پر هندي سینما تازه نندارې ته وړاندې شوی بي بي جان فلم خپل لګښت هم نشي پوره کولی
د هندي سینما بالیووډ فلمي ستوری ورون دون د خپل فلم "بي بي جان" په اړه ډېر خوښ و او غوښتل یې چې دا د یو لوی اکشن فلم په توګه وپیژندل شي. ځکه چې په تېرو څو کلونو کې هر لوی لوبغاړی غواړي یو لوی اکشن فلم کې ولوبیږي.
شاه روخ خان نه نیولې تر منوج باجپایي پورې زیات شمېر فلمي ستوري مو په اکشن فلمونو کې لیدلي او تر ډېره کامیاب هم وو.
خو بي بي جان کې ورون دون ونه توانېد چې د ځان له پاره لیدوونکي د سینما تر پردې راولي.
د رسنیو د مالوماتو له مخې، دا فلم د مینه والو د زړونو په ګټلو کې پاتې راغلی او په هندي سینما کې د ناکام فلم په توګه ثبت شو.
د بي بي جان فلم د ناکامۍ په اړه ویل کیږي چې د بازار موندنې برخه یې خورا کمرزورې وه، د دغه فلم ترویج ته هم هغه ډول کار نه دی شوی څنګه چې پکار و.
دغه فلم په سینما د نندارې په لومړۍ ورځ ۱۲ کروړه هندۍ کالدارې ګټلي چې دا د یو فلم له پاره تر ټولو کمه او بده ګټه ده.
شنونکي اټکل کوي چې دا فلم به د ۶۰ کروړه هندي روپیو څخه کمه ګټه وکړي، په داسې حال کې چې په دغه فلم نږدې ۱۶۰ کروړه هندې کالدارې پانګونه شوې.
