عصمت عالم ۱۰۱ منډې جوړې کړې وې.
دغه لوبه چې د جنورۍ میاشتې په دویمه نېټه پیل شوې وه نن پایته ورسېده.
تر دې وړاندې د افغانستان او زېمبابوې لوبډلو ترمنځ لومړۍ ټېسټ لوبه چې د ډسمبر په ۲۶مه پیل شوې وه، بې پایلې پایته ورسېده.
